AdFraud Archives - MarathiTech - मराठीटेक

ES File Explorer प्ले स्टोअरवरून काढून टाकलं : पुन्हा एकदा गैरप्रकार !

Sooraj Bagal — Mon, 29 Apr 2019 15:49:15 +0000

गेल्या आठवड्यात बझफीड न्यूजच्या माहितीनुसार प्ले स्टोअरवरील विविध अॅप्स जाहिरातींच्या माध्यमातून गैरप्रकार करत असल्याबद्दल लेख प्रसिद्ध केला होता. प्ले स्टोअरवर वाढलेली फ्री चीनी अॅप्सची संख्या आणि त्याद्वारे नेहमी होणारे गैरप्रकार अलीकडे वारंवार उघडकीस येत आहेत. यापैकी सध्या DO Global ने डेव्हलप केलेल्या अॅप्स मध्ये असा प्रकार होत असल्याच समोर आल्यावर त्यांचे सर्व अॅप्स प्ले स्टोअरवरून काढून टाकण्यात आले आहेत.

ES File Explorer अनेक वर्षांपासून लोकप्रिय फाइल मॅनेजर अॅप आहे. सोप्या सुटसुटीत व अनेक सुविधांनी युक्त असूनही मोफत असल्यामुळे बर्‍याच जणांची पहिली पसंती असते. मात्र काही वर्षांपूर्वी हे अॅप डेव्हलपरने चीनी कंपनीला विकलं आणि याची अधोगती सुरू झाली. त्यांनी लगोलग त्या अॅपमध्ये सगळीकडे जाहिराती लावून टाकल्या. आता आता तर इतक वाढल की यूजरच्या परवानगीशिवाय अॅप्स डाऊनलोड करणे, अश्लील जाहिराती दाखवणे असे प्रकार ह्या अशा अॅप्सद्वारे केले जात आहेत. आता ही DO Global या प्रकारात सापडली म्हणून हे अॅप्स डिलिट होतील मात्र अजूनही बर्‍याच चीनी कंपन्या उघडपणे असे अॅड फ्रॉड करत आहेत! यावेळी गूगलने तब्बल ४६ अॅप्स एकाचवेळी काढून टाकले आहेत!

मध्यंतरी CM फाइल मॅनेजर, क्लिनमास्टरवर अशीच कारवाई करण्यात आली होती. क्लिनर, मेमरी बुस्टर, बॅटरी बुस्टर अशा नावांखाली हे अॅप्स युजर्सच्या फोन्समध्ये प्रवेश मिळवतात आणि नंतर परवानगी शिवाय बरेच गैरप्रकार करण्यास सुरुवात करतात. विचित्र बातम्या, अश्लील जाहिराती, न सांगता फाइल्स/अॅप्स डाऊनलोड करणे इ. काही उदाहरणे सांगता येतील. तूर्तास DO Global कंपनीने माफी मागितली आहे. आता माफी मागून कोड तात्पुरता बदलून पुन्हा प्ले स्टोअरवर प्रवेश मिळवायचा आणि परत पहिले पाढे पंचावन्न …!

खरेतर गूगलने याकडे लक्ष देणं अपेक्षित आहे. इतक्या मोठ्या प्रमाणावर वापर केले जात असणार्‍या अॅप्समध्ये उघड असे प्रकार चालत असताना फार चर्चा सुरू होई पर्यंत वाट पाहणे नक्कीच अँड्रॉइड यूजर्ससाठी चांगली बाब नाही. अॅपल यासाठी खास जागरूक असतं. आयफोन्सवरील प्रत्येक अॅप स्वतः तपासून मगच ते अॅप स्टोअरवर उपलब्ध करून दिलं जातं. गूगल निदान यापुढे तरी तशा प्रकारे काळजी घेईल ही अपेक्षा…

मराठीटेकचा याबाबत असा सल्ला आहे की अशा अॅप्स पासून दूर रहा आणि केवळ मोफत आहे म्हणून कुठलही अॅप लगोलग इंस्टॉल करू नका. फाइल एक्सप्लोररसाठी Solid Explorer व Files GO हे उत्तम पर्याय आहेत.

The post ES File Explorer प्ले स्टोअरवरून काढून टाकलं : पुन्हा एकदा गैरप्रकार ! appeared first on MarathiTech - मराठीटेक.

CM फाइल मॅनेजर, किका किबोर्डची प्ले स्टोअरवरुन हकालपट्टी : जाहिरातींद्वारे गैरव्यवहार!

