Sports Archives - MarathiTech - मराठीटेक

फुटबॉलपटू रोनाल्डोचं यूट्यूब चॅनल : २४ तासात तब्बल २ कोटी सबस्क्रायबर्स!

Sooraj Bagal — Thu, 22 Aug 2024 12:23:52 +0000

प्रसिद्ध फुटबॉलपटू क्रिस्तियानो रोनाल्डोने काल स्वतःचं यूट्यूब चॅनल सुरू केलं असून पहिल्याच दिवशी या चॅनलने अनेक विक्रम केले आहेत. अवघ्या ९० मिनिटात दहा लाख सबस्क्रायबर्स पूर्ण झाले होते. आत्तापर्यंत सर्वाधिक वेगाने दहा लाख सबस्क्रायबर्स आणि एक कोटी सबस्क्रायबर्सचा टप्पा ओलंडण्याचा विक्रम रोनाल्डोच्या नावे झाला आहे.

यापूर्वीचा सर्वाधिक वेगाने एक कोटी सबस्क्रायबर्सचा टप्पा ओलंडण्याचा विक्रम Mr Beast च्या नावे होता आणि त्याला १३२ दिवस लागले होते. रोनाल्डोला ते करण्यासाठी फक्त १२ तास लागले! आता २४ तास पूर्ण व्हायच्या आत कदाचित २ कोटी म्हणजेच 20 Million सबस्क्रायबर्ससुद्धा पूर्ण होतील! (लेख प्रकाशित केल्या नंतर हा सुद्धा विक्रम झाला आहे!)

रोनाल्डोच्या यूट्यूब चॅनलची लिंक : https://www.youtube.com/@cristiano

रोनाल्डो इतर सोशल मीडिया प्लॅटफॉर्मवरही बराच प्रसिद्ध आहे!

Instagram : ६३.६ कोटी (636 Million)
Facebook : १७ कोटी (170 Million)
X (Twitter) : ११.२ कोटी (112 Million)

यूट्यूबने लगेचच गोल्डन प्ले बटनसुद्धा पाठवलं असून त्याबद्दल रोनाल्डोने व्हिडिओसुद्धा प्रकाशित केला आहे.

The post फुटबॉलपटू रोनाल्डोचं यूट्यूब चॅनल : २४ तासात तब्बल २ कोटी सबस्क्रायबर्स! appeared first on MarathiTech - मराठीटेक.

आयपीएलचं मराठी समालोचन (कॉमेंट्री) हॉटस्टारवर! #IPL2021

Sooraj Bagal — Fri, 09 Apr 2021 06:19:56 +0000

इंडियन प्रीमियर लीग म्हणजेच क्रिकेटप्रेमींसाठी पर्वणी असलेलं आयपीएल आजपासून सुरू होत आहे. या निमित्ताने हॉटस्टारवर लाईव्ह क्रिकेट कॉमेंट्री आपल्या मराठी भाषेत ऐकायला मिळणार आहे! डिज्नी प्लस हॉटस्टारवर ऑडिओ फीडमध्ये मराठी भाषा निवडा आणि आजचा आयपीएलचा पहिला सामन्यात मराठी समालोचनाचा आनंद घेत पहा.

आयपीएल २०२१ चा पहिला सामना मुंबई इंडियन्स आणि रॉयल चॅलेंजर्स बेंगलोर यांच्यामध्ये होणार आहे. आज ९ एप्रिल संध्याकाळी ७.३० वाजता हा सामना सुरू होईल.

सामना पाहत असताना स्क्रीनवर Language बटन्स दिसतील त्यामधून मराठी भाषा निवडा

या मराठी कॉमेंट्रीसाठी क्रिकेटपटू विनोद कांबळी, संदीप पाटील, अमोल मुजुमदार, स्नेहल प्रधान, कुणाल दाते, प्रसन्न संत आणि चैतन्य संत यांचा समावेश करण्यात आला आहे. यामधील बरेच जण स्वतः आंतरराष्ट्रीय क्रिकेटपटू असल्याने त्यांचा अनुभव प्रेक्षकांना सामना पाहत असताना विविध अंगी विश्लेषण रूपात ऐकायला नक्कीच आवडणार आहे.

