भारतातील सर्वात मोठ्या ई लर्निंग प्लॅटफॉर्म पैकी एक असलेल्या Unacademy (अनअकॅडेमी) चा डेटाबेस जानेवारी मध्ये हॅक झाला होता. त्यावेळी १.१ कोटी युजर्सचा डेटा हॅक झाल्याचं सांगण्यात आलं होतं मात्र प्रत्यक्षात तब्बल २.२ कोटी म्हणजे जवळपास सर्वच यूजर्सचा डेटा हा हॅकमध्ये हॅकर्सच्या तावडीत सापडला आहे. आता हॅकरने तो डेटाबेस डार्क वेबवरती 2000 डॉलर्स म्हणजे जवळपास दीड लाख रुपयांना विक्रीसाठी ठेवला असल्याचं समोर आलं आहे!

या हॅकमध्ये गूगल, इन्फोसिस, कॉग्निझंट, फेसबुकच्या कर्मचाऱ्यांचे ईमेल्ससुद्धा असल्याचं सांगण्यात येत आहे. Cyble नावाच्या अमेरिकन सेक्युरिटी संस्थेने याची माहिती दिली आहे. त्यांच्या माहितीनुसार या डेटाबेसमध्ये युजरनेम, पासवर्ड, ईमेल, जॉइन केलेली तारीख, शेवटचं लॉगिन केलेली तारीख, नाव, प्रोफाइल अशी माहिती आहे!

डार्क वेब म्हणजे इंटरनेटवरची अशी जागा जी अॅक्सेस करायला खास सॉफ्टवेअर, कॉन्फिगरेशन करावं लागतं. येथील वेबसाइट गूगलसारख्या सर्च इंजिनवर सापडत नाहीत. नावाप्रमाणेच ही इंटरनेटची काळी बाजू आहे जिथे अवैध गोष्टी जास्त चालतात. अर्थात याचा वापर गोपनियतेसाठीही केला जातो. तर या डार्क वेबवर हॅकर्स त्यांनी हॅक केलेले डेटाबेस विक्रीसाठी ठेवतात जेणेकरून विक्री करणारा आणि खरेदी करणारा दोघांची ओळख बाहेर पडू नये.

यामध्ये लीक झालेले पासवर्ड SHA-256 hash ने एनक्रिप्ट केलेले असल्यामुळे हॅकर्सना ते वाचता येणार नाहीत असं सीईओ गौरव मुंजाळ यांनी सांगितलं आहे. मात्र तरीही जर कोणी यासोबत इतर वेबसाइटवरही तेच पासवर्ड वापरले असतील तर त्यांनी ते दोन्ही ठिकाणी बदलून घ्यावेत असंही सांगितलं आहे. यामध्ये कोणतीही आर्थिक माहिती (क्रेडिट/डेबिट कार्डस) हॅकर्सकडे गेली नाही असं त्यांनी म्हटलं आहे.

तुम्ही जर Unacademy वापरत असाल तर तुम्ही तुमचा पासवर्ड नक्की बदला असं आवाहन आम्ही करत आहोत. सोबत पुन्हा एकदा सांगत आहोत की एकच पासवर्ड दोन ठिकाणी वापरू नका. जगात हॅक होणार नाही अशी कोणतीही वेबसाइट नाही ही गृहीत धरून प्रत्येक वेबसाइटवर Sign Up करताना वेगळा पासवर्ड टाका. त्यामध्ये आपलं नाव, फोन नंबर अशा सोप्या गोष्टी टाकू नका.

The post Unacademy चा डेटाबेस हॅक : २.२ कोटी यूजर्सची माहिती डार्क वेबवर! appeared first on MarathiTech - मराठीटेक.

करोना व्हायरसच्या प्रादुर्भावामुळे काही दिवसांपूर्वीच राज्यातील सर्व शाळा बंद ठेवण्याचा निर्णय झाला आहे. देशात इतरत्रसुद्धा अशा प्रकारचा निर्णय झाला असून यावर डिजिटल माध्यमाचा वापर करून विद्यार्थ्याना ऑनलाइन शिक्षण पुरवणाऱ्या कंपन्यानी त्यांच्या वेबसाइटवरील सर्व शैक्षणिक कोर्सेस सर्वांना मोफत उपलब्ध करून दिले आहेत. यामध्ये Byju’s, Unacademy, Toppr, Catalyst Group यांनी पुढाकार घेतला आहे.

याद्वारे शिक्षण मोफत करून दिल्यावर Byju’s च्या ऑनलाइन ट्रॅफिकमध्ये (वेबसाइट पाहणाऱ्यांच्या संख्येत) तब्बल ६० टक्क्यांनी वाढ झाल्याची माहिती जाहीर केली आहे! दिव्या गोकुलनाथ (Byju’s सहसंस्थापक) यांनी असं सांगितलं आहे की या COVID19 च्या संकटादरम्यान विद्यार्थ्याना आम्ही बायजूवरील लर्निंग प्रोग्राम्स एप्रिल महिना संपेपर्यंत डाउनलोड करून मोफत वापरता येतील! या निर्णयानंतर नव्या विद्यार्थ्यांचं अॅप डाउनलोड करण्याचं प्रमाण ६० टक्क्यानी वाढल्याचं त्यांनी सांगितलं आहे!

या ऑनलाइन लर्निंग सेवांमुळे विद्यार्थी घरबसल्या इंटरनेटवर विविध गोष्टी ऑनलाइन शिकू शकतील. जेणेकरून त्यांचं करोनापासून संरक्षणही होईल आणि इतक्या दिवसांचा वेळही वाया जाणार नाही!

अनअकॅडेमीचे सह संस्थापक गौरव मुंजाळ यांनी अशी माहिती दिली आहे की करोनामुळे शैक्षणिक व्यवस्थेलाही मोठा धक्का बसला असून यासाठी आम्ही आमचा प्लॅटफॉर्म देशातील शैक्षणिक संस्थासाठी खुला करत आहोत ज्यामुळे ते विद्यार्थ्याना ऑनलाइन शिकवू शकतील! सध्याची परिस्थिती सुधारेपर्यंत कोणत्याही मर्यादेशिवाय वापरता येईल!

कॅटॅलिस्ट ग्रुप जो प्रामुख्याने स्पर्धा परीक्षासाठी वापरला जातो त्याचे प्रमुख अखंड स्वरूप पंडित यांनीही त्यांच्या वेबसाइटवर ३०-४० टक्क्यानी प्रवेश वाढले आहेत अशी माहिती दिलीय. कॉलेज, टयूशन, कोचिंग क्लासेससुद्धा बऱ्याच अंशी बंद झाल्यामुळे असं होत आहे असं मत त्यांनी नोंदवलं आहे.

मराठीटेकतर्फे आमचंही असं आवाहन आहे की करोनाचा प्रसार थांबावा या दृष्टीने सर्वांनी घरीच थांबलेलं उत्तम आहे.
मात्र घरीसुद्धा वेळ वाया न घालवता अशा प्रकारे ऑनलाइन पर्याय वापरुन विविध उपयोगी गोष्टी शिका
जेणेकरून या वेळेचा फायदा करून घेता येईल. यूट्यूब यासाठी सर्वोत्तम पर्याय आहे.

Seach Terms : Online Learning Website make their content free to download for everyone as schools, coaching classes face shut downds due to Corona Virus/COVID19 Outbreak

The post करोनामुळे Byju, Unacademy तर्फे ऑनलाइन शिक्षण मोफत! appeared first on MarathiTech - मराठीटेक.