Rockstar Games ची ही Grand Theft Auto VI बहुप्रतीक्षित आणि बहुचर्चित गेम १९ नोव्हेंबर 2026 रोजी रिलीज होणार आहे. ही गेम PlayStation 5 आणि Xbox Series X|S या प्लॅटफॉर्मवर उपलब्ध होईल. PC आवृत्तीबाबत Rockstar ने अद्याप रिलीज तारीख जाहीर केलेली नाही.

GTA V रिलीज होऊन जवळपास १३ वर्षे झाल्यानंतर GTA VI येत आहे. त्यामुळे चाहत्यांच्या अपेक्षा प्रचंड आहेत. मात्र Extended Look पाहिल्यानंतर Rockstar त्या अपेक्षा पूर्ण करण्यासाठी मोठ्या प्रमाणावर काम करत असल्याचे नक्कीच दिसते.

Grand Theft Auto VI: An Extended Look Video Link : https://www.youtube.com/watch?v=tJbzMqJGH4k

The post GTA VI चा Extended Look २६ मिनिटांचा गेमप्ले व्हिडिओ आता उपलब्ध! appeared first on MarathiTech - मराठीटेक.

भारतातील खासगी अंतराळ क्षेत्रासाठी १८ जुलै हा ऐतिहासिक दिवस ठरला. हैदराबादस्थित Skyroot Aerospace च्या Vikram-1 या भारतातील पहिल्या खासगी ऑर्बिटल रॉकेटने यशस्वी उड्डाण करत अनेक पेलोड पृथ्वीच्या कक्षेत पोहोचवले. यामुळे भारताच्या खासगी स्पेस टेक उद्योगासाठी हा एक मोठा टप्पा ठरला आहे.

स्कायरूट एयरोस्पेसने १८ जुलै रोजी श्रीहरिकोटा येथील सतीश धवन स्पेस सेंटरमधून Vikram-1 चे यशस्वी प्रक्षेपण केले. हे भारतात पूर्णपणे खासगी कंपनीने विकसित केलेले आणि कक्षेत पोहोचलेले पहिले ऑर्बिटल रॉकेट ठरले. या मोहिमेला “Mission Aagaman” असे नाव देण्यात आले होते.

याआधी २०२२ मध्ये Skyroot ने Vikram-S या Suborbital रॉकेटचे यशस्वी प्रक्षेपण केले होते. मात्र Vikram-1 ही त्यापेक्षा मोठी झेप मानली जाते, कारण या रॉकेटने पृथ्वीच्या कक्षेत payload यशस्वीपणे पोहोचवले.

Vikram-1 हे Small Satellite Launch Vehicle म्हणून विकसित करण्यात आले आहे. हे सुमारे २२ मीटर उंच असून Low Earth Orbit मध्ये ३५० किलोग्रॅमपर्यंत payload नेण्याची क्षमता आहे. या रॉकेटमध्ये Solid Fuel स्टेजेससह Liquid Propulsion असलेला वापरण्यात आलं आहे. तसेच भारतात विकसित करण्यात आलेल्या 3D Printed Engine सारख्या आधुनिक तंत्रज्ञानाचाही यात वापर करण्यात आला आहे.

Mission Aagaman अंतर्गत Vikram-1 ने भारत आणि परदेशातील अनेक Technology Demonstration Payload कक्षेत पोहोचवले. यात Skyroot चा स्वतःचा SCOPE Payload तसेच Grahaa Space, Cosmoserve Space आणि जर्मनीतील DCUBED यांसारख्या संस्थांचे payload देखील होते. पहिल्याच प्रक्षेपणातील तांत्रिक कारणांमुळे त्यांचे सर्वच payload अपेक्षेप्रमाणे deploy करता आले नाहीत. मात्र त्याचा पुढील उड्डाण करतेवेळी अभ्यास म्हणून नक्कीच उपयोग होईल.

२०२० मध्ये भारत सरकारने खासगी कंपन्यांसाठी Space Sector खुला केला. त्यानंतर अनेक भारतीय स्पेस स्टार्टअप्स पुढे आले. Vikram-1 चे यशस्वी प्रक्षेपण हे त्या निर्णयाचे मोठे यश मानले जात आहे. यामुळे भारत आता खासगी कंपन्यांमार्फत उपग्रह प्रक्षेपण सेवा देणाऱ्या निवडक देशांच्या यादीत अधिक मजबूतपणे उभा राहिला आहे. जागतिक व्यावसायिक लॉंच मार्केटमध्ये भारतीय कंपन्यांसाठीही नवीन संधी निर्माण होण्याची शक्यता आहे.

• भारतातील पहिले खासगी ऑर्बिटल रॉकेट यशस्वीरित्या कक्षेत पोहोचले.
• Skyroot Aerospace ने ‘मिशन आगमन’ अंतर्गत Vikram-1 चे प्रक्षेपण केले.
• रॉकेटने अनेक भारतीय आणि आंतरराष्ट्रीय payload कक्षेत सोडले.
• Vikram-1 सुमारे ३५० किलोग्रॅम payload Low Earth Orbit मध्ये नेऊ शकते.

