यूट्यूबने गेल्या काही दिवसात त्यांच्या नव्या डिझाईनची चाचणी सुरू केली होती आणि आता हे नवं डिझाईन सर्वांसाठी उपलब्ध करून देण्यात आलं आहे. यामध्ये प्रमुख नवी सोय म्हणजे Ambient Mode म्हणता येईल. सोबत इतरही नवे बदल असून ज्यामुळे आपल्याला यूट्यूब वेबसाइट, ॲप वापरणं अधिक सोयीस्कर आणि डोळ्याना कमी त्रास होईल असं होणार आहे. सोबत नेहमीच्या व्हिडिओसाठी आणि शॉर्ट्स व लाईव्हसाठी स्वतंत्र टॅब केल्या आहेत.

Ambient Mode : या नव्या मोडमुळे व्हिडिओ पाहत असताना व्हिडिओमधील रंगांची छटा आपल्या व्हिडिओ प्लेयरच्या बाजूने फिकट स्वरूपात दिसेल. यासाठी डार्क मोड ऑन असावा लागेल.

Pinch to Zoom : आता आपण फोटो झूम करतो त्या प्रमाणे व्हिडिओसुद्धा झुम करून पाहू शकता. याद्वारे तुम्ही चक्क 8x झुम करू शकता आणि व्हिडिओमधील ठराविक भाग मोठा करून पाहू शकता. हा पर्याय यूट्यूब ॲपमध्ये फुलस्क्रीन व्हिडिओ पाहत असतानाच वापरता येईल.

Precise seeking : यामुळे आपल्याला व्हिडिओ पुढे मागे ढकलत असताना त्यामधील फ्रेम्स/थंबनेल्स दिसतील. प्रोग्रेस बारवरील हव्या असलेल्या जागीच व्हिडिओ पाहण्यासाठी नवी सोय नक्कीच वेळ वाचवणारी असेल.

Rounded Thumbnails & buttons : यूट्यूबवरील सर्व थंबनेल्स आणि बटन्स आता बाजूने गोलाकार असतील. आता हा डिझाईन ट्रेंड झाला असून राऊंडेड कॉर्नरमुळे पाहताना डोळ्याना कमी त्रास होतो किंवा तो कंटेंट पाहणं सोपं होतं आणि त्याना मॉडर्न लुक सुद्धा मिळतो.

Subscribe button updates : सबस्क्राईब बटनलासुद्धा नवं रूप देण्यात आलं असून पूर्वीच्या फक्त लाल रंगात उपलब्ध असलेल्या बटनऐवजी नव्या डिझाईननुसार खास रंग देण्यात आले आहेत.

Darker Dark theme : डार्क थीममध्ये आता आणखी डार्क मोड उपलब्ध करून देण्यात आला असून यामुळे व्हिडिओ पाहत असताना आपल्या फोनची बॅटरी आणखी काही प्रमाणात वाचेल.

Playlist design updates : व्हिडिओ/गाण्यांची प्लेलिस्टसुद्धा आता नव्या रूपात दिसणार आहे. अधिक मोठं टायटल, गोलाकार बटन्स असे काही बदल यामध्ये पाहू शकता.

यूट्यूबवर आता नेहमीच्या व्हिडिओसाठी आणि शॉर्ट्स व लाईव्हसाठी स्वतंत्र टॅब देण्यात आल्या असून यामुळे चॅनल पाहत असताना होणारी सरमिसळ थांबेल. Videos टॅबवर जास्त लांबीचे व्हिडिओ, Shorts टॅबवर कमी लांबीचे उभे व्हिडिओ आणि Live टॅबमध्ये जुने लाईव्ह केलेले व्हिडिओ दिसतील.

The post यूट्यूब आता नव्या रूपात उपलब्ध : डिझाईनमध्ये बरेच बदल! appeared first on MarathiTech - मराठीटेक.

