काही दिवसांपूर्वी अँथ्रोपिक (Anthropic) या AI क्षेत्रातील आघाडीच्या कंपनीने त्यांच्या Claude AI सेवेमधील Cowork Agent साठी ११ नवीन प्लगइन्स आणले ज्याद्वारे जगभरातील कायदाविषयक, सेल्स (विक्रीविषयक), मार्केटिंग आणि डेटा अॅनॅलिसिस कामे ऑटोमेट म्हणजेच या AI Agent द्वारे स्वयंचलित करता येऊ शकतात.

• लीगल (Legal) आणि करारांची पडताळणी: वकिलांच्या किंवा लीगल टीमच्या मदतीशिवाय कायदेशीर कागदपत्रे वाचणे, समजून घेणे आणि त्यावर कार्यवाही करणे.
• कोडिंग आणि डेटा ॲनालिसिस: ज्युनिअर इंजिनिअर्स जी कामे तासनतास करत असत, ती कामे हे AI एजंट काही मिनिटांत आणि अधिक अचूकपणे करू शकते.
• स्वयंचलित वर्कफ्लो: सेल्स, मार्केटिंग आणि ॲडमिनशी संबंधित कामे (उदा. ईमेल पाठवणे, रिपोर्ट्स बनवणे) पूर्णपणे ऑटोमेट करणे.

या नव्या टूलमुळे SaaS म्हणजेच सॉफ्टवेअर अॅज ए सर्व्हिस प्रकारचा सेवा देणाऱ्या मोठ्या कंपन्यांचा व्यवसाय कमी होऊ शकतो अशी भीती दिसू लागल्याने आधी अमेरिकेतील स्टॉक मार्केट आणि आज भारतातील स्टॉक मार्केटमधील आयटी कंपन्यांचे शेयर्स मोठ्या प्रमाणात घसरले आहेत!

NIFTY IT निर्देशांक जवळपास 6.3% ने घसरला असून ही मार्च २०२० नंतरची सर्वात मोठी घसरण असेल. Infosys, TCS, Wipro, HCL Tech आणि Persistent Systems यांच्या शेअर्समध्ये सुमारे ४ ते ७% पर्यंत घसरण झाली. काही कायदा-सॉफ्टवेअर कंपन्यांचे शेअर्स १०%-२०% पर्यंत खाली आलेत.

सोप्या भाषेत सांगायचे तर, अमेरिकन आणि युरोपियन क्लायंट्ससाठी कोडिंग, टेस्टिंग आणि मेंटेनन्सची कामे करण्यासाठी भारतीय कंपन्या हजारो इंजिनिअर्सना कामावर ठेवतात. जर AI एजंट एका तासात १० माणसांचे काम करू लागले, तर IT कंपन्यांचे ‘बिलिंग’ (Billable Hours) कमी होतील. कोडिंग, टेस्टिंग आणि डेटा एंट्रीसारखी जी कामे फ्रेशर्स किंवा ज्युनिअर लेव्हलवर केली जात होती, ती आता AI स्वतः करू शकेल. त्यामुळे क्लायंट्सना मोठ्या IT टीमची गरज उरणार नाही.

‘SaaSpocalypse‘ ची भीती: जागतिक स्तरावर याला ‘SaaSpocalypse’ (सॉफ्टवेअर-ॲज्-अ-सर्व्हिसचा अंत) असे म्हटले जात आहे. जर AI स्वतः सॉफ्टवेअर डेव्हलप आणि मॅनेज करू शकत असेल, तर महागड्या सॉफ्टवेअर सबस्क्रिप्शनची गरज कमी होईल.

अँथ्रोपिकच्या नवीन प्लग्इन्समुळे “AI आता माणसांची जागा घेण्यास सज्ज झाले आहे,” हा संदेश गेला आहे. यामुळे भारतीय IT कंपन्यांच्या मनुष्यबळ-आधारित (Manpower-heavy) बिझनेस मॉडेलवर प्रश्नचिन्ह उभे राहिले आहे. आपण सध्या AI टूल्समध्ये ChatGPT किंवा Gemini चाच वापर करताना पाहत असतो मात्र सॉफ्टवेअर कोडिंग किंवा आयटीमधील सेवांमध्ये Claude AI त्यांच्यापेक्षा चांगलं मॉडेल देत आहे.

