Study Archives - MarathiTech - मराठीटेक

लहान मुलांसाठी अॅमेझॉन प्राइम व्हिडिओ आणि यूट्यूब मोफत!

Sooraj Bagal — Sun, 29 Mar 2020 11:01:14 +0000

करोना व्हायरसमुळे सर्व ठिकाणे लॉकडाऊन स्थितीत आहेत. यामुळे विद्यार्थ्याना बाहेर जाऊन शिक्षण, खेळ अशा प्रकारच्या गोष्टी आणखी काही दिवस तरी करणे शक्य होणार नाहीये. अशा वेळी अॅमेझॉन, यूट्यूब या कंपन्यानी पुढाकार घेत खास लहान मुलांसाठी ऑनलाइन पर्याय उपलब्ध करून दिले आहेत. अॅमेझॉनने त्यांची प्राइम व्हिडिओ सेवा लहान मुलांना पूर्णपणे मोफत देण्यास सुरुवात केली आहे. यामध्ये किड्स अँड फॅमिली विभागातले चित्रपट, मालिका पाहता येतील. तर दुसरीकडे यूट्यूबने लहान मुलांच्या शैक्षणिक गोष्टींसाठी विविध पर्याय दिले आहेत. यामध्ये Learn@Home म्हणजेच घरबसल्या शिका हा नवा ऑनलाइन शैक्षणिक हब आणला आहे. अशा पर्यायांद्वारे या लॉकडाऊन/संचारबंदीच्या काळात लहानग्यांचं नक्कीच मनोरंजनासोबत विविध विषयांचा अभ्यास देखील होईल! हा लेख आपल्या घरी, नातेवाईक किंवा शेजाऱ्यांकडे असलेल्या लहान मुलांसाठी उपयोगी ठरू शकतो. कृपया हा लेख त्यांच्यासोबत नक्की शेयर करा.

यूट्यूबचं लर्न अॅट होम शैक्षणिक हब : https://learnathome.withyoutube.com

यूट्यूबने सादर केलेल्या Learn@Home द्वारे लहान मुले विविध विषयांची माहिती देणारे शैक्षणिक चॅनल्स, प्लेलिस्ट आणि सोबत आणखी माहिती एका जागी पाहू शकतील! या प्लॅटफॉर्मवर त्यांनी अनेक एज्युट्यूबर्स (शैक्षणिक माहिती देणारे यूट्यूब क्रिएटर्स) आणि संस्था जसे की खान अकॅडमी यांच्यासोबत भागीदारी केली आहे. खान अकॅडमी ही अशी संस्था आहे जी विद्यार्थ्यांसाठी सोप्या भाषेत गणित, विज्ञान, इतिहास, कला व इतर विषयांचे शैक्षणिक व्हिडिओ बनवते आणि ते जगभर सर्वांना मोफत उपलब्ध आहेत! अनेक शाळांनी तर शाळेतसुद्धा यांचे व्हिडिओ दाखवण्यास सुरुवात केली आहे.

या लर्न फ्रॉम होमसाठी त्यांनी तीन वयोगट तयार केले आहेत. प्रिस्कूलमध्ये जाणाऱ्यासाठी चॅनल, पाच वर्षाहून अधिक वय असणाऱ्यांसाठी चॅनल आणि १३ वर्षाहून अधिक वय असणाऱ्यांसाठी चॅनल. या वयोगटानुसार वेगवेगळे चॅनल्स दाखवले जातील आणि यामध्ये सुचवले जाणारे चॅनल्स/व्हिडिओ यांची निवड यूट्यूबने स्वतः केलेली आहे. John and Hank Green’s CrashCourse and SciShow, Discovery Education, mathman1024, Physics Girl, Mother Goose Club व Sesame Street हे यापैकी काही प्रमुख चॅनल्स… हा सर्व कंटेंट सध्यातरी फक्त इंग्लिशमध्येच उपलब्ध होणार आहे.

