टेलिकॉम ग्राहकांना आकर्षित करणासाठी देशातील दुसरी सर्वाधिक मोठी टेलिकॉम कंपनी वोडाफोन लवकरच काही शहरांमध्ये फ्री ‘वाय-फाय’ सुविधा सुरु करणार आहे. 


एका इंग्रजी वृत्तपत्राच्या वृत्तानुसार कंपनीने काही ठिकाणी ‘वाय-फाय’ची चाचणी देखील सुरु केली आहे. जिथे सर्वाधिक इंटरनेटचा वापर होत आहे त्याठिकाणी प्राधान्याने वाय-फाय सुरु करण्याचा निर्धार वोडाफोन व्यक्त केला आहे. 


वोडाफोनच्या ग्राहकांना ही सुविधा मोफत मिळणार आहे. यासाठी त्यांना कोणत्याही प्रकारचे युजर नेम आणि पासवर्ड द्यावं लागणार नाही. कंपनीने मुंबई सारख्या महानगरांमध्ये यावर काम देखील सुरु केलं आहे. हा प्रोजेक्ट ‘स्प्रिंग प्रोजेक्ट’ म्हणून ओळखला जाणार आहे. 


वाय-फाय जेथे-जेथे असणार आहे त्या ठिकाणांची खासियत म्हणजे तेथे इंटरनेटचा स्पीड फारच जास्त असणार आहे. याविषयी कंपनीच्या आर्थिक बाबीही लक्षात घेत आहे. 

यंदाच्या लोकसभा निवडणुका वेगळ्या ठरणार आहेत. कारण या निवडणुकांमध्ये सर्वच राजकीय पक्ष सोशल मीडियाचा जोरदार वापर करताना दिसताहेत. निवडणुकीत ६५ टक्के मतदार तरुण आहेत आण‌ि या तरुणांना आकर्षित करण्यासाठी सर्वच राजकीय पक्ष सरसावले आहेत.

राष्ट्रीय स्तरावर भाजप, काँग्रेस आणि आम आदमी पार्टी यांच्यातल्या या सोशल मीडिया स्पर्धेत अर्थातच आघाडीवर आहेत भाजपचे पंतप्रधानपदाचे उमेदवार नरेंद्र मोदी. ‘अब की बार मोदी सरकार’ हा नारा देणारी भाजपची अधिकृत वेबसाइट नमोनमःच्या जपाने भरलेली आहे. मोदींची वचने, पोस्टर्स, बातम्या, रोजच्या मोदींच्या सभांचे व्हिडीओ यांची वेबसाइटवर रेलचेल आहे. भाजपच्या फेसबुक पेजला २६ लाख लाइक्स मिळाले आहेत. बेंगळुरूमध्ये राजेश जैन यांच्या नेतृत्वाखालील एक हजार जणांची टीम ही वेबसाइट सांभाळते.

काँग्रेसच्या वेबसाइटवर अर्थातच राहुल गांधी यांचे फोटो, प्रचारसभा, रोडशोज यांचे व्हिडीओ आणि यूपीए सरकारच्या विविध योजनांचा गोषवारा आहे. ‘मैं नही, हम’ हा राहुल गांधी यांचा संदेश मतदारांपर्यंत पोहोचवण्याचे या वेबसाइटचे उद्दिष्ट आहे. पक्षाच्या फेसबुक पेजला आतापर्यंत आतापर्यंत २१ लाख लाइक्स मिळाले आहेत.

‘आप’च्या वेबसाइटवर रोज ४०-५० पोस्ट्स या साइटवर पडतात. सभासद नोंदणीपासून ते लोकसभा उमेदवारीच्या फॉर्म्सपर्यंत सर्व माहिती तसेच केजरीवाल यांची प्रश्नावली, सभा आणि पत्रकार परिषदांचे व्हिडिओ येथे आहेत. ‘आप’च्या फेसबुक पेजला १६ लाख लाइक्स मिळाले आहेत.

