तुम्ही गेल्या काही दिवसात जर बातम्या पाहत असाल तर CCH Cloud Miner संबंधीत सोलापूर, धुळे अशा शहरामध्ये घडलेल्या घटना वाचल्या असतील. यामध्ये अनेक लोकांनी कमी काळात पैसे दुप्पट होतील ह्या आशेनं हजारो-लाखो रुपये गुंतवले आणि आता या ॲपमधून पैसे काढण्याचा पर्याय बंद झाला आहे. त्यामुळे त्यांची फसवणूक झाल्याचं स्पष्ट झालं आहे.

CCH Cloud Miner नावाच्या ॲपमध्ये पैसे गुंतवल्यास ते दरदिवशी रकमेत थोडी थोडी वाढ होत जाऊन काही दिवसातच दामदुप्पट व्हायची. एबीपी माझावर मिळालेल्या माहितीनुसार सीसीएच स्किम डेली रिटर्नवर जास्त चालते. ॲपवर अनेक योजना आहेत. CCH मध्ये नोंदणी करताना 1090 USDT ची (जवळपास ९०००० रुपये) गुंतवणूक केली जाते.

USDT म्हणजे Tether या बिटकॉईन(BTC), एथीरियम (ETH) अशा आभासी चलनाप्रमाणे एक चलन (Cryptocurrency) आहे जे टेथर कंपनीने आणलं होतं. याची किंमत १ अमेरिकन डॉलर ला एक USDT अशीच ठेवण्यात आली आहे म्हणजे डॉलरसोबतच याचीही किंमत वरखाली होते. मात्र USDT म्हणजे USD नाही. USD हे अमेरिकेचं अधिकृत चलन आहे.

या ९० हजारांच्या गुंतवणुकीवर ३५ दिवस दररोज ७ हजार ४१२ रुपये मिळायचे. म्हणजे ३५ दिवसात २ लाख ५९ हजार रुपये या ॲपच्या खात्यात जमा व्हायचे. अनेकांच्या म्हणण्यानुसार बरेच दिवस ते पैसे जमासुद्धा व्हायचे आणि काढून सुद्धा घेता येत होते आणि नेमका यामुळेच पुढील गैरप्रकार घडला आहे. काही जणांना पैसे मिळालेले पाहून त्यांनी इतरांना Refer करण्यास सुरुवात केली त्यातून इतरांनीही पैसे गुंतवले. काही जणांनी तर घरीसुद्धा कल्पना न देता मोठी रक्कम यामध्ये गुंतवली आहे. आता या ॲप Withdraw म्हणजे पैसे काढून घेण्याचा पर्याय दिसत नाही. त्यामुळे हे सर्व पैसे वायाच गेले असं गृहीत धरावं लागेल. कोट्यवधी रुपये घेऊन हे ॲप डेव्हलपर आता पळून गेले आहेत.

हे सर्व करण्यापूर्वी या ॲपची सत्यता पडताळण्याच काम एकानेही केलेलं दिसत नाही. या ॲपच्या पेजवर गेल्यास त्यांची वेबसाइटसुद्धा नाही हे दिसून येतं. काही जण cchcloudminer.com वरूनही व्यवहार करायचे असं यूट्यूबवर दिसून आलं आहे. ही वेबसाइटसुद्धा आता बंद आहे. ॲपचा डेव्हलपर म्हणून Destini L Thiel असं नाव आहे! त्यांनी वापरलेला ईमेल हा ProtonMail वरील असून हा encrypted मेल सर्व्हिस देणारी सेवा वापरतो त्यामुळे ते ईमेल अकाऊंटसुद्धा ट्रॅक करणं कुणाला शक्य नाही. याचं Description सुद्धा मोजून ४-६ ओळीचं आहे. नाव गाव पत्ता काही समोर नसताना एव्हढया सगळ्या स्पष्टपणे स्कॅम (घोटाळा) होऊ शकतो हे दिसत असताना केवळ कमी काळात पैसे दामदुप्पट होण्याच्या उद्देशाने या लोकांनी पैसे गुंतवून टाकले. यातल्या कुणालाही crypto म्हणजे काय त्याचे व्यवहार कसे होतात वगैरे काहीही माहिती नाही.