शिक्षकांनाही ऑनलाइन शिकवण्यासाठी काही पर्याय यूट्यूबमार्फत Teach From Home द्वारे उपलब्ध करून देण्यात आले आहेत!

http://g.co/teachfromhome या लिंकवर गेल्यास शिक्षकांना उपलब्ध करून देण्यात आलेल्या सोयी एका ठिकाणी पाहायला मिळतील. येथून तुम्ही विद्यार्थ्यांसोबत व्हिडिओ कॉल करू शकता, ऑनलाइवर्ग भरवू शकता, लाईव प्रश्नोत्तरे घेऊ शकता! याबद्दल अधिक माहीतीसाठी लिंक : https://bit.ly/39tb28J

दुसरीकडे अॅमेझॉनने मुलांसाठी मोफत मनोरंजन उपलब्ध करून दिलं आहे. मुलांसाठी योग्य अशी वर्गवारी केलेले चित्रपट, मालिका, अॅनिमेटेड व्हिडिओ अॅमेझॉन प्राइम व्हिडिओच्या सबस्क्रिप्शनशिवाय पाहता येतील! याबद्दल अॅमेझॉन इंडियाचे प्रमुख अमित अगरवाल यांनी माहिती दिली आहे. यामधील काही व्हिडिओ मराठीतसुद्धा उपलब्ध आहेत. उदा (Madagascar Escape 2 Africa). अॅमेझॉन प्राइम व्हिडिओ लिंक : https://www.primevideo.com/storefront/kids/

Thanks @PrimeVideoIN for keeping kids entertained as they stay home.

Right now our most critical objective is to find ways to control the spread of the virus and we are committed to help our customers maintain #SocialDistancing. https://t.co/LQ5U9l7q8A
— Amit Agarwal (@AmitAgarwal) March 24, 2020

Search Terms : Browse Kids & Family content on Amazon Prime Video for FREE, YouTube starts Learn@Home educational hub for kids to learn different things while staying at home

The post लहान मुलांसाठी अॅमेझॉन प्राइम व्हिडिओ आणि यूट्यूब मोफत! appeared first on MarathiTech - मराठीटेक.

अॅप लय भारी शिक्षणाशी संबंधित एकापेक्षा एक भन्नाट अॅप्स

Sooraj Bagal — Tue, 26 Nov 2013 21:30:00 +0000

मोबाइल अॅप्सवर आधारित ‘अॅपप्रेनिअर’ ही स्पर्धा व्हिजेटीआय कॉलेजच्या कॅम्पसमध्ये नुकतीच पार पडली. आपली कल्पकता वापरुन कुठलंही नवीन अँड्रॉइड अॅप बनवून त्याचा ‘बिझनेस’ करता येईल हे विद्यार्थ्यांनी यातून दाखवून द्यायचं होतं. देशभरातल्या ५४ कॉलेजांतल्या टीम्सनी या स्पर्धेत भाग घेतला. शिक्षणाशी संबंधित एकापेक्षा एक भन्नाट अॅप्सची निर्मिती करत कॉलेजिअन्सनी सगळ्यांना थक्क केलं.

पीजीतलं सबकुछ

ग्रॅज्युएशन पूर्ण झालं की पोस्ट ग्रॅज्युएशन नेमकं कशात करावं असा प्रश्न अनेक विद्यार्थ्यांना पडतो. या द्विधा मनःस्थितीतून बाहेर पडण्यासाठी उपयुक्त ठरेल असं हे एक अॅप. पोस्टग्रॅज्युएशन करु इच्छिणाऱ्या हजारो विद्यार्थ्यांना याचा फायदा होऊ शकेल. विशेष म्हणजे आजवर अशा प्रकारचं एकही अॅप बनवलं गेलं नाहीय. विविध युनिव्हर्सिटीचे रँक्स, स्टडी मटेरिअल, शैक्षणिक कर्ज यासारख्या पीजीशी निगडीत सगळी माहिती मिळेल. तसंच इथे अॅडमिशनसंबंधीच्या सगळ्या महत्वाच्या तारखा आणि नोटिफिकेशन्सही इथे बघायला मिळतील. त्यासोबतच एखाद्या विषयाची आवड असलेले विद्यार्थी या अॅपद्वारे एकमेकांशी चॅटही करू शकतील. पीजीशी निगडीत प्रत्येक प्रश्नाचं उत्तर इथे मिळू शकेल.

अॅपचं नाव : द पीजी डायलेमा

कॉलेज टीम : याम्म व्हिजेटीआय

इंजिनीअर व्हायचंय?