वेबसाइटच्या स्पर्धेत महाराष्ट्रात राष्ट्रवादी काँग्रेस पक्ष आघाडीवर आहे. मराठी, हिंदी आणि इंग्रजी अशा तीन भाषांतल्या या वेबसाइटवर शरद पवार यांचा ब्लॉग, मंत्र्यांची कामे, सरकारी योजना, अजित पवारांचा जनता दरबार, बातम्या, नेत्यांचे दौरे आणि भाषणांचे व्हिडीओ असा मजकूर आहे. राष्ट्रवादीच्या फेसबुक पेजला २ लाख १८ हजार लाइक्स मिळाले आहेत. गारपीटग्रस्त भागात शरद पवार यांच्या पायी दौऱ्याला वेबसाइटवर चांगला प्रतिसाद मिळाल्याचे वेबसाइटचे संचालक नितीन वैद्य यांनी सांगितले. स्टार प्लस चॅनलचे माजी बिझनेस हेड नितीन वैद्य आणि मोबीटॉक्स इनोव्हेशनचे संस्थापक अभिजीत सक्सेना यांच्या ‘ड्रायव्हिंग माइंड्स’तर्फे ही वेबसाइट चालवली जाते.

शिवसेनेच्या वेबसाइटवर शिवसेनाप्रमुख बाळासाहेब ठाकरे, उद्धव ठाकरे आणि आदित्य ठाकरे यांचे फोटो झळकत आहेत. ‘भगवा झंझावात’ असे वर्णन असलेल्या या वेबसाइटवर शिवसेनेचे प्रचारगीत, सभा, पत्रके, शिवबंधन शपथ इत्यादी मजकूर आहे. बाळासाहेबांची जुनी भाषणे, व्यंगचित्रेही आहेत. मुंबई महापालिकेत शिवसेनेने केलेल्या कामांचा गोषवारा, पक्षाचे उमेदवार, प्रचारसभांचे वेळापत्रक इत्यादी मजकूर आहे. शिवसेनेच्या फेसबुक पेजला आतापर्यंत ६५ हजार लाइक्स मिळाले आहेत. युवासेनेची टीम या वेबसाइटचे काम पाहते. भाजपची महाराष्ट्राची वेबसाइट त्यामानाने थंड आहे. गोपीनाथ मुंडे, देवेंद्र फडणवीस, नितीन गडकरी, किरीट सोमय्या आदी नेत्यांच्या सभा, बातम्या आणि फोटो असा मजकूर या वेबसाइटवर आहे. मायक्रोसॉफ्टमधून निवृत्त झालेले भाजप कार्यकर्ते आर. पी. सिंह यांच्या नेतृत्वाखालील दहा जणांची टीम यासाठी काम करते. त्यांच्या फेसबुक पेजला २७ हजार ६८७ लाइक्स मिळाले आहेत.

‘हीच क्रांती आहे’ या घोषवाक्याने सजलेल्या ‘आप’च्या महाराष्ट्राच्या वेबसाइटवरही केजरीवाल यांच्या ताज्या मुंबई-महाराष्ट्र दौऱ्याचे व्हिडीओ, प्रचारसभा, रोडशो यांच्या बातम्या आहेत. त्यांच्या फेसबुक पेजला ५८ हजार ४०२ लाइक्स आहेत.

महाराष्ट्र प्रदेश काँग्रेस कमिटीची वेबसाइटही राष्ट्रीय वेबसाइटच्या तुलनेत दुर्लक्षितच दिसते. मुख्यमंत्री पृथ्वीराज चव्हाण, प्रदेशाध्यक्ष माणिकराव ठाकरे यांच्यासह महाराष्ट्राच्या नेत्यांच्या बातम्यांची कात्रणे, उमेदवारांची यादी, सरकारी योजना असा मजकूर यावर आहे. तर त्यांच्या फेसबुक पेजला ४ हजार ७०१ लाइक्स मिळाले आहेत.