स्टार स्पोर्ट्सने ट्विटरवर दिलेल्या माहितीनुसार Star Sports Marathi नावाच्या वाहिनीवरून टीव्हीवर मराठी समालोचन पाहू शकता. मात्र ही वाहिनी जवळपास कोणत्याही प्रमुख डीटीएच ऑपरेटरकडे उपलब्ध झालेली दिसत नाही. त्यामुळे सध्यातरी मराठी समालोचन टीव्हीवर उपलब्ध नसेल. त्यासाठी इंटरनेट आधारित टीव्ही/फायर टीव्ही सारखे स्ट्रीमिंग उपकरण असेल तर त्याद्वारे हॉटस्टारवर हे समालोचन मराठीत ऐकता येईल.

हे उपलब्ध होत आहे तर मराठी प्रेक्षकांनी सुद्धा त्याला प्रतिसाद द्यायला हवा. तरच हे पुढे सुरू राहू शकेल. इतर भाषांऐवजी मराठी भाषेत सेवा वापरण्यास प्राधान्य दिल्यास साहजिकच तिथे मराठी लोकांना संधी द्यावी लागेल पर्यायाने आपणा सर्वांचा त्यामध्ये फायदा होत जाईल.

इतर वेळी आपल्याला मराठी समालोचन ऐकायला मिळत नाही मात्र सुनंदन लेले त्यांच्या सोशल मीडिया पेजवरून विविध क्रिकेटपटूंच्या मराठीत मुलाखती सामन्यानंतर शेयर करत असतात.

#IPL2021 starts tomorrow and I'm thrilled to share that I'm going to be part of a very talented commentary team calling the action in Marathi!

Watch the game with us on @DisneyPlusHS, change the language in settings! Nakki ya! pic.twitter.com/jupt8klQby
— Snehal Pradhan (@SnehalPradhan) April 8, 2021

Search Terms : How to watch IPL 2021 online in Marathi, Disney Plus Hotstar IPL Commentary in Marathi Live MI vs RCB

The post आयपीएलचं मराठी समालोचन (कॉमेंट्री) हॉटस्टारवर! #IPL2021 appeared first on MarathiTech - मराठीटेक.

जिओ टीव्हीवर पुढील पाच वर्षे भारताचे क्रिकेट सामने मोफत पाहता येणार!

Sooraj Bagal — Fri, 21 Sep 2018 07:15:00 +0000

रिलायन्स जिओच्या स्वस्त इंटरनेटमुळे ग्राहकांना स्पर्धेच्या रूपात बराच फायदा झाला. त्यानंतर जिओने त्यावरच न थांबता कंटेंटच्या दृष्टीने सुद्धा मोठे प्रयत्न केले असून जिओ प्राईम ग्राहकांना जिओ टीव्ही, जिओ म्युझिक सारख्या अनेक सोयी चक्क मोफत मिळतात. आता याच Jio TV अॅपवर ग्राहक येत्या पाच वर्षात होणारे सर्व क्रिकेट सामने मोफत पाहता येणार आहेत! याबाबत स्टार इंडियासोबत त्यांचा नुकताच करार झाला असून T20, एकदिवसीय, कसोटी सामने जिओ टीव्हीवर उपलब्ध होणार आहेत! हे सामने अर्थातच हॉटस्टारवर सुद्धा प्रसारित होतीलच

जिओ टीव्हीवर हे सामने पाहण्यासाठी ग्राहकांना प्लॅन सुरु असलेलं जिओ सिम लागेल याशिवाय काहीही शुल्क न देता सर्व सामने लाईव्ह स्ट्रीमिंगद्वारे पाहता येतील! जिओ प्राईमची नोंदणी जी अजूनही मोफतच असल्यासारखी सुरु आहे त्याद्वारे हे सामने दाखवले जाणार आहेत.

