गूगलने काही दिवसांपूर्वी त्यांच्या AI चॅटबॉट Bard मध्ये ४० हून अधिक भाषांचा समावेश केला असून यामुळे आता आपण या AI सोबत मराठीत बोलून माहिती मिळवू शकता! आता मराठीसह हिंदी, तमिळ, तेलुगू, बंगाली, कन्नड, मल्याळम, गुजराती अशा भारतीय भाषांचा सपोर्ट उपलब्ध झाला आहे.

गूगलचा Bard AI वापरण्यासाठी लिंक : https://bard.google.com

अलीकडेच ChatGPT नेसुद्धा भारतीय भाषांना सपोर्ट उपलब्ध करून दिला आहे. आता या दोन्ही सर्वाधिक वापरल्या जाणाऱ्या AI चॅटबॉटमध्ये मराठी वापरता येईल. या चॅटबॉट्सकडून तुम्हाला कोणत्याही प्रकारची माहिती मिळवू शकता. मिळालेली माहिती अपुरी वाटली तर अधिक स्पष्टीकरण मागू शकता. यासोनत गूगलने आता बार्डमध्ये इमेजेस अपलोड करण्याची सोय दिली आहे जेणेकरून त्या इमेज बद्दल अभ्यास करून त्यानुसार तुम्ही प्रश्न विचारू शकता!

मराठीत टाइप कसं करायचं याबद्दल आमचे व्हिडिओ पाहू शकता. Marathi Typing

सर्वच AI चॅटबॉटच्या खाली तुम्हाला एक तळटीप दिलेली दिसते ती म्हणजे AI द्वारे देण्यात आलेली माहिती कधी कधी चुकीची असू शकते. यामुळे हे लक्षात ठेऊनच याद्वारे मिळालेल्या माहितीचा उपयोग करा. माहितीबद्दल खात्री करून घेण्यासाठी गूगलवर स्वतंत्र सर्च करून विश्वासार्ह वेबसाइट्सवर पहा.

The post गूगलचा Bard AI आता मराठीतसुद्धा उपलब्ध! appeared first on MarathiTech - मराठीटेक.

आज आपण ॲपलच्या मॅकबुक, आयमॅकवर मराठीत टायपिंग कसं करायचं हे पाहणार आहोत. macOS Ventura या नव्या मॅकओएसमध्ये ही सोय देण्यात आली असून याद्वारे Transliteration पद्धतीने मराठी भाषेत टाइप करता येईल!

Transliteration मुळे टाइप करत असलेल्या शब्दांचं इंग्रजी स्पेलिंग लिहिलं की शब्द मराठीत टाइप होतो! उदा. तुम्ही या किबोर्डवर maharashtra असं स्पेलिंग टाइप केलं की महाराष्ट्र असं टाइप झालेलं दिसेल! यामुळे मराठीत टाइप करण्याचा वेग बऱ्याच पटीत वाढतो कारण आपल्याला कोणतं मराठी अक्षर कुठे आहे हे किबोर्डवर शोधत बसावं नाही.

सर्वात आधी तुमचा मॅकमध्ये नवी macOS Ventura इंस्टॉल केली आहे का ते पहा. त्यानंतर पुढील प्रमाणे कृती करा.

1. सेटिंग्स मध्ये जा
2. त्यानंतर Keyboard
3. आता Text Input मधील Edit वर क्लिक करा.
4. आता डाव्या कोपऱ्यात खाली + चिन्हावर क्लिक करा
5. आलेल्या यादीत marathi सर्च करा.
6. आता Marathi Transliteration A-अ हा पर्याय सिलेक्ट करा आणि Add वर क्लिक करा.
7. आता तुम्ही मराठी भाषेत टाइप करू शकता.

अधिक माहितीसाठी खालील व्हिडिओ पहा.

Search Terms : Apple MacBook Marathi Typing Marathi Fonts Keyboard macOS Ventura

The post नवा व्हिडिओ : ॲपल मॅकवर मराठीत टायपिंग! appeared first on MarathiTech - मराठीटेक.