गूगलने त्यांच्या लोकप्रिय मेलिंग सेवेचं नवं रूप कालपासून सर्वांसाठी उपलब्ध करून देण्यात सुरुवात केली आहे. मुख्य जीमेल (Gmail) साठी देण्यात आलेल्या नव्या डिझाईनसोबत गूगल वर्कस्पेसमधील मेलसोबत चॅट, स्पेसेस, मीट अशा सेवा आता एका क्लिकवर सहज वापरता येतील अशा उपलब्ध करून देण्यात आल्या आहेत.

गेल्या १८ वर्षात गूगलच्या जीमेलचं डिझाईन बरंच बदललं असून हे दर्शवणारा व्हिडिओसुद्धा त्यांनी अपलोड केला आहे. ज्याना नवं डिझाईन हवं आहे त्यांना ते दिसेल जर तुम्हाला जुनंच डिझाईन हवं असेल तर तसाही पर्याय देण्यात आला आहे.

या नव्या बदलांबद्दल आणखी माहिती हवी असल्यास गूगलचा https://blog.google/products/gmail/gmail-design-update लेख पहा.

The post जीमेल आता नव्या रूपात : नव्या डिझाईनसोबत वर्कस्पेस एका क्लिकवर! appeared first on MarathiTech - मराठीटेक.

आज अनेक वर्षानंतर मराठीटेक या आपल्या तंत्रज्ञानविषयक माहिती देणाऱ्या वेबसाइटचा नवा लोगो, नवी ओळख आपल्या समोर आणत आहोत. बघता बघता आमच्या या वेबसाइटने दहा वर्षे पूर्ण केली असून आपल्या सारख्या वाचकांच्या प्रतिसादामुळे एव्हढया वर्षांचा मोठा प्रवास करणं शक्य झालं आहे.

बऱ्याच वर्षांपासून इंटरनेटवर माहिती पाहत असताना जवळपास सर्वच माहिती इंग्लिश मध्ये उपलब्ध असायची. यामधील ठराविक विषय तरी किमान आपल्या मायबोलीमध्ये वाचायला मिळायला हवे असं नेहमी वाटायचं. यासाठीच मराठीटेकची सुरुवात करताना २००८ मध्ये गूगलच्या ब्लॉगरवर marathitech ची नोंदणी केली होती. त्यानंतर यामधील काही तांत्रिक गोष्टी शिकत शिकत २०११ पासून नियमित लेख लिहिण्यास सुरुवात केली होती. आता नेमकी तारीख उपलब्ध नाही पण कालावधी नक्कीच दहा वर्षांपेक्षा अधिक पूर्ण झाला आहे आणि हे काही दिवसांपूर्वीच बोलता बोलता सहज लक्षात आलं. त्यामुळे या निमित्ताने गेली अनेक वर्षं न बदललेला आपल्या या वेबसाइटचा लोगो व डिझाईन बदलण्याचा निर्णय घेतला आणि आज तो प्रकाशित करत आहोत… नव्या लोगोसोबत आम्ही अधिकाधिक माहितीपूर्ण लेख, सोशल मीडिया पोस्ट्स, व्हिडिओ आणण्याचा प्रयत्न करणार आहोत… 

नवा लोगो मराठीटेकच्या सोशल मीडिया हॅंडल्सवर पाहू शकता. वेबसाइटचं नवं रूप १५ ऑगस्ट २०२१ पासून पाहायला मिळेल.

या निमित्ताने मराठीटेकला विशेष सहकार्य करणाऱ्या माझ्या मित्रांना धन्यवाद देऊ इच्छितो. मराठीटेकवरील बरेचसे लेख मी स्वतःच लिहीत असलो तरी मध्यंतरी
कौस्तुभ शिंदे आणि स्वप्निल भोईटे यांनीही काही महत्वाच्या विषयांवरील लेख लिहिले आहेत. यासाठी दोघांचेही मनापासून आभार. 

मराठीटेकच्या सोशल मीडिया पोस्ट्ससाठी, व्हिडिओ शूटसाठी, काही व्हिडिओना आवाज देण्यासाठीसुद्धा वेळोवेळी सहकार्य करणाऱ्या सुमेध पाटील यांना मनापासून धन्यवाद.
मराठीटेकच्या यूट्यूब चॅनलवरील प्रॉडक्ट व्हिडिओ शूट करण्यासाठी आम्हाला नेहमी ज्यांचं सहकार्य लाभतं त्या अभिषेक देशपांडे यांना या निमित्ताने धन्यवाद.

