कालच आम्ही प्रसिद्ध केलेल्या या लेखानंतर आज आलेल्या माहितीनुसार फक्त भारतामधील पब्जी मोबाइल यूजर्ससाठी एका दिवसात सहा तास गेम खेळता येण्याचं बंधन घालण्यात आलं आहे! गेल्या काही महिन्यात या गेममुळे येणार्‍या समस्या पाहून पब्जीतर्फे हा निर्णय घेण्यात आला असावा.

हा लेख नक्की वाचा पब्जी मोबाइलला १ वर्ष पूर्ण! : बॅनची मागणी कितपत योग्य?

या गेमच्या हट्टापायी विद्यार्थ्यांकडून घडणारे गैरप्रकार समोर आले जसे की पब्जी साठी नवा फोन घेऊन दिला नाही म्हणून आत्महत्या, रेल्वे ट्रॅकवर खेळत बसले असतं दोघांना रेल्वे अपघातात आलेलं मरण, लक्ष नसल्यान पाण्याऐवजी अॅसिड पिणे, इ. या पार्श्वभूमीवर या गेमवर बंदी घालण्याची मागणी जोर धरू लागली. गुजरातमध्ये काही ठिकाणी तर ही अंमलात आणली गेली असून जवळपास १६ जणांना अटकही झाली आहे!

आता अशा घटनांना थांबवता यावं म्हणून पब्जीकडून प्रथमच पाऊल उचलण्यात आलं असून आता जर एखादा यूजर सलग सहा तास गेम खेळत असेल तर त्याला बॅनरद्वारे असं सांगितलं जाईल की यापुढे तुम्हाला ही गेम अमुक वेळेपर्यंत खेळता येणार नाही. याला प्ले टाइम रेस्ट्रीक्शन म्हटलं जाईल. तसेच दोन आणि चार तासांनीही आधीच वॉर्निंग देण्यात येईल! मग सहाव्या तासाला गेम थेट बंदच करावी लागेल.

याबाबत पब्जी तर्फे अधिकृतरित्या माहिती अद्याप देण्यात आलेली नाही मात्र असे स्क्रीन शॉट्स अनेकांनी शेयर केले आहेत. तुम्हाला वाटेल की सलग सहा तास कोण गेम खेळत बेसल पण खरच या गेम इतक वेड लागलं आहे की अनेक विद्यार्थी दिवसभर गेम खेळत बसल्याचीही उदाहरणे आहेत!

The post पब्जी मोबाइल आता सहा तासच खेळता येणार : भारतीयांना बंधन! appeared first on MarathiTech - मराठीटेक.

गेलं पूर्ण वर्षं जगभर स्मार्टफोन यूजर्सना वेड लावत प्रचंड लोकप्रिय झालेली गेम म्हणजे पब्जी (PUBG – प्लेयर अननोनस् बॅटलग्राऊंड) मोबाइल… वर्ष उलटल्यावरही लाखो लोक रोजच्या रोज ही गेम त्यांच्या स्मार्टफोन्सवर खेळत असतात. आज या गेमला अँड्रॉईडवर उपलब्ध होऊन एक वर्ष पूर्ण होत आहे. त्यानिमित्त पब्जीकडून प्लेयर्ससोबत जल्लोष व्यक्त केला जात आहे. यासाठी प्रसिद्ध संगीतकार अॅलन वॉकरचं गाणं समाविष्ट करण्यात आलं असून गेम खेळताना प्लेयर्सना मोठा केकसुद्धा पाहायला मिळेल! 0.11.5 आज उपलब्ध होत असून नवी वाहनं (रिक्षा), G36C बंदूक, डायनामिक वेदर अशा बऱ्याच गोष्टी जोडण्यात आल्या आहेत.