Sooraj Bagal — Wed, 05 Dec 2018 00:34:00 +0000

अनेकांच्या फोन्समध्ये इंस्टॉल्ड असलेले क्लिन मास्टर, CM फाईल मॅनेजर, किका किबोर्ड CM लाँचर, CM लॉकर असे अॅप्स डेव्हलप करणार्‍या चिता मोबाइल व किका टेक यांच्यावर गूगल प्ले स्टोअरने जाहिरातींचा गैरव्यवहार करून क्लिक्समध्ये वाढ करून वापरकर्त्याच्या परवानगीशिवाय कृती केल्याने कारवाई केली आहे.
या डेव्हलर्सचे अॅप्स गूगल प्ले स्टोअरवरून काढून टाकून त्यांचे Admob अॅड नेटवर्क थांबवण्यात आलं आहे!

अंतर्गत अभ्यासानंतर गूगलला या अॅप्सद्वारे नकळत अॅप्स इंस्टॉल केले जात असल्याच लक्षात आलं आहे. त्यावर कारवाई म्हणून ही अॅप्स प्ले स्टोअरवरून हटवण्यात आली आहेत.

अॅड क्लिक फ्रॉड हा प्रकार अँड्रॉइडमध्ये अनेक वर्षांपासून सुरु आहे. गूगल काही कारणाने यावर कारवाई करतच नाही. यांना जर सुरवातीलाच प्रतिबंध केला तर असे अॅप्स पसरण थांबवता येऊ शकत. असे अॅप्स इंस्टॉल केले की आपल्या फोन्स जाहिरातींनी आणि आपण न इंस्टॉल केलेल्या अॅप्सने भरून गेलेला दिसतो. क्लिन मास्टरसारख्या अॅप्स द्वारे आपला फोन काही क्षण वेगवान झाल्यासारखा वाटत असला तरी त्याची मोठी किंमत चुकवावी लागत असते हे बर्‍याच जणांना लक्षात येत नाही.

गूगल प्ले स्टोअर सुरक्षेच्या बाबतीत अॅपलच्या अॅप स्टोअरच्या बरच मागे आहे असं म्हणावं लागेल. अॅपल अॅप स्टोअरवरील येणार प्रत्येक अॅप स्वतः तपासून पाहतं! गूगल मात्र कोणीही टाकलेल कुठल्याही अॅपला प्ले स्टोअरवर थेट प्रवेश देतं जोवर ते अॅप नियमांच उल्लंघन करत आहे हे लक्षात येतं तोवर ते अॅप लाखो लोकांच्या फोन्समध्ये वापरात असतं!

खालील अॅप्सवर कारवाई करण्यात आल्याच गूगलकडून सांगण्यात आलं आहे:

Clean Master
CM Launcher 3D
Security Master
Battery Doctor
Cheetah Keyboard
CM Locker

यातल्या CM File Manager व Kika Keyboard २५ कोटी डाउनलोडस पूर्ण झालेत आहेत. याचा अर्थ इतक्या मोठ्या प्रमाणावर ह्या डेव्हलपरनी वापरकर्त्याना फसवून खोट्या/फसव्या जाहिराती दाखवल्या आहेत! चिता मोबाइल (Cheetah Mobile CM) यांच्या तर एकत्रित डाउनलोडसची संख्या २०० कोटींवर आहे! यावरून अंदाज लावला जाऊ शकतो यांनी अशा खोट्या जाहिरातीतुन किती मोठा पैसा कमवला असेल आणि कित्येकांच्या फोन्सवर न सांगता अॅप्स इंस्टॉल केले असतील! सध्या हा लेख लिहताना CM चे काहीच अॅप्स हटवलेले दिसत आहेत तर क्लिनमास्टर अजूनही पाहायला मिळत आहे. त्यांच्यावर नजर ठेऊन असल्याचं सांगितलं आहे.

मराठीटेकचा सल्ला असा आहे की असे क्लिन मास्टर, अॅप किलर , अमुक तमुक फाईल मॅनेजर/ब्राउजर अॅप्स वापरू नका. त्यांचा खर्‍या कामापेक्षा जाहिराती दाखवण्यासाठीच जास्त वापर केला जात आहे हे लक्षात घ्या.

search terms : google play store removes clean master and other cheetah mobile apps

The post CM फाइल मॅनेजर, किका किबोर्डची प्ले स्टोअरवरुन हकालपट्टी : जाहिरातींद्वारे गैरव्यवहार! appeared first on MarathiTech - मराठीटेक.