मराठीटेकचा नवा लोगो सोलापूर येथील आर्टिस्ट पियुष पोरे यांनी डिझाईन केला असून मराठीटेकची नवी ओळख तयार करण्यासाठी ग्राफिक्ससंदर्भात सहकार्याबद्दल त्यांचेही मनापासून आभार.

या निमित्ताने आमच्या आजवरच्या प्रवासाबद्दल दोन (किंवा अधिक) शब्द …

शाळेत असतानाच नवनव्या तंत्रज्ञानाबद्दल जाणून घेण्याची आवड होती. मग ही माहिती मराठीत भाषेतून इंटरनेटवर उपलब्ध करून द्यावी ब्लॉगरवर सुरू केलेली वेबसाइट २०१९ पासून आम्ही वर्डप्रेसवर प्रकाशित केली आहे. यानंतर मराठीटेकवरील वाचकवर्ग अनेक पटींनी वाढला. फेसबुक, ट्विटर, यूट्यूब अशा सोशल मीडिया आणि वेबसाइटवरील लेख यांची सांगड घालण्याचा छोटा प्रयत्न आम्ही केला आहे. आज सांगायला आनंद होत आहे की मराठीटेक ही मराठीमध्ये सर्वाधिक काळ सुरू असलेली (Active) Tech/तंत्रज्ञान विषयक वेबसाइट आहे.  

आजवर मराठीटेकच्या मार्फत लाखो वाचकांनी नवनव्या तंत्रज्ञानाबद्दल माहिती मिळवली आहे. मराठी टायपिंगसारख्या विषयांवरील लेख तर अनेकांना उपयोगी ठरले आहेत.

मराठीटेकच्या फेसबुक पेजला १६०००+ लाईक्स, यूट्यूब चॅनलला ९६००+ सबस्क्रायबर्स, ट्विटरवर ९०००+ फॉलोअर्सच्या रूपात वाचकांचा प्रतिसाद मिळाला आहे. यूट्यूबवर आमच्या व्हिडिओना १४,००,०००+ व्ह्यूज आहेत. मराठी टायपिंगचे आमचे व्हिडिओ पाहून लाखो लोक त्यांच्या कम्प्युटर व फोन्सवर मराठी भाषेत लिहीत आहेत.
अर्थात दहा वर्षाचा प्रवास सांगत असताना ही संख्या काही प्रमाणात कमी वाटते हे मान्य. पण याला अनेक कारणे आहेत त्यापैकी एक म्हणजे आम्ही कधीही वाचकांना त्रास होईल/फसवणूक होईल अशी शीर्षके (क्लिकबेट) असलेले लेख प्रकाशित केले नाहीत. अजूनही आम्ही फक्त मोबाइल फोन्स, व्हॉटसअप आणि प्लॅन्स या गोष्टींवरच लेख लिहिणं टाळून इतर विषयांचीही माहिती जास्तीत जास्त देण्याचा प्रयत्न करतो. मराठीटेकवर बरेच लेख असे वाचायला मिळतील ज्या विषयांवर यापूर्वी मराठीत कसलीच माहिती उपलब्ध नव्हती.

आम्ही मराठीटेक सुरू असताना वाचकांना केवळ वाचकांना उपयुक्त माहिती मिळावी हाच एक उद्देश समोर ठेऊन कोणत्याही उत्पन्नाशिवाय हा उपक्रम बरीच वर्षे सुरू ठेवला होता. मराठीत गूगल ॲडसेन्सचा सपोर्ट येइपर्यंत आम्ही कधीही जाहिराती सुद्धा दाखवल्या नाहीत कारण इतर अॅड नेटवर्क्सच्या जाहिराती वाचकांना सुसंगत वाटणार नाहीत अशा स्पॅमने भरलेल्या असायच्या. आमच्या सोशल मीडियाच्या माध्यमातून अनेकांच्या शंकांचं निरसनसुद्धा करत असतो.