ही गेम प्रसिद्ध होण्याचं एक कारण म्हणजे ही गेम मोफत उपलब्ध आहे. याच गेमचं कम्प्युटरसाठीची आवृत्ती मात्र ९९९ रुपयात मिळते त्यामुळे काही महिने प्रसिद्ध असलेली पीसी आवृत्ती आता तितकी लोकप्रिय राहिली नाही. उलट पब्जी मोबाइलने मात्र मोबाइल गेमिंग विश्व बदलून टाकलं. गेल्या वर्षीची सर्वात लोकप्रिय मोबाइल गेम ठरली आणि गेम अवॉर्डस् २०१८ मध्येही पुरस्कार मिळाला! डिसेंबर महिन्यापर्यंतच २० कोटी लोकांनी ही गेम डाउनलोड केली होती!

मात्र या लोकप्रियतेचा आता उलट परिणाम पाहायला मिळतोय. भारत असा देश जिथे मोफत मिळालेल्या गोष्टीचा अगदी शेवट होईपर्यंत वापर केला जातो याचंच हे आणखी एक उदाहरण… बाकी कुठेच पाहायला न मिळणारा पार टोकाला जाऊन शेवट करणारा प्रतिसाद इथेच मिळतो! फेसबुक, व्हॉट्सअॅप आणि आता या गेम बाबतही तेच दिसून आहे. अनेक विद्यार्थ्यांना आता या गेमचं इतकं व्यसन लागलं आहे की यावरून अनेक गैरप्रकार झाल्याचं उघडकीस येत आहे.

अनेक पालकांच्या अशा तक्रारी येऊ लागल्या आहेत की या गेममुळे विद्यार्थ्यांचं अभ्यासाकडे दुर्लक्ष होत आहे. मित्र ती गेम खेळतात म्हणून मलाही गेम खेळायची आहे आणि मग त्यासाठी चांगल्या स्मार्टफोनचा हट्ट करणे तो हट्ट न पुरवल्यावर अगदी आत्महत्येसारखं पाऊल उचलणे असे प्रकार इथे घडू लागले! मध्यंतरी पाणी समजून एकाने ऍसिड पिल्याचीही बातमी आली होती. कालच कर्नाटकात एकाने अर्थशास्त्राच्या पेपरमध्ये ही गेम कशी खेळायची हे लिहिलं असल्याची बातमी होती. काही दिवसांपूर्वीच दोन जण गेम खेळताना लक्ष नसल्यामुळे रेल्वेसमोर अपघात होऊन गेले. आता असे प्रकार घडल्यावर बॅनची मागणी जोर धरू लागल्यास आश्चर्य वाटू नये.

हे पुढं जात जात एका अकरा वर्षीय मुलाने या गेमविरोधात कोर्टात याचिका दाखल केली. तेथून या गेमवर बॅनच्या मागणीची सुरुवात झाली म्हणण्यास हरकत नाही. आता हे प्रकरण थेट या गेमवर थेट बॅन लागू करण्यापर्यंत गेलं असून यासंदर्भात जवळपास १६ जणांना अटक झाली आहे. स्वतःच्या फोनवरील गेम खेळल्याबद्दल अटक… वाचण्यास विचित्र वाटत असलं तरी सुरत व राजकोटमध्ये हे घडलं आहे. अनेक कॉलेजेस मध्येही अशा प्रकारचा बॅन लावला गेला आहे पण कॉलेजमध्ये तो अंमलात आणणं तांत्रिकदृष्ट्या शक्य नाहीच. त्यामुळे हॉस्टेलसारख्या ठिकाणी राहणाऱ्या विद्यार्थ्यांचं अभ्यासाकडे दुर्लक्ष होत असणार हे उघड आहे… आता खाली आम्ही माहिती देत आहोत जी तुम्हालाही फारशी माहित नसेल…