अलीकडेच उपलब्ध झालेल्या iOS 16 अपडेटमध्ये ॲपलने स्वतः आयफोनवर transliteration साठी मराठी भाषेचा सपोर्ट उपलब्ध करून दिला आहे. यामुळे आता आयफोन्स व आयपॅडवरसुद्धा सहज सोप्या पद्धतीने मराठी भाषेत टाइप करता येईल.

Transliteration मुळे टाइप करत असलेल्या शब्दांचं इंग्रजी स्पेलिंग लिहिलं की शब्द मराठीत टाइप होतो! उदा. तुम्ही या किबोर्डवर maharashtra असं स्पेलिंग टाइप केलं की महाराष्ट्र असं टाइप झालेलं दिसेल! यामुळे मराठीत टाइप करण्याचा वेग बऱ्याच पटीत वाढतो कारण आपल्याला कोणतं मराठी अक्षर कुठे आहे हे किबोर्डकार शोधात बसावं नाही.

1. आयफोनच्या Settings मध्ये जा
2. आता General
3. त्यानंतर Keyboard
4. आता Keyboards
5. आलेल्या यादीत marathi सर्च करा
6. आता दोन पर्याय दिसतील त्यातील Transliteration हा पर्याय निवडा
7. आता हा किबोर्ड ॲड झाला आहे.
8. आता नोट्स किंवा इतर कोणत्याही app मध्ये जा
9. टॅप करताच आलेल्या किबोर्डच्या डाव्या कोपऱ्यात खाली असलेल्या आयकॉनला लाँग प्रेस करा
10. आलेल्या यादीत Marathi A→अ हा किबोर्ड निवडा
11. आता तुम्ही सोप्या पद्धतीने मराठी भाषेत टाइप करू शकता.

यापूर्वी उपलब्ध असलेला देवनागरी किबोर्डमध्ये थेट मराठी अक्षरेच किबोर्डवर दिसायची मात्र आता त्यासोबत हा नवा पर्याय उपलब्ध झाला आहे. तुमच्या आयफोन व आयपॅडमध्ये iOS 16 अपडेट डाउनलोड करून इंस्टॉल केलेलं असेल तरच हा नवा पर्याय तुम्हाला दिसेल. याला आधी Gboard चा पर्याय होता मात्र त्यालाही प्रत्येक शब्द टाइप केल्यावर सिलेक्ट करावा लागतो. आता अधिकृत ॲपलनेच हा सोपा पर्याय दिला आहे.

या नव्या मराठी किबोर्डबद्दल आम्ही आमच्या यूट्यूब चॅनलवरही एक व्हिडिओ प्रकाशित केला आहे.

हा व्हिडिओ तुमच्या आयफोन, आयपॅड वापरणाऱ्या मित्रमैत्रिणींसोबत नक्की शेयर करा.

The post आयफोनवर मराठी टायपिंग करणं आता सोपं झालंय! appeared first on MarathiTech - मराठीटेक.

लवकरच येणाऱ्या सणासुदीच्या पार्श्वभूमीवर ॲमेझॉनने ग्राहकांना मराठी भाषेचा पर्याय उपलब्ध करून दिला आहे. आता मराठीचा वापर करून ऑनलाइन खरेदी करू शकता अशी घोषणा ॲमेझॉन इंडियाने काही दिवसांपूर्वी केली आहे. इंग्रजी, हिंदी, कन्नड, तमिळ, तेलुगू, मल्याळम या भाषांनंतर ॲमेझॉन मराठी व बंगाली भाषेत वापरता येईल. गेल्या काही दिवसांपासून हा पर्याय ॲपवर उपलब्ध झालेला आहे.