अंतराळ मोहिमा म्हणजे केवळ वैज्ञानिक यश नाही. भविष्यात स्वस्त सॅटेलाइट लॉंच, जलद संपर्क सेवा, नॅव्हिगेशन, Weather Monitoring, शेती आणि Earth Observation यांसारख्या अनेक सेवांमध्ये याचा फायदा होऊ शकतो. तसेच भारतीय स्पेस स्टार्टअप्ससाठी जागतिक बाजारपेठेत स्पर्धा करण्याची मोठी संधी निर्माण होईल.

The post Skyroot च्या Vikram-1 या भारताच्या पहिल्या खासगी ऑर्बिटल रॉकेटचे यशस्वी प्रक्षेपण! appeared first on MarathiTech - मराठीटेक.

ॲपलने आज त्यांच्या ग्राहकांना मोठा धक्का देत MacBook आणि iPad आणि इतर प्रॉडक्टच्या किंमतींमध्ये मोठी वाढ जाहीर केली आहे. कंपनीच्या अधिकृत भारतातील वेबसाइटवर नवीन किंमती लागू करण्यात आल्या असून, काही प्रीमियम मॉडेल्सच्या किंमतींमध्ये तब्बल १ लाख रुपयांपर्यंत वाढ झाली आहे. ही वाढ केवळ भारतापुरती मर्यादित नसून जागतिक स्तरावरही ॲपलने Mac आणि iPad उत्पादनांच्या किंमती वाढवल्या आहेत.

किंमती का वाढल्या?

ॲपलचे म्हणणे आहे की जागतिक स्तरावर मेमरी (DRAM) आणि स्टोरेज (NAND) चिप्सच्या किंमतींमध्ये झालेली मोठी वाढ, तसेच AI डेटा सेंटर्समुळे निर्माण झालेली प्रचंड मागणी यामुळे उत्पादन खर्च लक्षणीय वाढला आहे. याच वाढलेल्या खर्चाचा परिणाम आता ग्राहकांवर दिसत आहे. कंपनीचे सीईओ टिम कुक यांनी काही दिवसांपूर्वीच अशा किंमतवाढीची शक्यता व्यक्त केली होती.

किंमतीमधील बदल खालील प्रमाणे… तूर्तास आयफोनच्या किंमतीमध्ये कोणताही बदल झालेला नाही.

आयपॅड
iPad – ₹49,990 (पूर्वी ₹34,990)
iPad Mini – ₹69,900(पूर्वी ₹49,900)
iPad Air – ₹89,900(पूर्वी ₹64,900)
iPad Pro – ₹1,39,900 (पूर्वी ₹99,990)

मॅक
Mac Mini M4 – ₹94,900 (पूर्वी ₹59,900)
Mac Studio M4 Max – ₹2,79,900 (पूर्वी ₹2,14,900)
Mac Studio M3 Ultra- ₹5,99,900 (पूर्वी ₹4,29,900)
iMac M4 – ₹1,74,900 (पूर्वी ₹1,34,900)

मॅकबुक
MacBook Air M5 – ₹1,49,900 (पूर्वी ₹1,19,900)
MacBook Pro M5 – ₹2,39,900 (पूर्वी ₹1,69,900)
MacBook Pro M5 Max – ₹4,99,900 (पूर्वी ₹3,99,900) (सर्वाधिक १ लाख रुपयांची वाढ!)
MacBook Neo – ₹79,900 (पूर्वी ₹69,900)

ॲपलचे स्मार्ट होम प्रॉडक्ट्स
HomePod – ₹44,900 (पूर्वी ₹32,900)
HomePod Mini – ₹15,900 (पूर्वी ₹10,900)
Apple TV 4K 64GB – ₹25,900 (पूर्वी ₹14,900)
Apple TV 4K 128GB + Ethernet – ₹31,900 (पूर्वी ₹16,900)

कोणावर होणार सर्वाधिक परिणाम?

या किंमतवाढीचा सर्वाधिक फटका विद्यार्थी, कंटेंट क्रिएटर्स, सॉफ्टवेअर डेव्हलपर्स, व्हिडिओ एडिटर्स आणि व्यावसायिक वापरकर्त्यांना बसण्याची शक्यता आहे. विशेषतः नवीन MacBook किंवा iPad खरेदीचा विचार करणाऱ्या ग्राहकांना आता पूर्वीपेक्षा हजारो रुपयांचा अतिरिक्त खर्च करावा लागणार आहे. त्यामुळे अनेक ग्राहक जुनी मॉडेल्स, रिफर्बिश्ड डिव्हाइसेस किंवा इतर ब्रँडकडे वळण्याची शक्यता व्यक्त केली जात आहे.

ही वाढ ॲपलच्या वेबसाइटवर आत्ताच लागू झाली असून तुम्हाला अजूनही जुन्या किंमतीत खरेदी करायची असेल तर ऑनलाइन वेबसाइट्स (Amazon/Flipkart) किंवा ऑफलाइन दुकाने इथे आणखी काही दिवस तरी जुन्या किंमतीत खरेदी करू शकता.