यामध्ये refer करणारे Agent आता काही पळून गेले तर काही जणांवर गुन्हे दाखल झाले आहेत. विशेष म्हणजे हे ॲप अजूनही गूगल प्ले स्टोअरवर उपलब्ध आहे. तिथल्या माहितीनुसार हे ॲप एक लाखाहून अधिक लोकानी डाउनलोड केलेलं आहे. पोलिस स्टेशनमध्ये सध्या ३१ जणांनीच जरी तक्रार दिली असली तरी प्रत्यक्षात पैसे गुंतवलेल्याची संख्या नक्कीच मोठी असणार आहे. बऱ्याच शहाण्या लोकांनी तर वस्तु गहाण ठेवून यामध्ये पैसे गुंतवले आहेत. आता यावर परत telegram, whatsapp वर मेसेज पाठवून यामधील पैसे काढून देतो अशा अर्थाचे मेसेज पाठवून पुन्हा एकदा फसवण्याचे प्रकार करत आहेत.

मी स्वतः सोलापूरमधून असल्यामुळे गेल्या काही दिवसात याबद्दल बऱ्याच बातम्या, सोशल मीडियावर पोस्ट दिसत आहेत. सोलापूर, धुळे अशा महाराष्ट्रातील शहरांसोबत छत्तीसगड, राजस्थान, दिल्ली अशा इतरही राज्यातल्या लोकांची फसवणूक झाली आहे.

मराठीटेकतर्फे आमचं आवाहन आहे की यापुढे तुम्हाला कितीही आकर्षक वाटेल अशी ऑफर, जाहिरात दिसली तरी पूर्ण तपासणी केल्याशिवाय Rummy Apps, Instant Loan Apps, Crypto Mining Apps, Chain Marketing Apps डाउनलोड करू नका. त्यामध्ये स्वतःचे किंवा इतरांचे पैसे गुंतवू नका. भले ते तुम्ही रोज पाहत असलेल्या सेलेब्रिटीनी त्याची जाहिरात केली असली तरी ते अजिबात डाउनलोड करू नका. कमी काळात काहीही न करता पैसे मिळवून देणे हे जगात कुणालाही शक्य नाही. कधीही अशा आमिषाना बळी पडू नका.

The post CCH ॲपद्वारे अनेकांची दामदुपटीच्या आमिषाने लाखो रुपयांची फसवणूक! appeared first on MarathiTech - मराठीटेक.

ॲमेझॉनकडे मालकी असलेल्या रिंग (Ring) या कंपनीने Always Home Cam आणला असून हा एक ड्रोन आहे जो आपल्या घरातच उडेल. आपण घरी नसताना हा ड्रोन घरी लक्ष ठेवेल आणि आपण आपल्या फोनमध्ये याचा लाईव्ह व्हिडिओ पाहू शकाल! काम झालं की हा ड्रोन त्याच्या डॉकमध्ये जाऊन बसेल आणि स्वतःची बॅटरी चार्ज करण्यास सुरुवात करेल.

रिंग कंपनीतर्फे या कॅमेराबाबत असं सांगण्यात आलं आहे की हा ड्रोन कॅमेरा आपल्या घरातील एकापेक्षा अधिक ठिकाणाची दृश्यं दाखवू शकेल ज्यामुळे अनेक कॅमेरा लावत बसण्याची गरज उरणार नाही. हा कॅमेरा स्वयंचलित असला तरी आपण त्याला मार्ग सांगून स्वतः सुद्धा फोनद्वारे देखरेख करू शकाल. आपल्या घराचा मॅप सेट करून द्यावा लागेल. जयनंतर तुम्ही कॅमेराला हॉल, किचन, बेडरूम असे पर्याय वापरुन त्या त्या ठिकाणी जायला सांगू शकता!