यासंदर्भात अधिक माहिती देताना ॲमेझॉनने या नव्या उपक्रमांमुळे भाषेचा अडथळा दूर होत आहे आणि ई कॉमर्स भारतात लक्षावधी ग्राहकांसाठी उपलब्ध होत ते वापरणं सोयीस्कर होत आहे असं सांगितलं आहे. मराठी भाषेत सुरू करण्याच्या प्रक्रियेदरम्यान, ॲमेझॉनने प्रत्येक भाषेमध्ये अचूक व समजण्याजोगा यूजर अनुभव विकसित करण्यासाठी कुशल भाषातज्ज्ञांसोबत काम केले आहे. अचूक भाषांतर करण्याऐवजी टीमने अधिक वापरात असलेल्या संज्ञांचा वापर केला आहे, जेणेकरून खरेदीचा अनुभव अस्सल, समजण्यास सोपा आणि ग्राहकांसाठी सुखद व्हावा असं त्यांचं म्हणणं आहे!

२०२१ मध्ये तब्बल ५० लाख ग्राहकांनी भारतीय भाषांमध्ये ॲमेझॉनचा वापर करत खरेदी केली आहे! फेब्रुवारी २०२१ मध्ये ॲमेझॉनने त्यांची सेलर (Seller) रजिस्ट्रेशन सेवासुद्धा मराठीमध्ये आणली आहे जी मराठी भाषिक विक्रेत्याना ॲमेझॉनवर येण्यास मदत करेल.

गेले अनेक महिने अनेक मराठी ग्राहकांकडून ट्विटरवर यासंबंधी मागणी केली जायची. तमिळ, तेलुगू, कन्नड भाषाही जोडल्या गेल्या मात्र मराठी मात्र अजूनही जोडण्यात आली नव्हती. मराठीसाठी कार्य करणारे लोक आणि अनेक संघटनाही यासाठी प्रयत्नशील होत्या. गेल्या वर्षी दिवाळीपूर्वी महाराष्ट्र नवनिर्माण सेना या पक्षाच्या कार्यकर्त्याकडून याची मागणी करण्यात आली. यासाठी पक्षातर्फे अखिल चित्रे यांनी विशेष पुढाकार घेऊन फ्लिपकार्ट आणि ॲमेझॉन दोघांनाही याबद्दल निवेदन देऊन मागणी करण्यात आली. दोन्ही वेबसाइटच्या अधिकाऱ्यांनी दिवाळीनंतर समावेश करू असं आश्वासन दिलं.

फ्लिपकार्टवर ८ जानेवारीपासून मराठी भाषा उपलब्ध झाली होती. मात्र ॲमेझॉनने अजूनही चालढकल सुरूच ठेवली होती. सरते शेवटी २० तारखेला मराठी आणि बंगाली अशा दोन्ही भाषांचा समावेश करण्यात आला आहे.

महाराष्ट्रात सेवा पुरवणाऱ्या सर्वच कंपन्यांनी मराठी भाषेत सेवा द्यायलाच हवी. महाराष्ट्रच नव्हे तर पूर्ण देशात सर्वच राज्यांमध्ये त्या त्यात ठिकाणच्या राज्य भाषांचाच वापर प्रामुख्याने व्हायला हवा. सर्व्हिस सेंटर्स, कॉल सेंटर्समध्ये त्या त्या भाषांमधील पर्याय असल्यास अनेकांना ते वापरणं सोपं होणार आहे. मराठीत मागणी झाल्यामुळे मराठीच्या वाढीस हातभार लागून स्थानिक लोकांना संबंधित नोकऱ्या मिळण्यासाठी मदत होईल. यामागचं अर्थकारण लोक लक्षात घेऊन अधिकाधिक सेवांमध्ये मराठीची मागणी करून मराठीचासुद्धा वापर करतील असं चित्र दिसलं पाहिजे.

The post ॲमेझॉन आता मराठी भाषेत उपलब्ध : ऑनलाईन वस्तू खरेदी आता आणखी सोपी! appeared first on MarathiTech - मराठीटेक.

आज अनेक वर्षानंतर मराठीटेक या आपल्या तंत्रज्ञानविषयक माहिती देणाऱ्या वेबसाइटचा नवा लोगो, नवी ओळख आपल्या समोर आणत आहोत. बघता बघता आमच्या या वेबसाइटने दहा वर्षे पूर्ण केली असून आपल्या सारख्या वाचकांच्या प्रतिसादामुळे एव्हढया वर्षांचा मोठा प्रवास करणं शक्य झालं आहे.