मराठीमध्ये अजूनही एकाच ठराविक विषयाला वाहून घेतलेल्या साइट्सची संख्या बरीच कमी आहे. ही संख्या वाढवण्याच्या दृष्टीने आणखी वेगवेगळ्या विषयांवर कशाप्रकारे माहिती मांडता येईल याबद्दलही आम्ही लवकरच लेख/व्हिडिओ प्रकाशित करणार आहोत…  

मराठीटेक मार्फत आम्ही गूगल ट्रान्सलेटमध्ये ५००० हून अधिक शब्द भाषांतरित करून देशात प्रथम पाचमध्ये स्थान मिळवलं होतं. झी मराठी दिशा मध्ये आमच्या उपक्रमाची दखल घेण्यात आली होती.  ABP माझाच्या डिजिटल महाराष्ट्र कार्यक्रमात मराठीटेकबद्दल माहिती देण्याची संधी मिळाली होती. मराठीटेकचा कंटेंट आता वेबसाइट, सोशल मीडिया, अँड्रॉइड ॲप, यूट्यूब चॅनल, डेलीहंट, गूगल न्यूज अशा माध्यमांवर उपलब्ध आहे.

आजपर्यंत मिळालेलं आपणा सर्वांचं सहकार्य यापुढेही असेल मिळत राहो ही अपेक्षा…

सूरज बागल (संस्थापक – मराठीटेक)

The post मराठीटेकची दशकपूर्ती : नवा लोगो, नवं रूप आणि नवी ओळख! appeared first on MarathiTech - मराठीटेक.

गेली कित्येक वर्षं बऱ्यापैकी सारख्याच प्रकारचं डिझाईन असणाऱ्या फेसबुकने आता नव्या रूपात आपली वेबसाइट सादर केली आहे. यासोबत त्यांनी आता डेस्कटॉप वेबसाइटवर सुद्धा डार्क मोड आणला आहे. नव्या डिझाईनमध्ये डार्क मोड, वाढलेला वेग, गोष्टी पाहण्यासाठी सोपं सुटसुटीत डिझाईन आणत आहोत आणि त्यासाठी आम्हाला तुमचा अभिप्राय हवा आहे असं फेसबुकतर्फे सांगण्यात येत आहे. नवं डिझाईन सरसकट सर्वांना लागू करण्यात आलेलं नाही मात्र जर तुम्हाला हवं असेल तर तुम्ही आता लगेच ते वापरुन पाहू शकता.

अपडेट 11-05-2020 : फेसबुक डेस्कटॉप वेबसाइटवरील डार्क मोड आणि नवं डिझाईन आता सर्वांसाठी उपलब्ध झालं आहे.

How to get new Facebook Design and Dark mode on Desktop Website 2020?

उजव्या कोपऱ्यात दिसणाऱ्या उलट्या बाणावर (🔽) क्लिक करा आणि समोर आलेल्या पर्यायात Switch to New Facebook हा नवा पर्याय दिसेल त्यावर क्लिक करा आणि काही सेकंदात नव्या रुपातलं फेसबुक लोड झालेलं दिसेल. तुम्हाला डार्क मोड हवा असेल तर पुन्हा त्या कोपऱ्यातल्या बाणावर क्लिक करा आणि Dark Mode डार्क मोड स्विच उजवीकडे सरकवा डार्क मोड सुरू झालेला दिसेल!

गेले अनेक दिवस याची चाचणी सुरू होती. अजूनही यामध्ये सर्व पर्याय नव्या रूपात दिसत नाहीत. काही पर्यायांसमोर तसं सांगितलं जात आहे. सध्यातरी हा नवा लूक पूर्ण वेबसाइटवर लावण्यात आलेला नाही. यूजर्सना तसा जुन्या डिझाईनकडे परत जाण्याचाही पर्याय ठेवण्यात आला आहे. जो आपण परत कधीही वापरुन नवं किंवा जुनं डिझाईन कधीही बदलून वापरू शकता.