Jio TV on Google Play

जिओ टीव्ही अॅप अँड्रॉइड व iOS दोन्हीवर उपलब्ध आहे. जुलै महिन्यात जिओ सर्वाधिक वापरकर्त्यांच्या यादीत दुसऱ्या क्रमांकावर पोहोचली आहे.

The post जिओ टीव्हीवर पुढील पाच वर्षे भारताचे क्रिकेट सामने मोफत पाहता येणार! appeared first on MarathiTech - मराठीटेक.

क्रिकेट ‘अॅप’ले

Sooraj Bagal — Mon, 28 Apr 2014 21:00:00 +0000

ठाण्यात मतदान पार पडल्यानंतर निवडणुकीचा फिवर आता कमी झाला आहे. मतदान होईपर्यंत आयपीएलच्या मॅचेसकडे सगळ्यांचं काहीसं दुर्लक्ष होत होतं. पण आता १६ मे रोजी निवडणुकांचे निकाल लागणार असल्याने राजकारण जरा बाजूला पडेल. तोवर चर्चा रंगेल ती आयपीएलची. क्रिकेटफॅन्सना अपडेट ठेवण्यासाठी अनेक अॅप्स मार्केटमध्ये आले असून त्यांचं डाऊनलोडिंग वाढताना दिसेल.

गेल्या काही दिवसांत निवडणुकांशी संबंधित पोस्ट, मेसेजेस, अॅप्लिकेशन्सची मार्केटमध्ये चर्चा होती. पण आता नाक्या-नाक्यावर चर्चा रंगेल क्रिकेटचीच. स्मार्टफोनच्या दुनियेत सगळं काही फोनवरुन जाणून घेतलं जाते. हातातल्या मोबाइल फोनवर क्रिकेटमॅचचा स्कोअर बघण्यापासून मॅचचे हायलाइट्स बघण्याचा मनसोक्त आनंद लुटता येईल तो विविध अॅप्सच्या माध्यमातून. यासाठी मार्केटमध्ये नवनवीन क्रिकेट अॅप्स आले आहेत. तुम्ही फक्त हे अॅप्लिकशन आपल्या स्मार्ट मोबाइल फोनमध्ये डाऊनलोड केलं की सबकुछ तुमच्या मुठ्ठीमध्ये असेल. अशाच काही अॅ‌प्सविषयी…

आयपीएल: आयपीएल क्रिकेटचं हे एक अधिकृत अॅप्लिकेशन आहे. इथे तुम्हाला लाइव्ह स्कोअर समजतो. तसंच तुम्हाला व्हिडीओ हायलाइट्स, डिटेल शेड्यूल, खेळाडूंची संपूर्ण माहिती मिळते.

क्रिकइन्फो: हे अॅप्लिकशन तुम्हाला क्रिकेटसंबंधित सर्व माहिती पुरवतं. त्याव्यतिरिक्त तुम्हाला ऑडिओ, व्हिडीओ क्लिप्स मिळतात आणि मॅचची माहिती, त्याबद्दलचे नोटिफिकेशन्स आणि अॅलर्टस मिळतात.

अधिकृत डीटीएच अॅप्लिकेशन अॅप: हे अॅप लाइव्ह टीव्ही अॅप्लिकेशन अर्थात डिजीटल टीव्हीवरच वापरू शकतो. यासाठी आपल्याला महिन्याभराचे पैसे द्यावे लागतात किंवा हे अॅप तुम्ही चालू केबल कनेक्शनसोबतसुद्धा जोडू शकता.

नेक्स्ट जनरेशन टीव्ही: या अॅपमुळे तुम्ही तुमच्या फोनच्या डेटा कनेक्शनवर लाइव्ह टीव्ही पाहू शकता. तसंच हे अॅप तुम्हाला अॅड्जस्ट पिक्चर क्वालिटीसारख्या सुविधाही देतो. तसंच क्रिकेटप्रेमींसाठी स्मार्ट टीव्ही, एक्स्ट्रा लार्ज स्क्रीन टीव्ही, कर्व्ह टीव्ही असे काही टीव्हीचे मॉडेल्सही मार्केटमध्ये आले आहेत. त्यावर क्रिकेट मॅच बघणं हा एक मस्त अनुभव ठरू शकेल.