• पब्जी मोबाइलचं Content Rating Rated for 16+ Strong violence असं स्पष्टपणे लिहिलेलं आहे. प्ले स्टोअरवर पाहू शकता. १६ वर्षांवरील यूजर्सनीच गेम खेळावी…
• हे असं असूनही अनेक पालक स्वतःहून त्यांच्या १६ वर्षाहून लहान असणार्‍या मुलांनाही ही गेम खेळायला देत असल्याच निदर्शनास आलं आहे! जे नक्कीच चुकीच आहे.
• गेम मोफत असल्यामुळे आणि गेममध्ये अनेक मित्रांसोबत एकाच वेळी गेम खेळण्याची सुविधा आहे त्यामुळे मित्रांना सोबत घेऊन गेम खेळण्याची आवड अनेकांना निर्माण झाली. ज्याचं रूपांतर काही दिवसांनी व्यसन लागल्याप्रमाणे झालं.
• अगदी आता दुकानात नवा फोन विकत घ्यायला गेल्यास दुकानदार दुसऱ्या सुविधांऐवजी ह्यात पब्जी चांगलं चालतय घ्या हेच असे सांगून ग्राहकांना फोन्स विकत आहेत!
• पब्जी मोबाइलतर्फे अधिकृत पत्रक काढून पुढील गोष्टी सांगण्यात आल्या आहेत कि आम्ही पालक, शिक्षक व सरकारी संस्थांसोबत पूर्णपणे शहरी करण्यास तयार आहोत त्यानुसार गेममध्ये योग्य त्या टूल्स/पर्यायांचा समावेश केला जाईल व त्याप्रमाणे गेममध्ये सुधारणा केल्या जातील.
• गेम खेळण्यावर इतर कोणी बॅन लावण्यापेक्षा प्रत्येकाने स्वतःला काही वेळेसंबंधी बंधने घालायला हवी आहेत. आजूबाजूच भान ठेवून अशा गोष्टी वापरायला हव्यात…

आता जगभरातील एकंदर गेमिंग विश्वाचं चित्र पाहिलं तर हि गेम भारतातच फार लोकप्रिय झाली आहे. एकूण क्षेत्राचा विचार करता भारतात अजूनही कॉन्सोल गेमिंग किंवा पीसी गेमिंग बाल्यावस्थेत आहे म्हणायला हरकत नाही. त्यात गेम्स विकत ना घेता टोरेंटवरून डाउनलोड करून पायरसीला देण्यात येणारं प्राधान्य नेहमीची गोष्ट झाली आहे. तसे पाहता गेमिंगमधील उलाढाल सुद्धा कोटींच्या घरात आहे. मात्र आपल्याकडं त्या दृष्टीने प्रमाण कमी आहे. त्यात असा मोफत पर्याय उपलब्ध झाला की तो अचानक फार गाजतो. उदा. क्लॅश ऑफ क्लॅन्स, कॅडी क्रश (ज्याचंही अनेकांना व्यसन लागलं होतं!) पण यानंतर व्यसन लागणं किंवा प्रमाणबाहेर वेळ घालवण यासाठी गेम्सना दोषी धरता येणार नाही. काहीही झालं तरी ते मनोरंजनाच साधन आहे. बर्‍याच देशांमध्ये तर गेमिंगलाही अधिकृत खेळाचा दर्जा देण्यात आला आहे! अनेक जण करियरसाठीही हा पर्याय निवडत आहेत. मात्र सद्य स्थितीत भारतात असं वातावरण निर्माण होणं सहजशक्य नाहीच…

गेली सलग आठ वर्षं संगीत आणि चित्रपट या क्षेत्रांच्या एकत्रित उत्पन्नाहून अधिक उत्पन्न गेमिंग इंडस्ट्री मिळवते आहे!