फेसबुकने याआआधी इंस्टाग्राम, फेसबुक अॅप, व्हॉट्सअॅप या त्यांच्या सेवांमध्ये डार्क मोड उपलब्ध करून दिलेला आहे. आता सर्व प्रमुख वेबसाइट्स व अॅप्सवर डार्क मोड उपलब्ध असून याचा वापर नक्की करा जेणेकरून तुमच्या डोळ्यांना होणारा त्रास किंवा त्यांवर पडणारा ताण कमी होईल आणि बॅटरी सुद्धा वाचेल!

The post फेसबुकची डेस्कटॉप वेबसाईट आता नव्या रूपात डार्क मोडसह! appeared first on MarathiTech - मराठीटेक.

गूगलच्या गूगल मॅप्स सेवेला आज १५ वर्षं पूर्ण होत आहेत. त्यानिमित्ताने गूगल मॅप्ससाठी आता नव्या लोगोचं अनावरण करण्यात आलं असून अॅपच्या डिझाईनमध्येसुद्धा बरेच बदल करण्यात आहेत. यासोबत काही नव्या सोयीसुद्धा यामध्ये जोडण्यात आल्या आहेत. गूगलने हे अपडेट नेहमीप्रमाणे यूजर्सना मॅप्समधील सेवा अधिक वेगाने व अचूक वापरता याव्यात या दृष्टीने हे बदल करण्यात आले आहेत. ८ फेब्रुवारी २००५ मध्ये सुरुवात झालेली ही सेवा आता जवळपास प्रत्येक स्मार्टफोन यूजरकडून वापरली जाते. इतर मॅपिंग सेवांसमोर गूगल मॅप्स नक्कीच खूप पुढे आहे.

नव्या अपडेटमध्ये नॅविगेशनवर अधिक भर देण्यात आला असून आता सेटिंग्समध्ये उपलब्ध असणारे काही महत्वाचे पर्याय अॅप उघडल्या उघडल्या खाली असलेल्या टॅबवरच पाहायला मिळतील. आता या खाली असलेल्या टॅबवर Explore, Commute, Saved, Contribute व Updates हे पर्याय पहायला मिळतील.

• Explore: या पर्यायात आपण जवळपास असलेल्या हॉटेल्स, कॅफे प्रेक्षणीय स्थळे यांची माहिती मिळवून रिव्यू पाहू शकाल
• Commute:  यामध्ये तुम्ही तुम्हाला ज्या ठिकाणी जायचं आहे त्याबद्दल उपलब्ध मार्ग, लागणारा वेळ, इ माहिती मिळेल.
• Saved: यामध्ये तुम्ही स्वतः साठवलेली स्थळे जसे की हॉटेल्स, कॅफे, मित्र किंवा नातेवाईकांचे घर अशी आधी सेव्ह केलेली ठिकाणे पाहू शकाल. ही सेव्ह केलेलीयादी शेयर सुद्धा करता येईल.
• Contribute: याद्वारे तुम्ही गूगल मॅप्समध्ये नसलेली माहिती जोडू शकाल. रिव्यू, फोटो, एखाद्या ठिकाणाचा फोन क्रमांक अशी सर्व माहिती गूगलला सुचवू शकाल.
• Updates: तुम्ही आधी भेट दिलेली ठिकाणे आणि त्यावर आधारित तुम्हाला आवडतील अशी इतर ठिकाणे यांची माहिती इथे मिळेल. शिवाय तुमच्या भागात नवे हॉटेल किंवा प्रेक्षणीय स्थळ झालं असल्यास त्याचीसुद्धा माहिती मिळेल.

अधिक माहिती : Google Maps is turning 15! Celebrate with a new look and features

Search Terms : Google Maps Completes 15 years Logo and App Design Update

The post गूगल मॅप्स आता नव्या लोगोसह नव्या रूपात उपलब्ध : सेवेला १५ वर्षं पूर्ण! appeared first on MarathiTech - मराठीटेक.