The post क्रिकेट ‘अॅप’ले appeared first on MarathiTech - मराठीटेक.

गेमस्थ : Top Games currently

Sooraj Bagal — Sat, 11 Jan 2014 07:00:00 +0000

गेम्स खेळण्यात रमणे हे कुणाला आवडत नाही? कामाचा, अभ्यासाचा वा आणखी कुठला ताण वाटला की थोडे विश्रांत होण्यासाठी मोबाइलवर किंवा अगदी संगणकावर गेम खेळणे कुणीही टाळत नाही. यामुळे सध्या बाजारात असलेल्या व नव्या वर्षांत बाजारात येणार असलेल्या गेम्सविषयी आपण माहिती करून घेऊयात.

ग्रान टुरिझ्मो ६ : सोनी प्ले स्टेशनने नुकतेच भारतात लाँच केलेल्या ‘ग्रान टुरिझ्मो ६’ या गेमिंग कन्सोलमध्ये आपल्याला भरपूर नवनवे गेम्स मिळणार आहेत. हे सर्व गेम वेगवान आहेत. यामध्ये आपल्याला १२०० हून अधिक गाडय़ा असलेल्या कार रेसिंग चॅम्पियनशिप गेम खेळता येणार आहे. यामध्ये देण्यात आलेली ‘लुनार रोवर व्हेइकल’ जर तुम्ही अनलॉक केली, तर तुम्हाला परग्रहावरील वातावरणाचा अनुभव देणारी स्क्रीन उपलब्ध होईल. इतकेच नव्हे, तर तुम्हाला अनोखी रेसही खेळता येणार आहे. याशिवाय या माध्यमातून आपल्याला ऑनलाइन गेमिंगमध्येही सहभागी होता येणार आहे. यामध्ये वापरण्यात आलेले नवे तंत्रज्ञान हे या कन्सोलची खासियत असणार आहे. याशिवाय २०१०मधील रेड बुल एक्स सीरिज या कन्सोलमध्ये आपल्याला नव्याने खेळता येणार आहे. रेडबुल एक्स २०१४ ही आवृत्ती यासाठी बाजारात आणली आहे.

बायोशॉक इन्फिनिट : कोलंबिया शहरात हीरोला एक मुलगी सापडते आणि तिच्यावरून सुरू होणारी कहाणी या गेममध्ये विविध टप्प्यांमध्ये रंगवण्यात आली आहे. यामधील हीरो आपण असलो तरी यात येणाऱ्या अडचणींवर मात करत तिची सुटका करून आपल्या ताब्यात आणणे खूप जिकिरीचे काम आहे. यामध्ये आपल्याला केवळ मज्जाच करता येते असे नाही, तर बुद्धीचाही वापर करावा लागतो. समोरून अनपेक्षितपणे येणारी आव्हाने स्वीकारण्यासाठी सज्ज राहावे लागते. जर तुम्हाला गोष्टी ऐकायला किंवा सांगायला आवडत असेल, तर नक्कीच तुम्ही हा गेम एन्जॉय करू शकता. यामध्ये याच संकल्पनेवर आधारित विविध गेम्स देण्यात आले आहेत. यामध्ये देण्यात आलेली कथा खरोखरीच प्रोत्साहन देणारीही आहे.

