भारतीय फिनटेक कंपनी CRED चे संस्थापक कुणाल शाह यांची Meta ने व्हॉट्सॲपच्या ग्लोबल प्रमुख (Global Head of WhatsApp) म्हणून नियुक्ती केली आहे. यासोबतच Meta ने CRED मध्ये सुमारे 900 दशलक्ष डॉलर (सुमारे ₹८५०० कोटी) इतकी मोठी गुंतवणूक करण्याची घोषणा केली आहे. या निर्णयामुळे भारतीय उद्योजकतेची जागतिक स्तरावर पुन्हा एकदा दखल घेतली गेली आहे.

व्हॉट्सॲपचे विद्यमान प्रमुख Will Cathcart यांनी सात वर्षांच्या कार्यकाळानंतर पद सोडण्याचा निर्णय घेतला आहे. ते Meta मध्येच नव्या जबाबदारीत काम करणार असून, त्यांच्या जागी आता कुणाल शाह WhatsApp चे नेतृत्व स्वीकारतील.

Meta ने कुणाल शाह यांच्यावर का दाखवला विश्वास?

कुणाल शाह हे भारतातील सर्वात प्रभावशाली स्टार्टअप उद्योजकांपैकी एक मानले जातात. त्यांनी २०१० मध्ये FreeCharge ची सह-स्थापना केली होती. त्यानंतर २०१८ मध्ये त्यांनी CRED ची स्थापना केली. क्रेडिट कार्ड बिल वेळेवर भरणाऱ्या ग्राहकांसाठी रिवॉर्ड-आधारित प्लॅटफॉर्म म्हणून CRED ने अल्पावधीत मोठी लोकप्रियता मिळवली. Meta च्या मते, ग्राहकांच्या वर्तनाचा सखोल अभ्यास, डिजिटल पेमेंट्समधील अनुभव आणि जागतिक स्तरावरील व्यावसायिक दृष्टीकोन यामुळे कुणाल शाह यांची WhatsApp साठी निवड करण्यात आली आहे.

शिक्षण: इंजिनिअरिंग किंवा MBA नाही!

वयाच्या अवघ्या १५ व्या वर्षी कुटुंबाच्या आर्थिक अडचणींमुळे त्यांनी काम करण्यास सुरुवात केली. वडिलांचा व्यवसाय बंद पडल्यानंतर कुटुंबाला हातभार लावण्यासाठी त्यांनी डिलिव्हरी बॉय, डेटा एंट्री ऑपरेटर, मेहेंदी कोन विक्रेता, सायबर कॅफे ऑपरेटर, संगणक प्रशिक्षण देणे अशा अनेक छोट्या-मोठ्या नोकऱ्या केल्या. या अनुभवामुळे त्यांना ग्राहकांचे वर्तन, व्यवसाय अगदी जवळून समजले.

विशेष म्हणजे, कुणाल शाह यांच्याकडे ना इंजिनिअरिंगची पदवी आहे, ना पूर्ण केलेले MBA शिक्षण. त्यांनी मुंबईतील Wilson College मधून तत्त्वज्ञान (Bachelor of Arts in Philosophy) या विषयात पदवी घेतली. त्यानंतर त्यांनी NMIMS मध्ये MBA ला प्रवेश घेतला होता, मात्र काही महिन्यांतच त्यांनी तो अभ्यासक्रम सोडून उद्योजकतेचा मार्ग स्वीकारला.

२०१० मध्ये त्यांनी संदीप टंडन यांच्यासोबत FreeCharge ची स्थापना केली. ऑनलाइन मोबाईल रिचार्जमध्ये फ्रीचार्जने मोठी झेप घेतली होती. २०१५ मध्ये Snapdeal ने ही कंपनी सुमारे 400 दशलक्ष डॉलर्समध्ये विकत घेतली. त्यानंतर काही वर्षे नवीन कल्पनांवर काम केल्यानंतर २०१८ मध्ये त्यांनी स्वतःच्या भांडवलातून CRED ची स्थापना केली. वेळेवर क्रेडिट कार्ड बिल भरणाऱ्या ग्राहकांना रिवॉर्ड देण्याची संकल्पना CRED मुळे लोकप्रिय झाली.

