ब्ल्यु ऑरिजिन (Blue Origin) या स्वतःच्या कंपनीच्या New Shepard रॉकेटमार्फत जेफ बेझोस, त्यांचा भाऊ मार्क बेझोस, ८२ वर्षीय वॉली फंक आणि १८ वर्षीय ऑलिव्हर ज्याने तिकीट घेतलं होतं अशा चौघांनी आज अंतराळ प्रवास केला आहे. यावेळी त्यांनी जवळपास १०६ किमी ऊंची गाठली होती जी काही दिवसांपूर्वी झालेल्या व्हर्जिन गॅलॅक्टिकपेक्षा १६ किमी अधिक होती. यावेळी त्यांनी जिथून अंतराळ सुरू होतं असं मानण्यात येतं अशी Karman रेषा सुद्धा ओलांडली! त्यांच्या एकूण प्रवासाची वेळ जवळपास १० मिनिटे होती.

या उड्डाणासाठी आजची तारीख निवडण्याचं कारण म्हणजे आजच्याच दिवशी १९६९ मध्ये नील आर्मस्ट्रॉंग आणि बझ आल्ड्रिन यांच्यामार्फत चंद्रावर पहिल्यांदा मानवी पाऊल पडलं होतं!

या प्रवासात Wally Funk या ८२ वर्षीय महिला अंतराळवीराचाही समावेश होता. १९६० च्या आसपास खास महिलांसाठी अवकाश मोहीम आखण्यात आली होती. जवळपास १३ महिलांमध्ये पुरुष पार करत असलेल्या सर्व टेस्ट पूर्ण करून वॉली यांचा समावेश करण्यात आला होता मात्र नंतर ही मोहीम रद्द करण्यात याली होती. यामुळे अवकाशात जाण्याचं स्वप्न अपूर्ण राहिलेल्या वॉली यांना आज संधी मिळाली होती आणि त्यानुसार त्यांनी त्यांचा प्रवास पूर्ण सुद्धा केला आहे! या निमित्ताने त्या जगातील सर्वात वृद्ध अंतराळवीरसुद्धा ठरल्या आहेत.

जेफ बेझोस, त्यांचा भाऊ मार्क बेझोस आणि वाली फंक यांच्यासोबत एक १८ वर्षीय तरुण सुद्धा सहभागी होता. Oliver Daemen याने एका अज्ञात व्यक्तीची जागा घेत प्रवास केला. त्या अज्ञात व्यक्तीने बोलीमध्ये चक्क 28 मिलियन डॉलर्स म्हणजे जवळपास २०९ कोटी मोजून या प्रवासाचं तिकीट विकत घेतलं होतं. मात्र त्याने वेळेच्या अडचणीमुळे नंतरची तारीख निवडली ज्यामुळे ऑलिव्हरच्या वडलांनी त्यापेक्षा कमी पण जाहीर न करण्यात आलेल्या किंमतीत आजचा प्रवास केला आहे. यामुळे ऑलिव्हर त्यांचा पहिला ग्राहक ठरला शिवाय तो सर्वात तरुण अंतराळवीरसुद्धा बनला आहे!

काही दिवसांपूर्वीच व्हर्जिन या ब्रिटिश कंपनीचे प्रमुख असलेले ७० वर्षीय रिचर्ड ब्रॅन्सन यांनी व्हर्जिन गॅलॅक्टिक कंपनीच्या अवकाशविमानातून प्रवास करत स्वतःच्याच स्पेसशिप मार्फत प्रवास करणारे पहिले व्यक्ती ठरण्याचा मान मिळवला होता.

अवकाश पर्यटनासाठी आता पर्याय उपलब्ध होताना दिसत असून याद्वारे तुम्ही तुमची जागा आरक्षित करून अवकाशात प्रवास करून पृथ्वीगोल पाहून Weightlessness चा अनुभव घेऊन पृथ्वीवर परत येऊ शकता.

The post ॲमेझॉन संस्थापक जेफ बेझोस यांचा अवकाश प्रवास यशस्वी! appeared first on MarathiTech - मराठीटेक.

पुस्तके ऑनलाइन विकण्यासाठी सुरुवात झालेल्या ॲमेझॉनला जगातली आघाडीची कंपनी बनवून आता २०२१ च्या शेवटी ॲमेझॉन संस्थापक जेफ बेझोस (Jeff Bezos) सीईओ पदाचा राजीनामा देणार आहेत असं काल जाहीर करण्यात आलं आहे. १९९४ पासून २०२१ पर्यंत ॲमेझॉनचे प्रमुख असलेले जेफ बेझोस सीईओ पद सोडणार असून त्यांच्या जागी सध्या AWS (ॲमेझॉन वेब सर्विसेस)चे सीईओ असलेले अँडी जॅसी (Andy Jassy) यांची नियुक्ती करण्यात आली आहे.

ॲमेझॉन आता अनेक देशात पसरलेली सर्वात मोठी ऑनलाईन शॉपिंग वेबसाईट असून त्यांचं आता १.७ ट्रिलियन डॉलर्सचं भलं मोठं बाजारमूल्य आहे. एव्हढ्या मोठ्या कंपनीचा निर्माता म्हणून २७ वर्षे कार्यभार जेफ बेझोस यांनी सांभाळला. काही महिन्यांपूर्वीच त्यांनी अनेक वर्षं सर्वात श्रीमंत असणाऱ्या बिल गेट्सना मागे टाकत जगात सर्वात श्रीमंत बनण्याचा बहुमानसुद्धा मिळवला होता. (काही दिवसांपूर्वी इलॉन मस्कने त्यांना मागे टाकलं आहे). जेफ यांकडे त्यांच्या कारकिर्दीत ॲमेझॉन, ट्वीच, IMDb, Whole Foods, Washington Post, Blue Origin, Zappos, Alexa, DPReview, Fabric.com, Goodreads, Audible अशा काही स्वतःच्या तर काहींचं अधिग्रहण केलेल्या कंपन्यांची मालकी आहे!