शिवाय या रिंग कंपनीचं दुसरं उत्पादन जे आपल्या घरी कोणी घुसत असेल तर त्याबद्दल अलर्ट देतं ते सुद्धा या कॅमेराला जोडता येतं यामुळे जर त्या अलार्म सिस्टमला तसा प्रकार आढळला तर हा ड्रोन कॅमेरा स्वतः त्या दिशेने उडत जाईल आणि त्या व्यक्तीचा लाईव्ह व्हिडिओ रेकॉर्ड करेल!

रिंग कंपनी स्मार्ट होम उपकरणे बनवते फेब्रुवारी २०१८ मध्ये ॲमेझॉनने रिंग कंपनीचं अधिग्रहण केलं आहे. या कॅमेरामागचा उद्देश चांगला असला तरी अनेकांनी प्रायवसीच्या दृष्टिकोनातून हे उपकरण चांगलं नसेल असं सांगितलं आहे. शिवाय हॅक होण्याचा धोका आहेच यावर रिंगतर्फे हा कॅमेरा केवळ उडत असतानाच रेकॉर्ड करेल आणि तसा आवाजसुद्धा येईल. आणि त्याच्या डॉकमध्ये बसल्यावर कॅमेरा झाकला गेलेला असेल असं सांगितलं आहे.

याची किंमत $249 (~१८४००) असेल सांगण्यात येत आहे आणि हा पुढच्या वर्षी खरेदीसाठी उपलब्ध होईल.

Search Terms : Amazon ring Always Home Drone Camera Always Home Cam Flying Security Drone Camera

The post ॲमेझॉनच्या रिंगचा उडणारा होम सिक्युरिटी ड्रोन कॅमेरा! appeared first on MarathiTech - मराठीटेक.

गूगलने आज त्यांच्या प्ले स्टोअरवरून पेटीएमच्या पेमेंट ॲपला काढून टाकलं आहे. गूगलच्या म्हणण्यानुसार पेटीएमने प्ले स्टोअरच्या जुगार/Gambling संबंधी नियमांचं वारंवार उल्लंघन केलं आहे. हे ॲप प्ले स्टोअरवरून काढून टाकलं असलं तरी ज्यांच्याकडे हे ॲप आधीपासून आहे त्यांना काळजी करण्याची गरज नाही. त्यांच्याकडे पेटीएम नेहमी प्रमाणे सुरू राहील. फक्त नव्याने कोणाला पेटीएम घ्यायचं असेल तर ते त्यांना डाउनलोड करता येणार नाही. पेटीएमने ट्विट करून याबाबत माहिती देत आमचं ॲप लवकरच प्ले स्टोअरवर परतणार असल्याचं सांगितलं आहे.

यासंबंधीत एक ब्लॉग लिहून माहिती देण्यात आली असून यामध्ये एखाद्या ॲपमध्ये ऑनलाइन कसिनो किंवा जुगार/बेटिंग सुरू करणं अवैध आहे. यूजर्सचं नुकसान होऊ नये या उद्देशाने गूगलने हे नियम लागू केले आहेत. यामुळे यूजर्सची संभाव्य फसवणूक टाळता येईल असं गूगलला वाटतं. शिवाय एखाद्या ॲपमधून अमुक एका वेबसाइट/ॲपकडे redirect करून तिथे असे प्रकार घडणार असतील तर ते सुद्धा अवैध असेल असंही गूगलने स्पष्ट केलं आहे. जर वारंवार हा प्रकार घडला तर आधी हे ॲप काढून टाकण्यात येईल आणि पुन्हा असा प्रकार झाला तर डेव्हलपर अकाऊंट बंद करण्यात येईल.