या पार्श्वभूमीवर गेम्सना सरसकट बॅन करणं चुकीच आहे असं मत मांडत आहोत कारण ते प्रत्येकाच स्वातंत्र्य आहे की कम्प्युटर/फोन्सवर कुठली गोष्ट वापरावी/पहावी… अशावेळी गेमिंग म्हणजे वाईटच असं जुनं गृहीतक धरून चालू नये. अनेक शास्त्रीय संशोधनांनुसार गेम्समुळेही मेंदू तल्लख राहण्यास मदत होत असल्याच समोर येत असतंच (उदा. माइनक्राफ्ट). मात्र त्याचवेळी अशा गेम्समुळे काही प्रमाणात हिंसक वृत्तीही वाढीस लागत असल्याच काही जणांचं मत आहे… याचा अर्थ असाही नाही की त्या गेम्सच्या वापरामुळे सामाजिक समतोल बिघडतोच. हे भान ज्याचं त्यानं पाळायला हवं आहे की विद्यार्थी असतील तर त्यांच्या पालकांनी लक्ष ठेवणं हट्ट करत असतील तर त्यांना तसं समजावणं हे पालकांच त्या त्या वेळी इतर गोष्टींसोबत कर्तव्य म्हणता येईल. कोणतीही गोष्ट अति प्रमाणात केली की तिचा शेवट वाईट होतो हे आपणा सर्वांना ठाऊक असेलच…

पब्जी मोबाइलने खास भारतीय गेमर्ससाठी सहा तासांची मर्यादा घालण्याचा निर्णय घेतला असून बर्‍याच यूजर्सना वर दाखवल्याप्रमाणे बॅनर दिसू लागला आहे.

या लेखामध्ये अजूनही काही मुद्दे जोडले जाऊ शकतात. गेमिंगसंबंधित ही माहिती पोहचण्यासाठी हा लेख नक्की शेअर करा…

The post पब्जी मोबाइलला १ वर्ष पूर्ण! : बॅनची मागणी कितपत योग्य? appeared first on MarathiTech - मराठीटेक.

मागील वर्षी गूगल तर्फे सादर करण्यात आलेले फॅमिली लिंक फॉर पेरेंट्स अॅप आता भारतात उपलब्ध झाले आहे. मुलांना मोबाईल किती वेळ वापरता येईल, कोणते ॲप इन्स्टॉल करता येतील त्याचबरोबर आपल्या पाल्याचा मोबाईल झोपण्याच्या वेळे दरम्यान लॉक करणे, मोबाईल वापरासाठी ठराविक वेळेचे बंधन लावणे यांसारख्या सुविधांचा यामध्ये समावेश आहे. मोबाईलचे लोकेशन तसेच मुलांनी कोणत्या अॅपवर किती वेळ घालवला आहे अशा गोष्टी सुद्धा याद्वारे समजणार आहेत.

प्रथम पुढील लिंक वरून आपणास फॅमिली लिंक फोर पेरेंट्स हे ॲप डाउनलोड करावे लागेल. यानंतर साइन अप करताना जर आपल्या पाल्याचे गूगल अकाउंट नसेल तर ते उघडावे लागेल. अकाउंट उघडण्याची प्रक्रिया पूर्ण केल्यानंतर काही स्टेप्स पार पाडाव्या लागतील व यानंतर फॅमिली लिंक आपोआपच पाल्याच्या मोबाईलवर डाऊनलोड केले जाईल. फॅमिली लिंक ॲप वापरण्यासाठी पाल्याच्या मोबाईलमध्ये नुगट व त्यापुढील अँड्रॉइड व्हर्जन असणे आवश्यक आहे. तसेच लॉलीपॉप व मार्शमेलो  व्हर्जनवर वापरण्यासाठी हेल्प सेंटर मधील माहिती पाहू शकता.

फॅमिली लिंक ॲपच्या माध्यमातून खालील गोष्टी करता येतील :-

• स्क्रीन टाईम त्याचबरोबर बेडटाइमची वेळ ठरवणे. 
• आपल्याकडील ॲपच्या माध्यमातून डिवाइस लॉक करणे. 
• पाल्याचे लोकेशन जाणून घेणे. 
• ऍक्टिव्हिटी रिपोर्ट पाहणे यामध्ये आवडत्या अॅपवर किती वेळ गेला आहे हे समजेल. 
• एखादे ॲप डाऊनलोड करण्यासाठी अनुमती देणे किंवा नको असलेले ब्लॉक करणे.
• एखादे शैक्षणिक ॲप सुचवणे