‘फनजिनिअर्स’ हे एक अतिशय सोपं असं अॅप आहे. यात इंजिनीअरिंग करणाऱ्या विद्यार्थांच्या मनातल्या कुठल्याही प्रश्नाला उत्तर मिळू शकेल. विद्यार्थ्याने प्रश्न विचारल्यावर इथलेच युजर्स आणि त्यात्या विषयातले तज्ज्ञ त्याची उत्तरं देतील. आणि त्याचं योग्य उत्तर मिळाल्यावर चटकन नोटिफीकेशन येतं. आजवर गुगल प्ले स्टोअरवर असं एकही अॅप नाहीय. यामध्ये चॅट फिचर टाकायचाही अॅप बनवणाऱ्यांचा प्रयत्न चालू आहे.

अॅपचं नाव : एन्क्वायर

कॉलेज टीम : फनजिनिअर्स

परदेशी युनिव्हर्सिटीजची माहिती

अमेरिकेतून मास्टर्स करू इच्छिणाऱ्या विद्यार्थ्यांसाठी हे बेस्ट अॅप ठरेल. तिथल्या हव्या त्या युनिव्हर्सिटीजची सगळी माहिती शोधून त्यानुसार अॅडमिशन घेता येऊ शकेल. जीआरइ, टोफेल, एसओपी अशा सगळ्याचा स्कोअर बघून विविध निकषांच्या आधारावर या अॅपची सेफ, मॉडरेट आणि अॅम्बिशिअस अशी तीन गटांत विभागणी करण्यात आली आहे. या अॅपमध्ये परदेशातल्या विविध युनिव्हर्सिटीजबाबतचं व्यवस्थित मार्गदर्शन करण्यात येईल.

अॅपचं नाव : ग्रॅज्युएट युनिव्हर्सिटी फाईंडर

कॉलेज टीम : गेम चेंजर,

के.जे.सोमैया कॉलेज ऑफ इंजिनीअरिंग

एमएस, एमबीएसाठी…

पोस्ट ग्रॅज्युएशनसंदर्भातली सगळी माहिती या अॅपमध्ये बघायला मिळेल. यामध्ये एमएस, एमबीए, एमई/एमटेक या कोर्समध्ये लागणाऱ्या सर्व प्रवेश परीक्षांची सर्व माहिती एकाच ठिकाणी इथे मिळू शकेल. यामध्ये एखादा शब्द अडल्यास, फेसबुकशी संलग्न असलेल्या ऑनलाइन डिक्शनरीचा पर्यायही विद्यार्थी वापरू शकतो. तसंच विरंगुळा म्हणून सुडोकू खेळाचीही सोय या अॅपमध्ये करण्यात आली आहे.

जीआरइची तयारी

जीआरइची तयारी करायची म्हटली की अनेकांना घाम फुटतो. हे अॅप अत्यंत सोप्या आणि रंजक पद्धतीने जीआरइची तयारी विद्यार्थ्यांकडून करून घेतं. एकसारखे वाटणारे शब्द आणि फ्लॅश कार्डस, विविध क्विझ गेम्स, टेस्टचे स्कोअर्स तसंच एमएसशी संबंधित सगळी माहिती यात मिळेल. तसंच विविध युनिव्हर्सिटीजसाठी अॅप्लिकेशन आणि त्यासाठी लागणाऱ्या व्हिसाची प्रोसिजरही यामध्ये व्यवस्थित समजावून सांगण्यात आली आहे.

अॅपचं नाव : जीआरइ क्लब

कॉलेज टीम : ओएमजी

संकलन – मृण्मयी नातू (Maharashtra Times)

The post अॅप लय भारी शिक्षणाशी संबंधित एकापेक्षा एक भन्नाट अॅप्स appeared first on MarathiTech - मराठीटेक.

प्रादेशिक भाषांतील ई-बुक

Sooraj Bagal — Tue, 12 Feb 2013 08:00:00 +0000

टेक्नोलॉजीच्या जमान्यात वाचन – लेखन आणि इतर अनेक बाबींमधील तंत्रेच बदलली . टेक्नोक्रांती झाल्यामुळे काम करण्याच्या पद्धतीतही अनेक बदल झाले . प्रत्यक्षात आता कुणीही कागदावर हाताने फारसे लिहित नाही . त्याची गरजच उरलेली नाही . पुस्तकांच्या बाबतीत ही छापील पुस्तकाची जागा ‘ ई – बुक ‘ घेऊ लागले आहे