याच नियमांमुळे Dream11, MPL सारख्या सेवांची ॲप्स प्ले स्टोअरवर उपलब्ध नाहीत. पेटीएमने Paytm First Games नावाची सेवा आणली आहे ज्यामध्ये अशाच गेमचं गोंडस नाव दिलेल्या जुगाराच्या गोष्टी चालतील. पेटीएमला याबाबत माहिती नव्हती की त्यांनी माहिती असून त्याकडे दुर्लक्ष केलं त्यांनाच ठाऊक. पण भारतातल्या ॲप्स आणि त्यांच्यामध्ये सुरू असलेल्या बऱ्याच त्रासदायक गोष्टींना आळा घालणं नक्कीच गरजेचं आहे. पाश्चात्य देशांप्रमाणे इथे अशा गोष्टींबद्दल कंपन्याना कुठेही जाब विचारला जात नाही त्यामुळे वाट्टेल तितक्या जाहिराती टाका, फसव्या जाहिराती टाका असे प्रकार सुरू आहेत. किमान गूगलने तरी अँड्रॉइड यूजर्सचा विचार करून अशा ॲप्सवर लक्ष ठेवायला हवं.

ज्यांचे Paytm Wallet/Payments Bank मध्ये पैसे आहेत त्यांनी घाबरू नये. तुम्ही अजूनही ॲप वापरू शकता आणि हे ॲप काही दिवसातच प्ले स्टोअर नक्की परत येईल.

अपडेट 07:08 PM : पेटीएम पुन्हा प्ले स्टोरवर उपलब्ध झालेलं आहे.

गूगलची ब्लॉग पोस्ट : Understanding our Play gambling policies in India

The post गूगलने पेटीएम ॲप प्ले स्टोअरवरून काढून टाकलं : नियम मोडल्यामुळे कारवाई! appeared first on MarathiTech - मराठीटेक.

सोशल मीडिया वेबसाइट ट्विटर हॅक करून प्रसिद्ध व्यक्तींच्या हँडल वरुन बिटकॉईन स्कॅम करणारी माहिती ट्विट करण्यात आली होती. बराक ओबामा, जो बायडन, मायकल ब्लुमबर्ग, बिल गेट्स, जेफ बेझोस, इलॉन मस्क, कान्ये वेस्ट, उबर व अॅपल यांच्या ट्विटर अकाऊंट्सचा यामध्ये समावेश होता. आजवरच्या सर्वात मोठ्या हॅकिंग घटनांमध्ये या घटनेची नोंद होईल.

आज पहाटे या अकाऊंट्स वरून “खालील बिटकॉईन अॅड्रेस वर पैसे पाठवले तर त्याच्या दुप्पट पैसे तुम्हाला ३० मिनिटात परत पाठवण्यात येतील” असे ट्विटस करण्यात आले होते. या मेसेजेस या अधिकृत अकाऊंट वरून ट्विट केल्यामुळे अनेकांनी त्यावर पैसे पाठवले असल्याचंही समोर येत असून याद्वारे लाखो रुपये हॅकर्सनी उकळले आहेत.

यासाठी हॅकर्सनी ट्विटरच्याच काही अंतर्गत गोष्टी वापरुन काही कर्मचाऱ्यांना हाताशी धरून हा अटॅक घडवून आणला असल्याची शक्यता सध्या व्यक्त केली जात आहे.दरम्यान ट्विटरने ते सर्व ट्विटस डिलीट केले असून व्हेरीफाईड अकाऊंट्सना तूर्तास बंधने घालण्यात आहेत तर काहींना आणखी काही काळ ट्विटस करता येणार नाहीत असे बदल करण्यात आले आहेत.

आमच्यासाठी हा खूप कठीण दिवस आहे. झालेल्या घटनेबद्दल आम्हाला वाईट वाटतं. आम्ही या गोष्टीचा तपास करत आहोत आणि आम्हाला नेमकं के झालं हे समजताच त्याची माहिती शेयर करत आहोत असं ट्विटरचे सीईओ जॅक डॉर्सी यांनी ट्विटद्वारे सांगितलं आहे.

ट्विटरच्या कर्मचाऱ्यांना टार्गेट करून त्यांच्यामार्फत हे हॅकिंग घडवून आणलं असल्याचं ट्विटरकडूनही सांगण्यात आलं आहे. सध्या हे अकाऊंट लॉक करण्यात आले आहेत. त्यांच्या सुरक्षिततेची खात्री झाल्यावरच त्यांना पुन्हा अॅक्सेस देण्यात येईल.