टेक्नॉलॉजीचा योग्य वापर पाल्यांकडून व्हावा त्याचबरोबर अतिवापर सुद्धा होऊ नये यासाठी अनेक पालक आग्रही असतात त्यासाठीच आम्ही फॅमिली लिंक हे ॲप सादर केले आहे जेणेकरून मुलांनी टेक्नॉलॉजीचा वापर करताना त्यावर नियंत्रण सुद्धा ठेवता येईल असे गुगल तर्फे सांगण्यात आले आहे. या अॅपच्या माध्यमातून पूर्णपणे नियंत्रण ठेवता येत नसले तरीसुद्धा काही कारणास्तव मुलांना द्याव्या लागणाऱ्या मोबाइल वापरावरील नियंत्रणासाठी याचा नक्कीच फायदा होऊ शकतो. भारतासोबतच इतर अनेक देशांत सुद्धा हे अॅप उपलब्ध असेल.

फॅमिली लिंक बद्दल आणखी माहितीसाठी – https://families.google.com/familylink/

अधिकृत माहिती : Helping more families set digital ground rules with Family Link

The post गूगलचं पालकांसाठी नवं फॅमिली लिंक अॅप : मुलांच्या ऑनलाइन वेळेवर लक्ष ठेवणं सोपं! appeared first on MarathiTech - मराठीटेक.

यूट्यूब अनेकांसाठी व्हिडिओ पाहण्याचे प्रमुख माध्यम, अनेकांचा बऱ्यापैकी वेळ यावर जातोच. गाणी, विनोदी कार्यक्रम, मदतीसाठी, एखादी गोष्ट कशी करायची असे किमान ४-५ व्हिडिओज सहज पाहिले जातातच.
मे मध्ये झालेल्या गूगल I/O मध्ये गूगलने काही टूल्स सादर केले होते जेणेकरून लोकांना तंत्रज्ञान वापराबद्दल माहिती मिळावी व यामुळे महत्वाच्या गोष्टींवर लक्ष केंद्रित करता यावं. त्याचाच एक भाग म्हणून गूगलने आता यूट्यूब अॅप वापराबाबत सर्व टूल्स एकाच ठिकाणी उपलब्ध करून दिले आहेत. ज्याद्वारे आपण किती वेळ व्हिडिओ पाहिले आहेत? याबद्दल माहिती मिळवता येईल तसेच वेळेवर नियंत्रण ठेवण्यासाठी रिमाइंडर लावण्याची सोय, नोटिफिकेशन्सचा आवाज बंद करणे, अनेक ऐवजी एकच नोटिफिकेशन यांचा समावेश आहे.

तुम्ही प्रत्यक्षात किती वेळ व्हिडिओ पाहिले?
तुमचा किती वेळ यूट्यूबवर व्हिडिओ पाहण्यात गेला हे प्रोफाइल मध्ये पाहता येणार आहे. दररोजच्या वेळेसोबतच मागील सात दिवसांमध्ये किती वेळ व्हिडिओ पाहण्यात घालवला हे सुद्धा याद्वारे समजणार आहे. खालीलप्रमाणे तुमची  प्रोफाइल पाहण्यासाठी प्रथम अकाउंटवर जावे लागेल (उजव्या कोपऱ्यामध्ये आयकॉनवर क्लिक करून)  यानंतर Time Watched वर क्लिक करून आपण प्रोफाइल पाहू शकता .
Account icon > Time Watched

ब्रेक घेण्यासाठी स्वतःला आठवण करून द्या
यूट्यूबवर जाणारा वेळ आपणास समजल्यानंतर वेळ कमी करण्यासाठी लिमिट_सुद्धा लावता येणार आहे. यासाठी Remind me to take a break वर क्लिक करून वेळ नोंदवता येईल. यानंतर आपण सेट केलेल्या वेळेवर यूट्यूब आपणास आठवण करून देईल.

