सोशल मीडिया कंपनी फेसबुकने आज भारतीय टेलीकॉम कंपनी रिलायन्स जिओमध्ये ४३५७४ कोटींची गुंतवणूक करून कंपनीमध्ये ९.९९ टक्के हिस्सा/समभाग मिळवला आहे. सध्या भारतातली सर्वात मोठी टेलीकॉम कंपनी असलेल्या जिओमध्ये फेसबुकने केलेली ही गुंतवणूक महत्वपूर्ण आहे. जिओचं एकूण भागभांडवल आता ४.६२ लाख कोटींवर गेलं आहे! गेल्या काही महिन्यात याबद्दल चर्चा सुरू होती आणि आज हे अधिकृतरित्या जाहीर करण्यात आलं आहे. फेसबुक संस्थापक मार्क झकरबर्ग आणि रिलायन्स प्रमुख मुकेश अंबानी यांनी याबद्दल व्हिडिओ प्रकाशित करून माहिती दिली आहे.

आमची भारताप्रती असलेली वचनबद्धता याद्वारे अधोरेखित करत असून जिओने आणलेल्या नाट्यमय बदलांमुळे आम्ही यासाठी उत्सुक आहोत असं फेसबुकतर्फे एका ब्लॉग पोस्टमध्ये सांगण्यात आलं आहे. प्रामुख्यानं आमचं ध्येय भारतात अधिकाधिक लोकांना नवनवी तंत्रज्ञान द्वारं खुली करून देणं आहे असंही त्यांनी सांगितलं आहे. याद्वारे बहुधा त्यांचं लक्ष लहान उद्योगांकडे असेल असं दिसत आहे. बिझनेस टूल्सचा वापर वाढावा असा उद्देश दिसून येतोय.

जिओमार्ट या काही महिन्यांपूर्वी सुरू झालेल्या सेवेची उपलब्धता व्हॉट्सअॅपद्वारे असणार आहे. यामुळे देशातील लहान उद्योगांना विक्रीसाठी नवा प्लॅटफॉर्म मिळणार असून व्हॉट्सअॅपद्वारेच त्यांना विविध उत्पादने विकता येणार आहेत. आपल्या जवळच्या किराणा दुकानदाराशी जिओमार्ट भागीदारी करून व्हॉट्सअॅपद्वारे त्या ऑर्डर्स मॅनेज करेल असं एकंदरीत चित्र आहे. अॅमेझॉन, फ्लिपकार्टसारख्या ऑनलाइन विक्रेत्याना स्पर्धा निर्माण करण्याच्या दृष्टीने अंबानींचं आणखी एक पाऊल म्हणता येईल. या जिओमार्टद्वारे ग्राहकांना मोबाइल शॉपिंगसाठी सोपा पर्याय देण्याचा प्रयत्न आहे. मार्क झकरबर्गनेही त्यांच्या व्हिडिओमध्ये नव्या प्रोजेक्ट्सद्वारे येणाऱ्या कॉमर्स संधीबद्दल बोललं आहे.

अपडेट २७-०४-२०२० : जिओमार्टची सेवा नवी मुंबई, कल्याण, ठाणे अशा भागात सुरू झाल्याची माहिती मिळत आहे. अनेकांनी ऑर्डरसुद्धा केल्या आहेत.  8850008000 हा फोन क्रमांक सेव्ह करून व्हॉट्सअॅपद्वारे किराणा खरेदी करता येईल. मात्र सध्या होम डिलिव्हरी सुरू झालेली नाही याची नोंद घ्यावी तुम्हाला जिओमार्टसोबत भागीदारी असलेल्या जवळच्या किराणा दुकानात जाऊन आणावं लागेल. पैसेसुद्धा दुकानात जाऊन द्यावे लागणार आहेत. थोडक्यात या ऑनलाइन ऑर्डरला सध्यातरी काही अर्थ नाही.  

या गुंतवणुकीमुळे जिओवरील आर्थिक भार किंवा त्यांच्यावरील कर्जाचं ओझं कमी होईल. शिवाय फेसबुकलाही भारतात हातपाय पसरण्यास मदत होईल त्यामुळे दोघांसाठी ही गुंतवणूक फायदेशीरच ठरणार आहे. आता प्रश्न राहिला ग्राहकांचा तर विविध ऑफर्सद्वारे ग्राहक ओढून घेण्याला आतासुद्धा ग्राहक प्रतिसाद देतीलच. मात्र फेसबुकची सध्याची इमेज बघता प्रायवसीबद्दल शंका मनात येतातच. अनेकांनी त्या सोशल मीडियावर मांडल्या देखील आहेत. आपल्या दैनंदिन गोष्टी काही ठराविक कंपनीकडेच घडत असतील आणि त्याचा सर्व डेटा त्यांना वापरण्यास मिळत असेल तर ती गोष्ट ग्राहकांना नक्कीच चांगली नाही मात्र भारतात या गोष्टींकडे नेहमीप्रमाणे दुर्लक्ष केलं जाणार आहे हे स्पष्ट आहे…किमान या कंपन्या या प्रोजेक्ट्सच्या निमित्ताने त्यांच्यामध्ये काही बदल करतील अशी निरर्थक आशा बाळगण्यास हरकत नाही.