The post ट्विटर हॅक : बराक ओबामा, बिल गेट्ससारख्या प्रसिद्ध व्यक्तींची अकाऊंट्स हॅक! appeared first on MarathiTech - मराठीटेक.

भारतातील सर्वात मोठ्या ई लर्निंग प्लॅटफॉर्म पैकी एक असलेल्या Unacademy (अनअकॅडेमी) चा डेटाबेस जानेवारी मध्ये हॅक झाला होता. त्यावेळी १.१ कोटी युजर्सचा डेटा हॅक झाल्याचं सांगण्यात आलं होतं मात्र प्रत्यक्षात तब्बल २.२ कोटी म्हणजे जवळपास सर्वच यूजर्सचा डेटा हा हॅकमध्ये हॅकर्सच्या तावडीत सापडला आहे. आता हॅकरने तो डेटाबेस डार्क वेबवरती 2000 डॉलर्स म्हणजे जवळपास दीड लाख रुपयांना विक्रीसाठी ठेवला असल्याचं समोर आलं आहे!

या हॅकमध्ये गूगल, इन्फोसिस, कॉग्निझंट, फेसबुकच्या कर्मचाऱ्यांचे ईमेल्ससुद्धा असल्याचं सांगण्यात येत आहे. Cyble नावाच्या अमेरिकन सेक्युरिटी संस्थेने याची माहिती दिली आहे. त्यांच्या माहितीनुसार या डेटाबेसमध्ये युजरनेम, पासवर्ड, ईमेल, जॉइन केलेली तारीख, शेवटचं लॉगिन केलेली तारीख, नाव, प्रोफाइल अशी माहिती आहे!

डार्क वेब म्हणजे इंटरनेटवरची अशी जागा जी अॅक्सेस करायला खास सॉफ्टवेअर, कॉन्फिगरेशन करावं लागतं. येथील वेबसाइट गूगलसारख्या सर्च इंजिनवर सापडत नाहीत. नावाप्रमाणेच ही इंटरनेटची काळी बाजू आहे जिथे अवैध गोष्टी जास्त चालतात. अर्थात याचा वापर गोपनियतेसाठीही केला जातो. तर या डार्क वेबवर हॅकर्स त्यांनी हॅक केलेले डेटाबेस विक्रीसाठी ठेवतात जेणेकरून विक्री करणारा आणि खरेदी करणारा दोघांची ओळख बाहेर पडू नये.

यामध्ये लीक झालेले पासवर्ड SHA-256 hash ने एनक्रिप्ट केलेले असल्यामुळे हॅकर्सना ते वाचता येणार नाहीत असं सीईओ गौरव मुंजाळ यांनी सांगितलं आहे. मात्र तरीही जर कोणी यासोबत इतर वेबसाइटवरही तेच पासवर्ड वापरले असतील तर त्यांनी ते दोन्ही ठिकाणी बदलून घ्यावेत असंही सांगितलं आहे. यामध्ये कोणतीही आर्थिक माहिती (क्रेडिट/डेबिट कार्डस) हॅकर्सकडे गेली नाही असं त्यांनी म्हटलं आहे.

तुम्ही जर Unacademy वापरत असाल तर तुम्ही तुमचा पासवर्ड नक्की बदला असं आवाहन आम्ही करत आहोत. सोबत पुन्हा एकदा सांगत आहोत की एकच पासवर्ड दोन ठिकाणी वापरू नका. जगात हॅक होणार नाही अशी कोणतीही वेबसाइट नाही ही गृहीत धरून प्रत्येक वेबसाइटवर Sign Up करताना वेगळा पासवर्ड टाका. त्यामध्ये आपलं नाव, फोन नंबर अशा सोप्या गोष्टी टाकू नका.

The post Unacademy चा डेटाबेस हॅक : २.२ कोटी यूजर्सची माहिती डार्क वेबवर! appeared first on MarathiTech - मराठीटेक.