गेले काही महिने अनेक आयटी कंपन्यांमध्ये कर्मचारी कपात सुरू असून कोरोना काळात मोठ्या प्रमाणात झालेली भरती हे कारण सांगितलं जात होतं. आता मात्र स्पष्टपणे AI मुळेच पुढील नोकऱ्यांचं प्रमाण कमी होत आहे हे दिसून येत आहे. आता या नव्या टूल मुळे तर थेट कंपन्यांच्याच भविष्याबद्दल मार्केटच्या मनात शंका उत्पन्न झाली आहे त्यामुळेच ही शेयर्सची पडझड दिसून येत आहे.

The post Anthropic च्या नव्या AI प्लगइन्समुळे जगभरात आयटी शेयर्स घसरले! appeared first on MarathiTech - मराठीटेक.

ॲपल आज जगातली पहिली ३ ट्रिलियन डॉलर्स मार्केट कॅपिटल असलेली कंपनी बनली आहे. रुपयांमध्ये सांगायचं तर तब्बल ~ २२२ लाख कोटी रुपये भागभांडवल! ॲपलची यावेळी मायक्रोसॉफ्टसोबत स्पर्धा होती! मात्र शेवटी ॲपलने पुन्हा एकदा बाजी मारत हा बहुमान पटकावला आहे!

ऑगस्ट २०१८ मध्ये पहिली १ ट्रिलियन डॉलर्स मार्केट कॅपिटल असलेली कंपनी बनली होती. त्यानंतर दोन वर्षांनी २ ट्रिलियन डॉलर्स आणि आता जानेवारी २०२२ मध्ये 3 ट्रिलियन डॉलर्स भागभांडवल असलेली कंपनी बनली आहे! अर्थात मार्केट स्थितीनुसार त्या शेयरचीही किंमत काही वेळातच खाली आली आणि त्यांचं सध्याचं मार्केट कॅप 2.9 ट्रिलियन डॉलर्सवर आहे.
९ जानेवारीला ॲपलच्या स्टीव्ह जॉब्स यांनी आयफोनचं अनावरण करून १५ वर्षे पूर्ण होणार आहेत.

मोठ्या प्रमाणात विक्री होणाऱ्या आयफोन्स, मॅकबुक्स, आयमॅक, वॉच, आयपॅड अशा उपकरणांसोबत ॲपल टीव्ही, ॲपल म्युझिक अशा सेवांमुळे त्यांचं उत्पन्न अनेक पटींनी वाढलं आहे! चीन या जगातल्या सर्वात मोठ्या स्मार्टफोन मार्केटमध्येही ॲपल पहिल्या स्थानी आहे. ॲपलला एकूण उत्पन्नापैकी जवळपास ५२ टक्के उत्पन्न केवळ आयफोन्सच्या विक्रीमधून प्राप्त होत आहे!

अनेकांनी यावर ॲपल उपकरणे पुसण्याचं कापड आणून त्याची किंमत फक्त १,९०० रुपये ठेवून त्यांचं हे कॅपिटल मोठं करत आहे अशा आशयाने त्यांच्या उपकरणांच्या वाढलेल्या किंमतीवर भाष्य केलं आहे! येत्या काळात ॲपल स्वतःची इलेक्ट्रिक कारसुद्धा सादर करणार असल्याची चर्चा नेहमी सुरू असते. शिवाय लवकरच VR हेडसेटसुद्धा आणणार असल्याची शक्यता आहे.

जगात सर्वात जास्त मार्केट कॅप असलेल्या कंपन्या

1. ॲपल : 2.9 ट्रिलियन डॉलर्स
2. मायक्रोसॉफ्ट : 2.5 ट्रिलियन डॉलर्स
3. अल्फाबेट (गूगल) : 1.9 ट्रिलियन डॉलर्स
4. ॲमेझॉन : 1.6 ट्रिलियन डॉलर्स
5. टेस्ला : 1 ट्रिलियन डॉलर्स

स्थापनेनंतर ४२ वर्षात ॲपलने १ ट्रिलियनचा टप्पा गाठला होता आणि त्यानंतर ४ वर्षात हा नवा टप्पा गाठला असून याआधी तब्बल ११७ वर्षांपूर्वी १९०१ मध्ये यूएस स्टीलने 1 बिलियन डॉलर्सचा टप्पा ओलांडला होता. पेट्रो चायनानेसुद्धा एका दिवसासाठी 1 ट्रिलियनचा टप्पा ओलांडला होता. तसेच जर आधीच्या ऑइल कंपन्यांचे सध्याच्या चलनामध्ये रूपांतर केल्यास या जुन्या कंपन्या कित्येक पटीने पुढे असतील मात्र या कंपन्या आता शक्यतो विभाजित झालेल्या आहेत.