बऱ्याच वर्षांपासून इंटरनेटवर माहिती पाहत असताना जवळपास सर्वच माहिती इंग्लिश मध्ये उपलब्ध असायची. यामधील ठराविक विषय तरी किमान आपल्या मायबोलीमध्ये वाचायला मिळायला हवे असं नेहमी वाटायचं. यासाठीच मराठीटेकची सुरुवात करताना २००८ मध्ये गूगलच्या ब्लॉगरवर marathitech ची नोंदणी केली होती. त्यानंतर यामधील काही तांत्रिक गोष्टी शिकत शिकत २०११ पासून नियमित लेख लिहिण्यास सुरुवात केली होती. आता नेमकी तारीख उपलब्ध नाही पण कालावधी नक्कीच दहा वर्षांपेक्षा अधिक पूर्ण झाला आहे आणि हे काही दिवसांपूर्वीच बोलता बोलता सहज लक्षात आलं. त्यामुळे या निमित्ताने गेली अनेक वर्षं न बदललेला आपल्या या वेबसाइटचा लोगो व डिझाईन बदलण्याचा निर्णय घेतला आणि आज तो प्रकाशित करत आहोत… नव्या लोगोसोबत आम्ही अधिकाधिक माहितीपूर्ण लेख, सोशल मीडिया पोस्ट्स, व्हिडिओ आणण्याचा प्रयत्न करणार आहोत… 

नवा लोगो मराठीटेकच्या सोशल मीडिया हॅंडल्सवर पाहू शकता. वेबसाइटचं नवं रूप १५ ऑगस्ट २०२१ पासून पाहायला मिळेल.

या निमित्ताने मराठीटेकला विशेष सहकार्य करणाऱ्या माझ्या मित्रांना धन्यवाद देऊ इच्छितो. मराठीटेकवरील बरेचसे लेख मी स्वतःच लिहीत असलो तरी मध्यंतरी
कौस्तुभ शिंदे आणि स्वप्निल भोईटे यांनीही काही महत्वाच्या विषयांवरील लेख लिहिले आहेत. यासाठी दोघांचेही मनापासून आभार. 

मराठीटेकच्या सोशल मीडिया पोस्ट्ससाठी, व्हिडिओ शूटसाठी, काही व्हिडिओना आवाज देण्यासाठीसुद्धा वेळोवेळी सहकार्य करणाऱ्या सुमेध पाटील यांना मनापासून धन्यवाद.
मराठीटेकच्या यूट्यूब चॅनलवरील प्रॉडक्ट व्हिडिओ शूट करण्यासाठी आम्हाला नेहमी ज्यांचं सहकार्य लाभतं त्या अभिषेक देशपांडे यांना या निमित्ताने धन्यवाद.

मराठीटेकचा नवा लोगो सोलापूर येथील आर्टिस्ट पियुष पोरे यांनी डिझाईन केला असून मराठीटेकची नवी ओळख तयार करण्यासाठी ग्राफिक्ससंदर्भात सहकार्याबद्दल त्यांचेही मनापासून आभार.

या निमित्ताने आमच्या आजवरच्या प्रवासाबद्दल दोन (किंवा अधिक) शब्द …

शाळेत असतानाच नवनव्या तंत्रज्ञानाबद्दल जाणून घेण्याची आवड होती. मग ही माहिती मराठीत भाषेतून इंटरनेटवर उपलब्ध करून द्यावी ब्लॉगरवर सुरू केलेली वेबसाइट २०१९ पासून आम्ही वर्डप्रेसवर प्रकाशित केली आहे. यानंतर मराठीटेकवरील वाचकवर्ग अनेक पटींनी वाढला. फेसबुक, ट्विटर, यूट्यूब अशा सोशल मीडिया आणि वेबसाइटवरील लेख यांची सांगड घालण्याचा छोटा प्रयत्न आम्ही केला आहे. आज सांगायला आनंद होत आहे की मराठीटेक ही मराठीमध्ये सर्वाधिक काळ सुरू असलेली (Active) Tech/तंत्रज्ञान विषयक वेबसाइट आहे.  