CRED मध्ये 900 दशलक्ष डॉलरची गुंतवणूक

या कराराचा आणखी एक महत्त्वाचा भाग म्हणजे Meta कडून CRED मध्ये 900 दशलक्ष डॉलरची गुंतवणूक. या गुंतवणुकीनंतर Meta कंपनीत Minority Investor म्हणून सहभागी होणार आहे. मात्र, CRED च्या ग्राहकांच्या डेटावर Meta ला कोणताही प्रवेश मिळणार नसल्याचे स्पष्ट करण्यात आले आहे.

WhatsApp साठी पुढील टप्पा

व्हॉट्सॲप हे जगातील सर्वाधिक वापरले जाणारे मेसेजिंग प्लॅटफॉर्म असून भारत हा त्याचा सर्वात मोठा बाजार आहे. कुणाल शाह यांच्या नेतृत्वाखाली व्हॉट्सॲपमध्ये डिजिटल पेमेंट्स, व्यावसायिक सेवा आणि ई-कॉमर्सशी संबंधित सुविधा अधिक वेगाने विकसित होण्याची शक्यता व्यक्त केली जात आहे. Meta भारतासह ब्राझील आणि इंडोनेशिया यांसारख्या बाजारपेठांमध्ये WhatsApp ला अधिक सक्षम “सुपर ॲप” बनवण्याच्या दिशेने काम करत आहे.

The post CRED चे संस्थापक कुणाल शहा आता WhatsApp चे सीईओ! appeared first on MarathiTech - मराठीटेक.

जगभरातील सर्वात मोठ्या कंपन्यापैकी एक असलेली प्रमुख ॲपल कंपनीने त्यांचा नवीन CEO (मुख्य कार्यकारी अधिकारी) जाहीर केला असून सध्याचे सीईओ टिम कुक यांच्या नंतर ही जबाबदारी आता जॉन टर्नस (John Ternus) यांच्याकडे सोपवण्यात आली आहे. ॲपलकडून हा निर्णय अधिकृतपणे जाहीर करण्यात आला आहे.

जॉन टर्नस हे ॲपलमध्ये दीर्घकाळ काम करत आहेत (जवळपास २५ वर्षं) आणि सध्या ते हार्डवेअर विभागाचे प्रमुख आहेत. iPhone, Mac, iPad यांसारख्या कंपनीच्या महत्त्वाच्या उत्पादने डिझाईन करण्यात त्यांचा थेट सहभाग राहिला आहे. ॲपलच्या उत्पादनांची गुणवत्ता, त्यांची रचना आणि कामगिरी यामागे टर्नस यांचा मोठा वाटा मानला जातो. त्यामुळेच कंपनीच्या आत त्यांना विश्वासू आणि महत्त्वाचे नेतृत्व मानले जाते.

ॲपलने काही वर्षांपूर्वी स्वतःचे ॲपल सिलिकॉन चिप तयार करून मॅकमध्ये वापरण्याचा मोठा निर्णय घेतला. या बदलामुळे मॅकबुक्सची गती वाढली आणि बॅटरीही जास्त काळ टिकू लागली. या संपूर्ण प्रक्रियेत जॉन टर्नस यांची भूमिका खूप महत्त्वाची होती. यामुळे कंपनीने इतरांवर अवलंबून राहण्याऐवजी स्वतःची ताकद वाढवली.

सीईओपदाची जबाबदारी स्वीकारताना टर्नस यांच्यासमोर अनेक मोठी आव्हानं असतील. ॲपल ही केवळ उत्पादन बनवणारी कंपनी नाही, तर ती विविध सेवा आणि काही प्रमाणात त्यांच्या उत्पादनांसाठी सॉफ्टवेअर तयार करणारी कंपनी आहे. या सर्व गोष्टींचा समतोल राखत पुढे जाणं आणि नवीन तंत्रज्ञान, विशेषतः कृत्रिम बुद्धिमत्ता (AI) मध्येही कंपनीने आघाडी टिकवणं आवश्यक आहे.

टिम कुक यांच्या काळात ॲपलने आर्थिकदृष्ट्या मोठी झेप घेतली. त्यांचं मार्केट कॅपिटल तब्बल ४ ट्रिलीयन डॉलर्सच्या वर गेलं होतं. आता टर्नस यांच्या नेतृत्वाखाली कंपनी पुन्हा उत्पादनांमध्ये नवे बदल आणि सुधारणा आणण्यावर अधिक भर देईल, अशी अपेक्षा आहे.