राज ठाकरे यांच्या नेतृत्वाखालील मनसेची वेबसाइट नव्यानेच सुरू झाली आहे. ठाकरे यांचे वर्धापन दिनाचे भाषण, जाहीर सभा, पत्रकार परिषदा, उमेदवारांची यादी, गारपीटग्रस्त भागाच्या दौऱ्याचा व्हिडिओ यावर उपलब्ध आहेत. मनसेचे सरचिटणीस अनिल शिदोरे यांच्या नेतृत्वाखालील टीम या वेबसाइटचे व्यवस्थापन बघते. या वेबसाइटवर राज्याची जिल्हावार माहिती, नामवंत व्यक्तींचे फोटो, टोलसारख्या प्रश्नी पक्षाची धोरणे इत्यादी माहिती वेबसाइटवर आहे. पक्षाचे मुखपत्र म्हणून ही वेबसाइट काम करणार असून लवकरच एक संयुक्त ‘अॅप’ आणणार आहे. आतापर्यंत ३५ हजार डाऊनलोड्स झाल्याचे शिदोरे म्हणाले.

लाइक्स, चॅट, शेअर आणि ट्विट्समध्ये गुंतलेली तरुणाई प्रत्यक्ष किती मतदान करते, हे येणारी निवडणूक ठरवेल.
Writer for M.T. – वैजयंती कुलकर्णी-आपटे

पाच राज्यांतील विधानसभा निवडणुकांच्या निकालाच्या पार्श्वभूमीवर तरुण बोलते झाले. बोलते झाले म्हणजे सोशल नेटवर्किंग साइटवर त्यांनी हव्या तशा प्रतिमा तयार करून राजकारण्यांची खिल्ली उडवली. हे कितपत योग्य आहे?

पाच राज्यांतील विधानसभा निवडणुकांचे निकाल नुकतेच लागलेत. त्यानंतर विविध पक्षांच्या राजकारण्यांवर, नेत्यांवर टीका करणाऱ्या, विडंबन करणाऱ्या पोस्ट सोशल मीडीयावर दणादण पडू लागल्या. पराभूत झालेल्या नेत्यांसोबतच जिंकलेल्या नेत्यांचीही वाटेल तशी प्रतिमा यातून रंगविली गेली. त्या नेत्यांचं वय, त्यांचं पद याचं कसलंही भान न ठेवता त्यांची उडवलेली खिल्ली आजच्या तरुणांची मानसिकता दाखवत होती. कोणत्याही राजकारण्यावर हवी तशी आणि हवी तेव्हा टीका करण्याचा आपल्याला अधिकार आहे, असा या पिढीचा समज तर नाही ना झालेला?

आजचे तरुण हेच देशाचं उद्याचं नशीब घडवणारे असतात. त्यामुळे त्यांनी जागरुक राहून, आपल्या सभोवतालच्या घडामोडींची दखल घेणं, त्यावर आपलं मत व्यक्त करणं केव्हाही चांगलंच; पण हे करत असताना खालच्या पातळीवर जाऊन एखाद्यावर टीका करणं, कितपत योग्य आहे? देशात महत्त्वाच्या पदावर असलेल्या व्यक्तीचे चेहरे तंत्रज्ञानाच्या आधारे कसेही वापरून त्यांची मानहानी करणं नक्कीच ठीक नाही. आपण टीका करत असलेली व्यक्ती कोणाची तरी आई, वडील किंवा आजोबा आहेत, याचं भान ठेवलेलंच दिसत नाही. राजकारण्यांचे चुकत असेलही, नव्हे चुकतेच; पण त्यांच्याशी असणारे वैचारिक किंवा तात्त्विक मतभेद योग्य प्रकारे मांडणं अधिक संयुक्तिक आहे. याविषयी आजच्या पिढीला काय वाटतं, ते जाणून घेऊ या.