दिल्लीमध्ये सुरू असलेल्या जागतिक पुस्तक मेळाव्यातही ‘ ई – बुक ‘ ची दखल घेतली गेली . एक वेगळा विभाग ‘ई – बुक ‘ च्या प्रकाशकांसाठी , निर्मात्यांसाठी ठेवण्यात आला होता . कम्प्युटर , इंटरनेटबरोबरच स्मार्टफोनवर एका क्लिकवर माहिती उपलब्ध झाली . सुरुवातीला इंग्रजी भाषेपुरतेच मर्यादित असणारे हे क्षेत्र आता जवळपास सर्व भाषांमध्ये विस्तारले आहे . स्मार्टफोन , आयफोन , अन्ड्रॉइड यांसारख्या फोनवर अनेक अॅप्लिकेशन्स आहेत .त्यात आता प्रादेशिक भाषांमधील पुस्तके डाउनलोड करण्याच्या अॅप्लिकेशनची भर पडणार आहे .

टॅबलेट आणि मोबाइलसाठी ई – बुक आणि ई – मॅगझिन्स पुरवणाऱ्या ‘ रॉकस्टँड ‘ या कंपनीने दिल्लीतील जागतिक पुस्तक मेळाव्यात प्रादेशिक भाषांमधील पुस्तकांच्या पहिल्या संचाचे अनावरण केले आहे . यामुळे प्रादेशिक भाषांमधील ई – पुस्तकेही फोनवर वाचता येणार आहेत . विविध प्रकाशनांची इंग्रजी पुस्तके ‘ ई – बुक ‘वर उपलब्ध आहेत . आता प्रादेशिक भाषांमधील पुस्तकांची मागणी यामुळे वाढणार आहे . केवळ ‘ प्रिंट कॉपीं ‘च्या विक्रीवर होणाऱ्या नफ्याची गणिते आता केव्हाच मागे पडली आहेत . ‘ अॅन्ड्रॉइड ‘ वर एका अॅप्लिकेशनद्वारेही पुस्तके डाउनलोड करता येतील .

‘ रॉक असाप रिटेल प्रायव्हेट लिमिटेड ‘ चे संस्थापक संचालक प्रवीण राजपाल यांनी या अॅप्लिकेशनची माहिती दिली . ते म्हणाले , ‘ हिंदी , गुजराती , मराठी यांसारख्या प्रादेशिक भाषांमधील पुस्तके यामुळे सर्वांना मिळणारआहेत . एकूण १८ भाषांमध्ये आम्ही पुस्तके प्रसिद्ध करत आहोत .’ यासाठी अॅन्ड्रॉइड फोनवर एक अॅप्लिकेशन डाउनलोड करावे लागेल . हे अॅप्लिकेशन मोफत डाउनलोड करता येईल . डाउनलोड केलेले पुस्तक कायमस्वरूपी वापरता येईल . इंटरनेट अॅक्सेस नसला , तरी डाउनलोड केलेले पुस्तक वाचता येणार आहे . नाइट रीडिंग मोड ,फॉण्ट साइजमध्ये बदल करणे , पुस्तक वाचताना नोट्स काढण्याची सोय यांसारखी वैशिष्ट्ये या अॅप्लिकेशनमध्ये आहेत . एवढेच नव्हे , तर वाचायचा आपल्याला कंटाळा आला , तर वाचून दाखवण्याची सोय या अॅपमध्ये आहे .पुस्तक डाउनलोड करण्याची किंमत ही छापील पुस्तकाच्या किमतीपेक्षा फार कमी आहे . सर्वांत स्वस्त पुस्तक हे ‘चाचा चौधरी कॉमिक बुक ‘ असून पुस्तकाची किंमत केवळ एक रुपया आहे .

कंपनीने नुकतेच देशातील पन्नास प्रकाशकांशी ‘ टाय – अप ‘ केलेले आहे . विविध भाषांमधील आणखी एक हजार पुस्तके त्यामुळे कंपनीच्या संग्रहात दाखल झाली आहेत . सध्या ‘ रॉकस्टँड ‘ कडे वीस लाख पुस्तके आहेत . आर्थिक फायद्यांबरोबरच वाचनसंस्कृती वाढीला लागावी हा या बदलत्या आणि प्रगतीशील तंत्रज्ञानाचा उद्देश आहे . हेसर्वांनी लक्षात घेऊन टेक्नॉलॉजीचा वापर वाचून समृद्ध होण्यासाठी करावा .

The post प्रादेशिक भाषांतील ई-बुक appeared first on MarathiTech - मराठीटेक.