ॲपलने केलेल्या अधिकृत घोषणेनुसार, हा बदल अचानक घेतलेला निर्णय नाही, तर अनेक वर्षांच्या नियोजनानंतर घेतलेला आहे. कंपनीच्या संचालक मंडळाने एकमताने हा निर्णय मंजूर केला आहे. टिम कुक हे १ सप्टेंबर २०२६ पर्यंत सीईओ पदावर राहणार आहेत. यानंतर Tim Cook हे ॲपलचे Executive Chairman म्हणून काम पाहणार आहेत. या नव्या भूमिकेत ते कंपनीला धोरणात्मक मार्गदर्शन देतील. म्हणजेच, ते पूर्णपणे कंपनीपासून दूर जाणार नाहीत तर कार्यकारी अध्यक्ष म्हणून महत्त्वाची भूमिका निभावतील.

जॉन टर्नस यांनीही या नव्या जबाबदारीबद्दल भावना व्यक्त करताना सांगितलं की, ॲपलमध्ये जवळपास संपूर्ण कारकीर्द घालवताना त्यांना स्टीव्ह जॉब्स आणि टिम कुक यांच्यासोबत काम करण्याची संधी मिळाली, जी त्यांच्या दृष्टीने खूप महत्त्वाची आहे. त्यांनी पुढे कंपनीची दिशा कायम ठेवत नवनवीन उत्पादने आणि अनुभव तयार करण्यावर भर देण्याची तयारी दर्शवली आहे.

एकूणच, जॉन टर्नस यांची सीईओ म्हणून नियुक्ती ही ॲपलसाठी महत्त्वाचा टप्पा मानली जात आहे. कंपनीची ओळख जपत नवे बदल घडवून आणण्याची जबाबदारी आता त्यांच्या खांद्यावर आहे. पुढील काही वर्षांत ॲपल कोणत्या दिशेने जातं, हे पाहणं उत्सुकतेचं ठरणार आहे.

ॲपलचे स्थापनेपासून आजवरचे सीईओ :

1. Michael Scott (1977–1981)
2. Mike Markkula (1981–1983)
3. John Sculley (1983–1993)
4. Michael Spindler (1993–1996)
5. Gil Amelio (1996–1997)
6. Steve Jobs (1997–2011)
7. Tim Cook (2011–2026)
8. John Ternus (2026-)

The post ॲपलचे नवे सीईओ जॉन टर्नस : टिम कुक यांच्यानंतर घेणार जबाबदारी! appeared first on MarathiTech - मराठीटेक.

OpenAI चे सीईओ सॅम ऑल्टमन (Sam Altman) यांना त्यांनी स्वतःच सुरू केलेल्या कंपनीमधून आज कंपनीच्या बोर्ड मेंबर्सनी काढून टाकलं असून बोर्डसोबत संवाद साधताना सातत्याने अस्पष्टता दिसून येत होत्या आणि त्यामुळे त्यांच्या जबाबदाऱ्या पार पाडण्याच्या क्षमतेत अडथळा निर्माण होत आहे असं सांगितलं आहे!

सिलिकॉन व्हॅलीमध्ये सध्या सर्वाधिक चर्चेत असलेली कंपनी OpenAI मध्ये असा प्रकार घडल्यामुळे मोठी खळबळ माजली आहे. सॅम ऑल्टमनला काढल्यानंतर आता Greg Brockman जो OpenAI चा प्रेसिडेंट आणि सहसंस्थापक आहे त्यानेसुद्धा राजीनामा दिला आहे!

आता Mira Murati यांची तात्पुरत्या सीईओ म्हणून नेमणूक झाली आहे. सोशल मीडियावर त्या भारतीय वंशाच्या असल्याचे गैरसमज पसरले असून खरेतर त्या अल्बानिया देशात जन्मलेल्या आहेत. सध्या त्या CTO पदावर होत्या

काही जणांच्या म्हणण्यानुसार सॅम ऑल्टमनने त्यांच्या नव्या प्रॉडक्टसमध्ये सुरक्षितता न तपासता जास्तीत जास्त प्रॉडक्ट उपलब्ध करून देण्यामुळे कंपनीमधील कर्मचारी आणि पर्यायाने बोर्ड सदस्य नाराज झाले आहेत. GPT Store जाहीर केल्यानंतर याबद्दल कंपनीत अंतर्गतरित्या मोठ्या प्रमाणात नाराजी व्यक्त झाली असंही सांगण्यात येत आहे.