कंपनी ऑफ हीरोज :दुसऱ्या महायुद्धावर अनेक संगणकीय गेम्स आले आहेत, पण यातील हा गेम म्हणजे सर्वात लोकप्रिय आहे. हा गेम प्रत्यक्षात २००६ मध्ये बाजारात आला. तरी त्याच्या प्रत्येक आवृत्तीने बाजारात लोकप्रियतेचे शिखर गाठले आहे. या गेममध्ये भरपूर पात्र असून शत्रुपक्षाचा खात्मा करण्यासाठी आपल्याला कधी बुद्धीचा, तर कधी बळाचा वापर करावा लागतो. योजनाबद्ध आक्रमणाची आखणी करण्याची यामध्ये गरज असून ही करण्यासाठी आपल्याला यात काही क्लू देण्यात आले आहेत. त्याचा वापर करून योग्य आखणी करणे आणि शत्रुपक्षाचा नियोजित वेळेत खात्मा करण्याचे आव्हान आपल्याला पेलायचे असते. यामध्ये वापरण्यात आलेले ग्राफिक्स आणि त्याचा आवाज हे अत्याधुनिक असून त्याचा प्रभाव गेम खेळताना खूप चांगल्या प्रकारे पडत असतो.

फिफा १४ : फुटबॉलचा वर्ल्ड कप हा सध्या भारतीय तरुणांचा चांगलाच चर्चेचा विषय बनला आहे. नाक्यावर प्रत्येक जण एक एक फुटबॉलपटूच झाल्यासारखा वावरत असतो आणि चर्चाही करत असतो; पण प्रत्यक्ष मैदानात नाही, पण संगणकीय मैदानात जाऊन खेळण्याची संधी आपल्याला या गेमच्या माध्यमातून मिळू शकते. यात आपण अगदी मेस्सी, रोनाल्डोपासून कुणीही आपला आवडता फुटबॉलपटू होता येते. या गेमचे व्हर्जन आपल्याला नव्या वर्षांत उपलब्ध होणार असून या गेममध्ये आपल्याला खिळवून आणि खेळवत ठेवण्याची चांगलीच क्षमता आहे.

बॅटमन : वॉर्नर ब्रदर्सनी विकसित केलेल्या गेम्सपैकी हा एक गेम आहे. हा गेम विंडोज, पीएस ३, एक्सबॉक्स ३६० वर खेळता येऊ शकतो. या गेममध्ये आपल्याला शत्रूंचा खात्मा करणाऱ्या बॅटमनची भूमिका बजावायची असते. यामुळे आपल्याला हीरो असल्याची भावना निर्माण होऊन आपण हा गेम खूप जास्त एन्जॉय करत असतो. या गेममध्ये काही फारसे वेगळे नसले तरी हा गेम खूप लोकप्रिय आहे. याचे कारण म्हणजे हा गेम खेळताना खूप जास्त मज्जा येत असते. यामध्ये तयार करण्यात आलेली शत्रूंची चाल आणि त्यातून लढणारा बॅटमन आपल्याला गोष्ट सांगतो आणि विचार करायलाही भाग पाडत असतो.

बॅटल फिल्ड ४ : तुम्हाला युद्धाच्या खेळांची आवड असेल तर हा गेम खूप जास्त तुम्ही एन्जॉय करू शकतात. यामध्ये केवळ भूदलाशीच युद्ध नसून हे युद्ध वायू तसेच नौसेनेशीही आहे. यामुळे या गेमला एक वेगळे वळण देण्यात आले आहे. हा गेम म्हणजे आपल्याला एन्जॉयमेंटबरोबरच युद्धाच्या वेळी करण्यात येणाऱ्या आखण्यांची माहितीही करून देत असतो. यामध्ये इनबिल्ट देण्यात आलेली माहिती ही खऱ्या युद्धाच्या वेळी वापरण्यात येणाऱ्या माहितीपैकी आहे. यामध्ये युद्ध करण्यासाठी आपल्याला शहरात, जंगलात, पाण्यात कुठेही जावे लागते. हे सर्व लक्षात घेऊन तयार करण्यात आलेले याचे ग्राफिक्स आणि साऊंड खूप चांगल्या प्रकारे विकसित करण्यात आले आहेत.
Also GTA V is great Option Check It Here >>

The post गेमस्थ : Top Games currently appeared first on MarathiTech - मराठीटेक.