‘गुगल लॅब्ज’मधील अनोखी फीचर्स

भारतामध्ये आणि एकंदरीतच जगभरात जी-मेल वापरणाऱ्यांची संख्या लक्षणीय आहे. जी-मेलची फीचर्स युझर्सना भावत असल्याचे हे लक्षण आहे. युझर्सची गरज लक्षात घेऊन सातत्याने काहीतरी प्रयोग करून नवी फीचर्स आणण्याचा जी-मेलचा प्रयत्न असतो. या फीचर्सचा शोध जी-मेल लॅब्जमध्ये घेता येतो. ‘लॅब्ज’मध्ये जाण्यासाठी ‘जी-मेल’च्या विंडोमध्ये उजव्या बाजूला वर दिसणाऱ्या गिअरवर क्लिक करावं. त्यातील ‘सेटिंग्ज’वर क्लिक केल्यानंतर काही आडवे ऑप्शन्स दिसतात. त्यापैकी ‘लॅब्ज’वर क्लिक करावं. त्यातच तुम्हाला वेगवेगळी फीचर्स दिसतील. त्या प्रत्येक फीचरच्या नावाखाली त्याचा छोटा प्रीव्ह्यू, थोडी माहिती आणि शेजारी ‘एनेबल’ आणि ‘डिसेबल’चे ऑप्शन दिलेले असतात. आपल्याला हवे असलेले फीचर एनेबल करून ‘सेव्ह चेंजेस’वर क्लिक केलं, की त्या फीचरचा वापर आपल्याला करता येतो.

काही फीचर्स : 

गुगल व्हॉइस प्लेयर : हे फीचर एनेबल केल्यानंतर ‘जी-मेल’मध्ये आलेली व्हॉइस क्लिप आपल्याला तिथेच ऐकता येते.

ग्रीन रोबो : चॅटला ऑनलाइन असलेल्या व्यक्तींची विविध स्टेटस आपल्याला दिसत असतात. त्यातील ज्या व्यक्ती अँड्रॉइड मोबाइलवरून जी-मेल वापरत असतील, त्यांच्या नावापुढील चिन्ह या फीचरमुळे रोबोसारखे दिसते.

एसएमएस इन चॅट : हे फीचर इनेबल केल्यानंतर आपल्याला आपल्या चॅट लिस्टमध्ये असलेल्या व्यक्तींना त्यांच्या मोबाइल नंबरवर एसएमएस पाठवता येतो. त्यांनी त्या एसएमएसला रिप्लाय केल्यास तो आपल्या चॅटमध्येच येतो. थोडक्यात, या फीचरमुळे आपण कम्प्युटरवरून आपल्या प्रत्यक्ष ऑनलाइन नसलेल्या मित्राशी त्याच्या मोबाइलच्या माध्यमातून चॅटिंग करू शकतो.

गुगल कॅलेंडर : हे गॅजेट अॅड केल्यानंतर आपल्याला मेलबॉक्समध्ये डाव्या बाजूला गुगल कॅलेंडर दिसते. त्यामध्ये आपण ‘सेव्ह’ केलेले आगामी कार्यक्रम आदी माहिती दिसते. याशिवाय वेगवेगळ्या फीचरच्या साह्याने आपल्याला जी-मेलमध्ये आलेले गुगल मॅप्स, पिकासा किंवा फ्लिकरचे फोटो, ‘डॉक्स’ची डॉक्युमेंट यांचा प्रीव्ह्यू इनेबल करता येतो. पाठवलेला ई-मेल अर्ध्या मिनिटासाठी थांबवता येणाऱ्या फीचरची माहिती आपण आधीच्या भागात घेतली आहे. आपल्या गरजेनुसार यातील वेगवेगळी फीचर उपयोगी पडू शकतात.

अनिकेत कोनकर