आजवर मराठीटेकच्या मार्फत लाखो वाचकांनी नवनव्या तंत्रज्ञानाबद्दल माहिती मिळवली आहे. मराठी टायपिंगसारख्या विषयांवरील लेख तर अनेकांना उपयोगी ठरले आहेत.

मराठीटेकच्या फेसबुक पेजला १६०००+ लाईक्स, यूट्यूब चॅनलला ९६००+ सबस्क्रायबर्स, ट्विटरवर ९०००+ फॉलोअर्सच्या रूपात वाचकांचा प्रतिसाद मिळाला आहे. यूट्यूबवर आमच्या व्हिडिओना १४,००,०००+ व्ह्यूज आहेत. मराठी टायपिंगचे आमचे व्हिडिओ पाहून लाखो लोक त्यांच्या कम्प्युटर व फोन्सवर मराठी भाषेत लिहीत आहेत.
अर्थात दहा वर्षाचा प्रवास सांगत असताना ही संख्या काही प्रमाणात कमी वाटते हे मान्य. पण याला अनेक कारणे आहेत त्यापैकी एक म्हणजे आम्ही कधीही वाचकांना त्रास होईल/फसवणूक होईल अशी शीर्षके (क्लिकबेट) असलेले लेख प्रकाशित केले नाहीत. अजूनही आम्ही फक्त मोबाइल फोन्स, व्हॉटसअप आणि प्लॅन्स या गोष्टींवरच लेख लिहिणं टाळून इतर विषयांचीही माहिती जास्तीत जास्त देण्याचा प्रयत्न करतो. मराठीटेकवर बरेच लेख असे वाचायला मिळतील ज्या विषयांवर यापूर्वी मराठीत कसलीच माहिती उपलब्ध नव्हती.

आम्ही मराठीटेक सुरू असताना वाचकांना केवळ वाचकांना उपयुक्त माहिती मिळावी हाच एक उद्देश समोर ठेऊन कोणत्याही उत्पन्नाशिवाय हा उपक्रम बरीच वर्षे सुरू ठेवला होता. मराठीत गूगल ॲडसेन्सचा सपोर्ट येइपर्यंत आम्ही कधीही जाहिराती सुद्धा दाखवल्या नाहीत कारण इतर अॅड नेटवर्क्सच्या जाहिराती वाचकांना सुसंगत वाटणार नाहीत अशा स्पॅमने भरलेल्या असायच्या. आमच्या सोशल मीडियाच्या माध्यमातून अनेकांच्या शंकांचं निरसनसुद्धा करत असतो.

मराठीमध्ये अजूनही एकाच ठराविक विषयाला वाहून घेतलेल्या साइट्सची संख्या बरीच कमी आहे. ही संख्या वाढवण्याच्या दृष्टीने आणखी वेगवेगळ्या विषयांवर कशाप्रकारे माहिती मांडता येईल याबद्दलही आम्ही लवकरच लेख/व्हिडिओ प्रकाशित करणार आहोत…  

मराठीटेक मार्फत आम्ही गूगल ट्रान्सलेटमध्ये ५००० हून अधिक शब्द भाषांतरित करून देशात प्रथम पाचमध्ये स्थान मिळवलं होतं. झी मराठी दिशा मध्ये आमच्या उपक्रमाची दखल घेण्यात आली होती.  ABP माझाच्या डिजिटल महाराष्ट्र कार्यक्रमात मराठीटेकबद्दल माहिती देण्याची संधी मिळाली होती. मराठीटेकचा कंटेंट आता वेबसाइट, सोशल मीडिया, अँड्रॉइड ॲप, यूट्यूब चॅनल, डेलीहंट, गूगल न्यूज अशा माध्यमांवर उपलब्ध आहे.

आजपर्यंत मिळालेलं आपणा सर्वांचं सहकार्य यापुढेही असेल मिळत राहो ही अपेक्षा…

सूरज बागल (संस्थापक – मराठीटेक)

The post मराठीटेकची दशकपूर्ती : नवा लोगो, नवं रूप आणि नवी ओळख! appeared first on MarathiTech - मराठीटेक.