चांगल्या भाषेत व्यक्त व्हा

कुणाचेही फोटो घेऊन त्यावर वाट्टेल तसे विनोद करणं किंवा फोटो एडिट करून कुणाची मानहानी करणं मला अजिबात आवडत नाही. असं करण्यापेक्षा पुढं येऊन स्वतः काहीतरी करून दाखवायला पाहिजे. आपण स्वतः काहीतरी करून दाखवल्यासच दुसऱ्यांना बोलण्याचा आपल्याला अधिकार असतो. राजकारणी कसेही असले, तरी त्या व्यक्तीचं समाजात नाव आहे. त्यांचेही काही प्रॉब्लेम असू शकतात, ते आपण समजून घेतले पाहिजेत. त्यामुळेच कोणाचीही मानहानी करणं चुकीचंच आहे. आपल्याला जे वाटतं, ते आपण चांगल्या भाषेतही सांगू शकतोच की.
– वैष्णवी कानिटकर

ही मर्दानगी नाही

कुणावरही टीका करताना जपूनच करायला हवी. मला वाटतं, विचारांचा लढा हा विचारांनीच लढायला हवा. आपण लोकशाही व्यवस्थेत जगतो आहोत, तर वैयक्तिक द्वेषातून सोशल नेटवर्किंगवर नेते मंडळींची फाल्तू पोस्टर तयार करण्यात आपण काही मर्दानगी गाजवतो आहोत असं अजिबात नाही. त्यापेक्षा मतपेटीतून तुमचं मत व्यक्त व्हायला हवं.
– राजेश केंद्रे

भान ठेवावं

आपण विनोद करतो आणि ते शेअर करतो इथंवर ठीक आहे; पण वैयक्तिक फोटो एडिट करून एखाद्याची चेष्टा करणं मला गैर वाटतं. आपल्या फोटोशी कुणी असं केलं, तर आपल्याला वाईट वाटेल. मग समोरची व्यक्ती ही ‘पब्लिक फीगर’ आहे म्हणून त्यांच्याविषयी असे मेसेज पसरवणं गैर आहे. मला वाटतं, तुमच्या मानसिकता प्रगल्भ असेल, तर असले उद्योग तुम्ही करणार नाही.
– प्रिया सरवणकर

विनोदात गैर काय

उठसूट कुणाबाबतही आपण असे जोक वा फोटो शेअर करत नाही. ते व्यक्त होण्याचं माध्यम आहे. अशा लोकांबाबतचा राग त्या विडंबनातून व्यक्त होतो. या लोकांनी काहीतरी विचित्र स्टेटमेंट केलेली चालतात, लोकांना गृहित धरलेलं चालतं, लोकशाहीची चेष्टा केलेली चालते, मग त्यांचं विडंबन झालं, तर त्यात काहीच गैर नाही.
– प्रमोद सोनावणे

तरुणांसाठी ‘रोल मॉडेल’चं नाही

आजच्या तरुणांना कोणत्याही क्षेत्रात ‘रोल मॉडेल’ उरलेलाच नाही. आपलं घर, शिक्षणक्षेत्र, राजकारण… सगळीकडेच त्यांना नीतीमूल्यं हरवलेली दिसतात. त्यांचा हा राग, असंतोष मग अशा प्रकारे व्यक्त केला जातो. त्यातच राजकारणी हे ‘सॉफ्ट टार्गेट’ बनले आहेत. त्यामुळे तरुणांच्या हातात कायम हजर असलेल्या सोशल मीडियाद्वारे त्यांच्यावर कशीही टीका केली जाते. हे चुकीचं असेलही; पण आजची पिढी कुणाचाच आदर राखताना दिसत नाही. मग नेत्यांचा तरी आदर ठेवण्याची अपेक्षा त्यांच्याकडून कशी ठेवायची? मुलांमधील ऊर्जेला योग्य दिशा दिल्यास त्यांच्याकडून काही सकारात्मक कार्य नक्की घडेल.
– अश्विनी लाटकर, समुपदेशक