तर दुसरीकडे सध्या OpenAI मध्ये मायक्रोसॉफ्टची मोठी गुंतवणूक असून त्यांच्यासोबत काहीतरी मतभेद झाल्यामुळे त्यांनीच सॅम ऑल्टमनला काढायला लावलं किंवा मायक्रोसॉफ्टच हा प्रकाराला कारणीभूत आहे असंही सांगितलं जात आहे. यावर दुसऱ्या काही बातम्यामध्ये असंही सांगितल आहे की सॅम ऑल्टमनला काढण्याबद्दल मायक्रोसॉफ्टला केवळ काही मिनिटे आधीच माहिती देण्यात आली त्यामुळे यात त्यांचा काही सहभाग नाही!

येत्या काही दिवसात कदाचित याबद्दल नेमकी खरी माहिती बाहेर येईल पण एव्हढया मोठ्या कंपनीमध्ये असा प्रकार तोसुद्धा अचानक घडल्यामुळे संपूर्ण टेक विश्वात आज याचीच चर्चा सुरू झाली आहे.

Sam Altman, Elon Musk, Greg Brockman (ex Stipe), Ilya Sutskever (ex Google), Trevor Blackwell, Vicki Cheung, Andrej Karpathy, Durk Kingma, Jessica Livingston, John Schulman, Pamela Vagata आणि Wojciech Zaremba यांनी मिळून २०१५ साली OpenAI ची स्थापना केली होती.

त्यावेळी इलॉन मस्कचासुद्धा या कंपनीत सहभाग होता. नंतर इलॉन मस्क बाहेर पडला मात्र अजूनही त्यामध्ये गुंतवणूक केलेली आहे. यासोबत, Reid Hoffman (LinkedIn co-founder), Peter Thiel (PayPal co-founder), Jessica Livingston (founding partner of Y Combinator), भारतीय आयटी कंपनी इन्फोसिस यांनी गुंतवणूक केली होती. २०१९ मध्ये १ बिलियन डॉलर्सची आणि नंतर २०२३ मध्ये १० बिलियन डॉलर्सची गुंतवणूक मायक्रोसॉफ्टने या कंपनीत केली होती.

अपडेट : सॅम ऑल्टमनला परत आणण्यासाठी आता प्रयत्न सुरू असून OpenAI च्या कर्मचाऱ्यांनी सोशल मीडियावर त्यांचा सपोर्ट दर्शवला आहे. या निर्णयाबाबत मायक्रोसॉफ्टलासुद्धा अंधारात ठेवलं गेलं होतं आणि त्यामुळं सत्या नाडेलासुद्धा रागावले असल्याचं सांगितलं जात आहे. आता सर्व बोर्ड बरखास्त केलं तर परत सॅम परतण्याची शक्यता आहे.

अपडेट 2 : सॅम ऑल्टमनची OpenAI बोर्डसोबतची चर्चा पुन्हा फिस्कटली असून आता Emmett Shear यांची नवीन CEO म्हणून नियुक्ती झाली आहे!

अपडेट 3 (20 Nov 2023 1:23PM) : आता सत्या नाडेला यांनी केलेल्या ट्विट (एक्सवरील पोस्ट)नुसार सॅम ऑल्टमन, Greg Brockman आणि त्यांचे इतर सहकारी आता मायक्रोसॉफ्टच्या नव्या AI Research Team चा प्रमुख बनणार आहे! शिवाय मायक्रोसॉफ्टची OpenAI सोबतसुद्धा भागीदारी सुरूच राहणार आहे!

एकंदरीत बरीच उलथापालथ झाली असून मायक्रोसॉफ्टच्या सत्या नाडेला यांनी सॅम ऑल्टमनला OpenAI मध्ये परत घेण्यासाठी प्रयत्न केल्याचं दिसत आहे मात्र OpenAI च्या बोर्डसोबत चर्चा फिस्कटल्याने आता हे सर्वजन आता थेट मायक्रोसॉफ्ट नवी AI रिसर्च टीम तयार करून ती सॅम ऑल्टमनच्या नेतृत्वात चालवली जाणार आहे. सत्या नाडेलांनी यामुळे मायक्रोसॉफ्टचं कोणतंही नुकसान होणार नाही अशी खेळी खेळली आहे.

The post ChatGPT च्या OpenAI चे सीईओ सॅम ऑल्टमनची हकालपट्टी (अपडेट : आता पुन्हा सीईओ) appeared first on MarathiTech - मराठीटेक.

