आजच्याच दिवशी म्हणजे ३ एप्रिल १९७३ मध्ये मोटोरोलामधील इंजिनियर मार्टिन कूपर यांनी जगातला पहिला सेलफोन (वायरलेस) कॉल केला होता. या जागतिक तंत्रज्ञान विश्व बदलणाऱ्या घटनेस आता ५० वर्षं पूर्ण झाली आहेत.

मार्टिन कूपर हे स्वतः अजूनही त्यांचं आयुष्य अभिमानाने जगत असून मोटोरोलाने त्यांचा छोटासा व्हिडिओ आज या खास दिनानिमित्त प्रकाशित केला आहे. यासोबत मोटोरोलाचा प्रवाससुद्धा त्यांनी मांडला आहे. या फोन कॉलनंतरच काही वर्षांत मोटोरोलाने बाजारात उपलब्ध असलेला जगातला पहिला फोन DynaTAC सादर करण्यात आला होता. मार्टिन कूपर यांना आता सेलफोनचे जनक म्हटलं जातं!

The post जगातल्या पहिल्या सेलफोन कॉलला पन्नास वर्षं पूर्ण! appeared first on MarathiTech - मराठीटेक.

सेमीकंडक्टर क्षेत्रात आमूलाग्र बदल घडवून आणण्यात महत्वाचा सहभाग असलेले इंटेल कंपनीचे सहसंस्थापक Gordon Moore यांचं २४ मार्चला हवाई येथे वयाच्या ९४ व्या वर्षी निधन झालं. आजच्या काळात वापरल्या जाणाऱ्या कॉम्प्युटर्सच्या विकसित होण्यामध्ये त्यांचं मोठं योगदान होतं. यासंबंधीत Moore’s Law चं आपण कधीतरी ऐकलं असेलच, त्याचं श्रेयसुद्धा गॉर्डन मूर यांनाच जातं!

१९६५ मध्ये त्यांनी असं भाकीत केलं की प्रोसेसरमधील ट्रांजिस्टर्सची संख्या दरवर्षी दुप्पट होत जाईल. त्यानंतर एक दशक उलटल्यावर (१९७५) त्यांनी त्यामध्ये बदल करून तीच गोष्ट दर दोन वर्षांनी असं होईल असं सांगितलं. यालाच नंतर Moore’s Law म्हटलं गेलं. त्यानंतर अगदी अलीकडच्या काही वर्षांपर्यंत त्यांचं ते भाकीत खरं ठरत गेलं. काही जणांनी तर सिलिकॉन व्हॅलीची ओळख Moore’s Law मुळे तयार झाली असंही म्हटलं आहे.

१९६८ मध्ये Moore व Robert Noyce यांनी मिळून Integrated Electronics नावाची कंपनी काढली. हीच कंपनी पुढे intel (इंटेल) नावाने जगप्रसिद्ध झाली. ते स्वतः नंतर चेयरमन व सीईओपदी बसले आणि आठ वर्षं हे पद त्यांनी भूषवलं. इंटेल आजतागायत प्रोसेसर निर्मितीमध्ये जगातली एक आघाडीची कंपनी आहे. त्यांच्या प्रोसेसर्सनी वेळोवेळी कॉम्प्युटर क्षेत्रात क्रांती म्हणता येईल इतका बदल घडवून आणला आहे.

त्यांनी आयुष्याच्या उत्तरार्धात The Gordon and Betty Moore foundation या तब्बल ६ बिलियन डॉलर्स ची ग्रँट असलेल्या सामाजिक, शैक्षणिक आणि विज्ञान संशोधन क्षेत्रात काम करणाऱ्या संस्थेची स्थापना करून या संस्थेच्या कार्यात वाहून घेतलं. गेल्या वर्षी इंटेलने त्यांच्या सन्मानार्थ ओरेगॉन येथील कार्यालयाला Gordon Moore Park असं नाव देऊन उद्घाटन केलं होतं.

त्यांच्या निधनाबद्दल आयटी व तंत्रज्ञान क्षेत्रातील टीम कुक, सुंदर पिचाई अशा नामांकित व्यक्तींनी शोक व्यक्त केला आहे.

The post इंटेलचे सहसंस्थापक गॉर्डन मूर यांचं निधन : Moore’s Law चे निर्माते appeared first on MarathiTech - मराठीटेक.

