आतापर्यंत क्विकर, ओएलएक्सवर जुन्या तसेच नव्या मोबाईल, गाड्या, लॅपटॉप सारख्या हायटेक वस्तू आणि घर, जमीन अशा स्थावर मालमत्तेच्या खरेदी-विक्रीचे ऑनलाइन व्यवहार व्हायचे. मात्र आता या ऑनलाइन शॉपिंगचा ट्रेण्ड गावागावात पोहचला आहे.
‘मला गाय विकायची आहे. हा माझ्या गायीचा फोटो. ही आहे गायीची माहिती आणि ही मला अपेक्षित असलेली किंमत’ अशा स्वरुपात प्रॉडक्ट संदर्भात माहिती अपडेट केल्यावर लगेचच शेतक-यांना गायीसाठी चांगले गि-हाईक मिळू लागले आहेत. ओएलक्स, क्विकर सारख्या जुन्या-नव्या वस्तूंचे बायर टू सेलर असे सर्वात मोठे ऑनलाइन मार्केट असणा-या वेबसाईटवर ग्रामीण भागातील ग्राहकांची संख्या वेगाने वाढत आहे.
ग्रामीण आणि दुय्यम दर्जांच्या शहरामधून आमच्या साईटवर येणा-या ग्राहकांची संख्या वाढत असून त्यांच्याकडील प्रॉडक्टची ते आमच्या साईट्समार्फत खरेदी-विक्री करत असल्याची माहिती क्विकर, ओएलएक्सच्या अधिका-यांनी दिली. पश्चिम बंगाल, तामिळनाडू, कर्नाटक, महाराष्ट्र, ओदीशा, आसाम आणि उत्तर प्रदेश या सात राज्यातील शेतकरी प्रामुख्याने आमच्या साइटवर येतात. त्यांचे शेतीशी संबंधित अनेक व्यवहार आमच्या साइटच्या माध्यमातून होतात, अशी माहिती क्विकर, ओएलएक्सच्या अधिका-यांनी दिली. मागील काही दिवसांमध्ये आमच्या साइटवरुन शेती क्षेत्राशी संबंधित व्यवहार वाढल्याचे अधिका-यांनी सांगितले.