यूट्यूबच्या सीईओ म्हणजेच मुख्य कार्यकारी अधिकारी असलेल्या सुजन वोचितस्की (Susan Wojcicki) यांनी आज आपण राजीनामा देत असल्याचं ईमेलमार्फत त्यांच्या कर्मचाऱ्यांना कळवलं आहे. त्यांची जागा सध्या यूट्यूबचे मुख्य प्रॉडक्ट ऑफिसर असलेले नील मोहन (Neal Mohan) हे घेणार आहेत. ते नवे SVP आणि यूट्यूब प्रमुख म्हणून काम पाहतील.

२०१४ पासून सुजन यूट्यूबच्या प्रमुखपदी होत्या. “आज इथल्या २५ वर्षांनंतर, यूट्यूबच्या प्रमुख पदापासून पायउतार होत आहे आणि माझं कुटुंब, आरोग्य आणि आवडीच्या कामांवर लक्ष देता येईल असं आयुष्य जगण्याचं ठरवलं आहे” असं त्यांनी सांगितलं आहे. त्या गूगलच्या सर्वात जुन्या कर्मचाऱ्यांपैकी एक आहेत.

गूगलचे संस्थापक सर्गे ब्रिन आणि लॅरी पेज यांना गूगलच्या स्थापनेवेळी १९९८ साली सुजन यांनी त्यांचं सिलिकॉन व्हॅलीमधलं गॅरेज भाड्यानं दिलं होतं आणि नंतर त्या स्वतः एक वर्षात गूगलच्या १६ व्या कर्मचारी म्हणून रूजू झाल्या होत्या. त्यांनी गूगलसाठी आजवर मार्केटिंग, गूगल इमेज सर्च, गूगल व्हिडिओ आणि बुक सर्च, अॅडसेन्सची निर्मितीच्या सुरुवातीचा टप्पा, यूट्यूब आणि डबलक्लिकचं अधिग्रहण आणि त्यानंतर यूट्यूबचं प्रमुखपद अशी कामगिरी केली आहे.

त्यांनी सुंदर पिचाई यांच्या विनंतीस मान देत गूगल आणि अल्फाबेट या सल्लागार म्हणून यापुढेही काम करणार असल्याचंही सांगितलं आहे. माझ्या अनुभवाचा वापर करून गूगल आणि अल्फाबेटच्या कंपन्यांना मार्गदर्शन करत राहीन असं त्यांच्या मेलमध्ये लिहिलं आहे.

सुजन यांनी नवे यूट्यूब सीईओ नील मोहन यांच्यासोबत १५ वर्षं काम केलेलं असून DoubleClick कंपनीच्या अधिग्रहणावेळी त्यांचं गूगलला आगमन झाल्यापासून डिस्प्ले व व्हिडिओ अॅड्स SVP पदापर्यंत त्यांचा प्रवास झाला आहे. नील मोहन यांच्या या नव्या पदामुळे आणखी एका मोठ्या कंपनीच्या सीईओपदी भारतीय वंशाची व्यक्ती बसणार आहे!

The post यूट्यूब सीईओ सुजन वोचितस्की यांचा राजीनामा : नील मोहन नवे सीईओ! appeared first on MarathiTech - मराठीटेक.

ट्विटर या प्रसिद्ध मायक्रो ब्लॉगिंग सोशल मीडिया वेबसाइटचे सह संस्थापक आणि सीईओ जॅक डॉर्सी यांना आज राजीनामा देत असल्याचं जाहीर केलं असून त्यांची जागा ट्विटरमध्ये सध्या CTO असलेले पराग अग्रवाल घेणार आहेत. पराग अग्रवाल हे मुंबई आयआयटीचे माजी विद्यार्थी आहेत.

सत्या नाडेला (मायक्रोसॉफ्ट), सुंदर पिचाई (गूगल), शंतनू नारायण (अडोबी),राजीव सुरी (नोकिया), अरविंद कृष्णा (आयबीएम), अजयपाल बंगा (मास्टरकार्ड), इ. यांच्यासारख्या मूळच्या भारतीय पण आघाडीच्या अमेरिकन कंपनीमध्ये प्रमुख पदावर असलेल्या उदाहरणानंतर आता पराग हे ट्विटरचे नवे सीईओ बनतील!

The post ट्विटर सीईओ जॅक डॉर्सी यांचा राजीनामा : पराग अग्रवाल नवे सीईओ! appeared first on MarathiTech - मराठीटेक.