       तंत्रज्ञानामुळे पारदर्शक कारभाराची गुरूकिल्ली हाती येते ;तरी कित्येकदा तंत्रज्ञानही मक्तेदारीमध्ये जखडून ठेवण्याची खेळी प्रस्थापितांकडून केली जाते. या जोखडातून कम्प्युटर तंत्रज्ञानाची सुटका करून ते सर्वांना उपलब्ध व्हावे , याचा पाठपुरावा करण्यात ओपन सोर्सचे प्रणेते अतुल चिटणीस यांनी आपली कारकीर्द घडवली. 

फ्री आणि ओपन सोर्स सॉफ्टवेअरचे प्रणेते म्हणून १९९४पासून अतुल चिटणीस हे नाव भारताला ठाऊक झाले. साधारण त्याच काळात उद्योगव्यवहारांमध्ये वह्यापेन्सिली आणि कागदी फायलींची जागा कम्प्युटर घेऊ लागला होता. कदाचित त्यावेळी ,सॉफ्टवेअर कुणा कंपन्यांच्या मक्तेदारीत बांधलेले नसावे , या विचाराचे मोल सर्वांना तितकेसे उमजत नसावे. नंतर भारतीय भाषांच्या वापरातील अडचणी , परवान्यासाठी मोजावी लागणारी किंमत तसेच भारतीय डेटाची सुरक्षितता व परावलंबित्वाचे प्रश्न यामुळे ओपन सोर्सची गरज सर्वांना पटू लागली.
अतुल चिटणीस यांनी मात्र १९८०पासूनच कम्प्युटर तंत्रज्ञानावर हुकुमत मिळविली होती. 

           त्यामुळेच लिनक्स सॉफ्टवेअर तसेच फ्री व ओपन सोर्सचा नारा त्यांनी पुकारला. अतुल यांचे वडील भारतीय , तर आई जर्मनीची. त्यांचा जन्म आणि प्राथमिक शिक्षणही बर्लिनमध्ये झाले. त्यानंतर मात्र त्यांचे शिक्षण बेळगाव मिलिटरी स्कूलमध्ये झाले व गोगटे इन्स्टिट्यूट ऑफ टेक्नॉलॉजीमधून त्यांनी बीई-मेकॅनिकल केले. वर्षभरातच त्यांचा प्रवास कम्प्युटरनिगडित तंत्रज्ञानाकडे झाला. कम्प्युटरनिगडित अनेक गोष्टींचा प्रथम पुरस्कार त्यांनी केला. मोडेमचा वापर शिकविला. इंटरनेटचा प्रसार होण्यापूर्वीच्या काळात डेटाकम्युनिकेशन , नेटवर्किंग यांची सुरुवात त्यांनी केली. सीआयएक्स- बुलेटिन बोर्ड सिस्टिम ही भारतातील पहिली ऑनलाइन सेवा त्यांनी सुरू केली. ऑनलाइन संपर्क आणि समूहसंवादाचे ते आद्य माध्यम होते. १९९३ ते १९९७ या काळात त्यांनी पीसी-क्वेस्ट या कम्प्युटरआधारित नियतकालिकातून कम्प्युटरजागृतीचा वसा घेतला. भारत सरकारने बुलेटिन बोर्ड सिस्टिमला करांच्या कक्षेत आणण्याचा घाट घातला असताना चिटणीस यांनी इलेक्ट्रॉनिक चळवळीद्वारे त्यावर प्रहार केले. 

          ही पहिलीच ऑनलाइन चळवळ यशस्वी ठरली. विविध व्यासपीठांवर त्यांनी लिनक्स आणि ओपनसोर्सविषयी जनजागरण केले. २१व्या शतकातील नव्या तंत्रज्ञानानुसार त्यांनी मोबाइल कम्प्युटिंग , कन्व्हर्ज्ड कम्युनिकेशन यांतही उडी घेतली. पीसी क्वेस्टचे सल्लागार संपादक म्हणून विपुल लिखाण केले. ते स्वतः हौशी संगीतकारही होते व संगीताची तंत्रज्ञानाशी सांगड घालण्याचे कसबही त्यांच्या अंगी होते. रेडिओव्हर्व हे इंटरनेट रेडिओ स्टेशन त्यांनी सुरू केले होते. त्यांच्या अकाली निधनाने एक बहुआयामी व्यक्तिमत्त्व काळाच्या पडद्याआड गेले आहे. 

The post अतुल चिटणीस : ओपन सोर्स सॉफ्टवेअरचे प्रणेते appeared first on MarathiTech - मराठीटेक.