• मार्क झकरबर्गची पोस्ट : facebook.com/zuck/posts/10111830591845901
• मुकेश अंबानी यांचा व्हिडिओ : https://youtu.be/3QQpYV37OWM

The post फेसबुकची रिलायन्स जिओमध्ये तब्बल ४३५७४ कोटींची गुंतवणूक! appeared first on MarathiTech - मराठीटेक.

रिलायन्स जिओ आता सर्वाना माहीत असलेलं नाव झालं आहे. स्वस्त 4G इंटरनेट सेवा उपलब्ध करून दिल्यामुळे लाखो लोकांनी त्यांचे जुने ऑपरेटर्स सोडून जिओचा पर्याय स्वीकारला आहे. आता मोबाइल सेवानंतर त्यांनी इतर सेवा सुद्धा उपलब्ध करून दिल्या आहेत जसे की जिओ गिगाफायबर, ब्रॉडब्रॅंड, जिओ फोन, जिओफाय, जिओ टीव्हीसारखे अॅप्स, इ. सध्या जोमत असलेलं असं एकच क्षेत्र जिओसाठी राहिलं होतं ते म्हणजे इ कॉमर्स/ऑनलाइन शॉपिंग. काही महिन्यांपूर्वी याची पुसटशी कल्पना देण्यात आली होती. आता मात्र याची चाचणी सुरू होऊन ग्राहकांना जिओ मार्ट उपलब्ध झालं असल्याचं पाहायला मिळत आहे. सध्यातरी काही मर्यादित ठिकाणीच जिओ मार्टच्या अॅपची सेवा सुरू करण्यात आली आहे. मात्र उपलब्ध सेवेच्या स्वरूपावरून ही सेवा फ्लिपकार्ट व अॅमेझॉनला चांगला पर्याय निर्माण करेल असं दिसत आहे.

Jio Mart सेवा सध्या चाचणी दरम्यान नवी मुंबई, ठाणे आणि कल्याण या तीनच शहरांत उपलब्ध करून दिली आहे. या जिओ मार्टद्वारे ३ कोटी ऑफलाइन विक्रेत्याना जोडून २० कोटी घरांसोबत जोडलं जाण्याचा रिलायन्सचा मानस आहे! JioMart रिलायन्स रिटेलच्या छायेत काम करणार असून रिलायन्स रिटेल ही सेवा रिलायन्स इंडस्ट्रीज लिमिटेड (RIL) चा प्रमुख भाग आहे. सध्या रिलायन्स नोंदणी करून घेत असून ५०००० हून अधिक किराणा मालाच्या वस्तू घरपोच केल्या जातील तेही मोफत होम डिलिव्हरीसह! कमीतकमी खरेदीची मर्यादाही नाही. शिवाय वस्तु आवडली नाही तर रिटर्न करता येतील आणि तुम्हाला कोणताही प्रश्न विचारला जाणार नाही! या सेवेमुळे किमान किराणा/ग्रोसरी वस्तूंबाबत तरी फ्लिपकार्ट व अॅमेझॉनलासोबत लगोलग आव्हान उभं करू शकेल! Mint वेबसाइटच्या माहितीनुसार तर रिलायन्स जिओद्वारे काही यूजर्सना आमंत्रित केलं जात आहे आणि सुरुवातीच्या ग्राहकांना त्यांच्या JioMart अकाऊंटवर ३००० रुपये दिले जात आहेत!

https://www.jio.com/jiomart

JioMart द्वारे स्थानिक विक्रेत्याना ग्राहक मिळवून दिले जातील अशी माहिती देण्यात आली आहे! फ्लिपकार्ट व अॅमेझॉन आणि JioMart यांच्यात या बाबतीतच एक प्रमुख फरक राहणार आहे. या दोघांप्रमाणे स्वतःच वेयरहाऊस बांधण्यापेक्षा जिओमार्ट स्थानिक विक्रेत्याकडून वस्तु घेणार आहे. या पद्धतीला ऑनलाइन टू ऑनलाइन (O2O) असंही म्हटलं जातं. यामुळे स्थानिक विक्रेत्यांनाही फायदाच होणार असून त्यांच्या व्यवसायाला ऑनलाइन विक्रीमुळे होणारं नुकसान स्वतःच ऑनलाइन विक्री प्रक्रियेचा भाग झाल्यावर कमी होणार आहे.

जिओमार्टची सुरुवातीला थेट स्पर्धा Amazon Prime Now सोबत होईल. यासाठी जिओने CSquare या सॉफ्टवेअर कंपनीसोबत भागीदारी केली असून ही कंपनी इ कॉमर्स, विक्रेते यांना विविध सॉफ्टवेअर पर्याय उपलब्ध करून देते. शिवाय गेल्या वर्षीच Grab A Grub या कुरियर सेवेसंबंधित कंपनीचंही अधिग्रहण त्यांनी केलं आहे!

Search Terms : Reliance Jio JioMart E Commerce Online Shopping Website App Offers Grocery Products with Savings Upto 3000 at launch

The post जिओ मार्ट : आता रिलायन्स जिओची ऑनलाइन शॉपिंग सेवा उपलब्ध! appeared first on MarathiTech - मराठीटेक.