ते सीईओपदाचा राजीनामा देत असले तरी कंपनीवरच्या नियंत्रणात फरक पडणार नाही असं दिसत आहे. त्यांचा कंपनीमध्ये १०.६ टक्के हिस्सा असून ते बोर्ड ऑफ डायरेक्टर्सचे सदस्य आहेतच. सगळ्यात मोठे शेयरहोल्डर असल्यामुळे साहजिकच सूत्र त्यांच्याच हाती राहतील फक्त ॲमेझॉनमधील दैनंदित कामातून त्यांना इतर गोष्टींसाठी वेळ काढता येईल. त्यांनी आता नवी उत्पादने आणि इतर उपक्रमांकडे लक्ष देणार असल्याचं जाहीर केलं आहे. Day 1 Fund, the Bezos Earth Fund, Blue Origin, The Washington Post आणि इतर संस्थांकडे वेळ देण्यासाठी हा निर्णय घेतला असल्याचं त्यांनी सांगितलं आहे.

The post ॲमेझॉन संस्थापक जेफ बेझोस सीईओ पदाचा राजीनामा देणार! appeared first on MarathiTech - मराठीटेक.

मायक्रोसॉफ्ट संस्थापक बिल गेट्स यांनी जगातल्या सर्वात श्रीमंत स्थानी पुन्हा एकदा स्थान मिळवलं आहे. अॅमेझॉनचे संस्थापक जेफ बेझोसना मागे टाकत त्यांनी अनेक वर्षं भूषवलेला हा बहुमान परत मिळवला आहे. गेली दोन वर्षे ते ह्या स्थानी येऊ शकले नव्हते. काही दिवसांपूर्वीच जाहीर झालेल्या मायक्रोसॉफ्टच्या पेंटागॉनसोबतच्या भागीदारीमुळे बिल गेट्स यांच्या संपत्तीत पुन्हा वाढ झाली आहे. हा करार तब्बल 10 बिलियन डॉलर्सचा (जवळपास ७२००० कोटी रुपये) आहे. हाच करार अॅमेझॉनसोबत न झाल्यामुळे त्यांचे शेयर्स घसरून जेफ बेझोस यांची संपत्ती कमी झाली आहे. यामुळे काही फरकाने का होईना बिल गेट्स पुन्हा एकदा सर्वात श्रीमंतपदी पुन्हा विराजमान झाले आहेत.

सलग २४ वर्षे सर्वात श्रीमंत असलेल्या बिल गेट्स यांना जेफ बेझोसनी काही महिन्यांपूर्वीच मागे टाकलं होतं. त्यावेळी जेफ बेझोस यांची संपत्ती बिल गेट्स यांच्या तुलनेत बरीच वाढली होती. मात्र मध्यंतरी जेफ बेझोस यांचा त्यांच्या पत्नीसोबत (मॅकेन्झी बेझोस) घटस्फोट झाल्याने अॅमेझॉनमधील त्यांचा बराच हिस्सा त्यांच्या पत्नीच्या नावे केला गेला आहे. त्यामुळे आधी इथे संपत्ती कमी झाली आणि नंतर काही प्रमाणात अॅमेझॉनद्वारे अपेक्षेपेक्षा कमी झालेला फायदा कारणीभूत ठरले आहेत.गेल्या वर्षीच्या तुलनेत ह्या काळात ४८ टक्के कमी फायदा पाहायला मिळाला आहे.

दरम्यान मायक्रोसॉफ्टचे शेयर्स यावर्षी ४८ टक्क्यानी वधारले आहेत! यामुळे बिल गेट्सना जेफ बेझोसना मागे टाकणं सोपं गेलं. मात्र बिल गेट्स सध्या मायक्रोसॉफ्टमध्ये कोणत्याही पदावर काम करत नसून ते त्यांचा वेळ प्रामुख्याने सामाजिक कार्यात देत आहे. आत्ता जेफ बेझोस यांची संपत्ती 108.7 बिलियन डॉलर्स असून बिल गेट्स यांची 110 बिलियन डॉलर्स एव्हढी आहे. पेंटागॉनच्या करारासंबंधी बातमी आल्यापासून मायक्रोसॉफ्टचे शेयर्स ४ टक्क्यानी वाढले आहेत तर अॅमेझॉनचे २ टक्क्यानी घसरले आहेत!

बाकी या यादीत फेसबुक संस्थापक मार्क झकरबर्ग पाचव्या स्थानी तर गूगलचे संस्थापक लॅरी पेज आणि सर्गे ब्रिन अनुक्रमे सातव्या आणि आठव्या स्थानी आहेत. भारतातून मुकेश अंबानी यांनी या यादीत वर स्थान मिळवलं असून आता ते चौदाव्या क्रमांकावर आहेत.

The post बिल गेट्स पुन्हा जगात सर्वात श्रीमंत : जेफ बिझोसना मागे टाकलं! appeared first on MarathiTech - मराठीटेक.