ॲपलची मार्केटमधील सद्यस्थिती जाणून घेण्यासाठी लिंक : Apple (AAPL) Current Share Stats

search terms : Apple first company to cross $3 trillion market cap US nasdaq

The post ॲपल बनली आहे 3 ट्रिलियन डॉलर्स भागभांडवल असलेली जगातली पहिली कंपनी! appeared first on MarathiTech - मराठीटेक.

अॅपल काही क्षणांपूर्वीच जगातली पहिली ट्रिलियन डॉलर्स मार्केट कॅपिटल असलेली कंपनी बनली आहे. रुपयांमध्ये सांगायचं तर तब्बल ~ ६८ लाख कोटी रुपये भागभांडवल! अॅपलसोबत अल्फाबेट(गूगल), अमॅझॉन, मायक्रोसॉफ्ट, फेसबुक या कंपन्यांमध्ये स्पर्धा होती! मात्र शेवटी अॅपलने बाजी मारत हा मान पटकावला आहे!

आयमॅक, आयपॅड, मॅकबुक, आयपॉड, आयफोन, अॅपल वॉच अशी उपकरणे आणि त्यांच्यासाठी लागणारं सॉफ्टवेअर बनवणाऱ्या अॅपल कंपनीची स्थापना स्टीव्ह जॉब्ज आणि स्टीव्ह वॉझ्निअॅक यांनी १९७६ मध्ये केली होती. आजच अॅपलच्या शेअर्सनी $207.05 चा टप्पा ओलांडून ही किमया साधली आहे. काल उत्तम आर्थिक निकाल जाहीर झाल्यावर लगेच हा टप्पा ओलांडला गेला! २०११ नंतर सीईओ स्टीव्ह जॉब्जची जागा घेतलेल्या टीम कुक यांच्या नेतृत्वात अॅपलने तब्बल २०००% वाढ नोंदवली गेली आहे! 

Steve Jobs and Steve Wozniak

स्थापनेनंतर ४२ वर्षात अॅपलने हा टप्पा गाठला असून याआधी तब्बल ११७ वर्षांपूर्वी १९०१ मध्ये यूएस स्टीलने 1 बिलियन डॉलर्सचा टप्पा ओलांडला होता.  पेट्रो चायनानेसुद्धा एका दिवसासाठी 1 ट्रिलियनचा टप्पा ओलांडला होता. तसेच जर आधीच्या ऑइल कंपन्यांचे सध्याच्या चलनामध्ये रूपांतर केल्यास या जुन्या कंपन्या कित्येक पटीने पुढे असतील मात्र या कंपन्या आता शक्यतो विभाजित झालेल्या आहेत. दरम्यान आमच्यासाठी झालेली वाढ जगभर सर्वत्रच मजबूत होती असं मत अॅपलचे आर्थिक प्रमुख लुका मास्त्री यांनी व्यक्त केलं! शेअर्समध्ये कालपासून झालेली वाढ आर्थिक निकाल जाहीर केल्यामुळे झाली असून वॉल स्ट्रीटमधील तज्ज्ञांच्या अंदाजापेक्षासुद्धा अधिक चांगली कामगिरी नोंदवली आहे! गेल्या काही दिवसात झालेली वाढ आयफोन टेनच्या विक्रीमध्ये झालेली वाढ आणि त्यामुळे झालेला नफा यांचा परिणाम असल्याचं दिसून येतं. Apple (AAPL) Current Share Stats

अॅपलच्या या भागभांडवलाची इतक्यात तरी बरोबरी करणं शक्य होणार नाही मात्र येत्या काळात अमॅझॉन हा टप्पा गाठू शकेल मात्र तोपर्यंत अॅपलसुद्धा थोडी का होईना पुढे निघून गेलेली असेल! वॉल स्ट्रीटच्या नव्या अंदाजानुसार शेअर्सची किंमत $212 होईल त्यामुळे अॅपलचं मार्केट कॅपिटल 1.05 ट्रिलियन डॉलर्सवर पोहचेल!

search terms : Apple first company to cross $1 trillion market cap US nasdaq

The post अॅपल बनली आहे 1 ट्रिलियन डॉलर्स भागभांडवल असलेली जगातली पहिली कंपनी! appeared first on MarathiTech - मराठीटेक.