याव्यतिरिक्त यूट्यूबकडून येणाऱ्या अनेक नोटिफिकेशन्स ऐवजी आपण दिवसातून एकदाच सर्व नोटिफिकेशन्स मिळविण्याचा पर्याय निवडू शकता. यानंतर यू ट्यूब सर्व नोटिफिकेशन्स एकत्र करून दाखवेल.
नोटिफिकेशन साऊंड बंद करण्यासाठी पर्याय_सुद्धा यामध्ये आहे जेणेकरून नोटिफिकेशन्समुळे आपले कामावरून लक्ष विचलित होणार नाही.

यावर्षी आलेल्या अँड्रॉइड ९ पायमध्ये Digital Wellbeing For Android चा समावेश असून आपण कोणत्या अॅपमध्ये किती वेळ घालवत आहोत हे पाहता येणार आहे. काही दिवसांपूर्वी फेसबुक, इंस्टाग्रामवर  जाणार्‍या वेळेचं नियोजन करण्यासाठी सुद्धा त्यांच्यातर्फे टूल्स उपलब्ध करून देण्यात आले असून याबद्दल अधिक माहितीसाठी येथे क्लिक करा.

The post आता यूट्यूबवर जाणारा वेळ नियंत्रित करण्याची सोय : रोज किती वेळ जातो हे पहा! appeared first on MarathiTech - मराठीटेक.

फेसबुक, इंस्टाग्राम ही अॅप्स आता दैनंदिन वापराचा भाग झाली आहेत. व्हॉट्सअॅप इतका नसला तरी अनेकांचा बऱ्यापैकी वेळ या दोन अॅप्सवर सुद्धा जातोच. एकत्रित वेळ विचारली तर बरेच जण एका तासाच्या आसपास असेच उत्तर देतील मात्र प्रत्यक्षात वारंवार फोन तपासलेला वेळ गृहीत धरला तर ही वेळ नक्कीच तासापेक्षा अधिक असेल! कोणी लाईक केलं का? काय कमेंट केली? नवा फॉलोअर कोण आहे? कुणाची रिक्वेस्ट आली आहे? असा प्रश्न ह्या नोटिफिकेशन्स पाहून पडतो आणि मग फोन उघडून आपल्याकडून ते अॅप पाहिलं जातंच!

आता यावर फेसबुक आणि इंस्टाग्राम (ज्याची मालकी फेसबुककडेच आहे.) यांनी नवी टूल्स उपलब्ध करून दिली असून ज्याद्वारे आपण आपल्या वेळेवर लक्ष ठेऊ शकतो! अलर्टस लावून आपला वेळ वाचवू शकतो! नोटिफिकेशनवर नियंत्रण, डॅशबोर्ड जो अॅप वापरल्याची वेळ दर्शवेल अशा सुविधा देण्यात आल्या आहेत!

• Your Activity: इंस्टाग्रामवर घालवलेला वेळ पाहण्यासाठी त्या त्या दिवशीच्या बार वर टॅपकरून पहा.
• Daily Reminder: याद्वारे रोज एक आठवण करून देण्यासाठी अलर्ट जोडता येईल!
• Mute Push Notifications: ‘Notification Settings’ मध्ये जाऊन ‘Mute Push Notifications’ सुरु केल्यास नोटिफिकेशन्स बंद करण्यात येतील.

ज्यावेळी वापरकर्ते फेसबुक आणि इंस्टाग्राम वापरतील तेव्हा त्यांचा वेळ चांगल्या कामासाठी खर्च झाला असं वाटलं पाहिजे : अमित रणदीवे (इंस्टाग्रामचे प्रॉडक्ट डायरेक्टर)

या संबंधित रोलआऊट सुरु झालं असून हळूहळू ह्या सुविधा सर्वाना उपलब्ध करून देण्यात येतील. प्रोफाइल मध्ये जाऊन Your Activity मध्ये हे बदल पाहता येतील. प्ले स्टोरवर हे अपडेट उपलब्ध झालेलं आहे.

search terms facebook instagram time management your activity how to use

The post फेसबुक, इंस्टाग्रामवर जाणार्‍या वेळेचं नियोजन करण्यासाठी आता टूल्स उपलब्ध! appeared first on MarathiTech - मराठीटेक.