सध्या ॲपलने iPhone, Apple Watch किंवा AirPods च्या किंमतींमध्ये कोणताही बदल केलेला नाही. मात्र उत्पादन खर्चातील वाढ कायम राहिल्यास भविष्यात इतर उत्पादनांच्या किंमतीतही बदल होण्याची शक्यता नाकारता येत नाही. अगदी हा लेख लिहीत असतानाच एक्सबॉक्सची सुद्धा किंमत 100 डॉलर्सने वाढवण्यात आली आहे!

AI तंत्रज्ञानामुळे मेमरी आणि स्टोरेज चिप्सची जागतिक मागणी वाढल्याने इलेक्ट्रॉनिक्स उद्योगावर खर्चाचा मोठा ताण निर्माण झाला आहे. ॲपलने हा वाढलेला खर्च ग्राहकांवर टाकण्याचा निर्णय घेतला असून, भारतातील MacBook आणि iPad खरेदी आता पूर्वीपेक्षा अधिक महाग झाली आहे. अमेरिकेतील वाढलेल्या किंमतीच्या तुलनेत भारतातील किंमती खूपच जास्त प्रमाणात वाढल्या आहेत. आगामी काळात इतर तंत्रज्ञान कंपन्याही अशाच प्रकारे किंमती वाढवण्याची शक्यता तज्ज्ञ व्यक्त करत आहेत.

The post ॲपलने मॅकबुक, आयपॅडच्या आणि इतर प्रॉडक्टच्या किंमती वाढवल्या appeared first on MarathiTech - मराठीटेक.

भारतीय फिनटेक कंपनी CRED चे संस्थापक कुणाल शाह यांची Meta ने व्हॉट्सॲपच्या ग्लोबल प्रमुख (Global Head of WhatsApp) म्हणून नियुक्ती केली आहे. यासोबतच Meta ने CRED मध्ये सुमारे 900 दशलक्ष डॉलर (सुमारे ₹८५०० कोटी) इतकी मोठी गुंतवणूक करण्याची घोषणा केली आहे. या निर्णयामुळे भारतीय उद्योजकतेची जागतिक स्तरावर पुन्हा एकदा दखल घेतली गेली आहे.

व्हॉट्सॲपचे विद्यमान प्रमुख Will Cathcart यांनी सात वर्षांच्या कार्यकाळानंतर पद सोडण्याचा निर्णय घेतला आहे. ते Meta मध्येच नव्या जबाबदारीत काम करणार असून, त्यांच्या जागी आता कुणाल शाह WhatsApp चे नेतृत्व स्वीकारतील.

Meta ने कुणाल शाह यांच्यावर का दाखवला विश्वास?

कुणाल शाह हे भारतातील सर्वात प्रभावशाली स्टार्टअप उद्योजकांपैकी एक मानले जातात. त्यांनी २०१० मध्ये FreeCharge ची सह-स्थापना केली होती. त्यानंतर २०१८ मध्ये त्यांनी CRED ची स्थापना केली. क्रेडिट कार्ड बिल वेळेवर भरणाऱ्या ग्राहकांसाठी रिवॉर्ड-आधारित प्लॅटफॉर्म म्हणून CRED ने अल्पावधीत मोठी लोकप्रियता मिळवली. Meta च्या मते, ग्राहकांच्या वर्तनाचा सखोल अभ्यास, डिजिटल पेमेंट्समधील अनुभव आणि जागतिक स्तरावरील व्यावसायिक दृष्टीकोन यामुळे कुणाल शाह यांची WhatsApp साठी निवड करण्यात आली आहे.

शिक्षण: इंजिनिअरिंग किंवा MBA नाही!

वयाच्या अवघ्या १५ व्या वर्षी कुटुंबाच्या आर्थिक अडचणींमुळे त्यांनी काम करण्यास सुरुवात केली. वडिलांचा व्यवसाय बंद पडल्यानंतर कुटुंबाला हातभार लावण्यासाठी त्यांनी डिलिव्हरी बॉय, डेटा एंट्री ऑपरेटर, मेहेंदी कोन विक्रेता, सायबर कॅफे ऑपरेटर, संगणक प्रशिक्षण देणे अशा अनेक छोट्या-मोठ्या नोकऱ्या केल्या. या अनुभवामुळे त्यांना ग्राहकांचे वर्तन, व्यवसाय अगदी जवळून समजले.

विशेष म्हणजे, कुणाल शाह यांच्याकडे ना इंजिनिअरिंगची पदवी आहे, ना पूर्ण केलेले MBA शिक्षण. त्यांनी मुंबईतील Wilson College मधून तत्त्वज्ञान (Bachelor of Arts in Philosophy) या विषयात पदवी घेतली. त्यानंतर त्यांनी NMIMS मध्ये MBA ला प्रवेश घेतला होता, मात्र काही महिन्यांतच त्यांनी तो अभ्यासक्रम सोडून उद्योजकतेचा मार्ग स्वीकारला.

२०१० मध्ये त्यांनी संदीप टंडन यांच्यासोबत FreeCharge ची स्थापना केली. ऑनलाइन मोबाईल रिचार्जमध्ये फ्रीचार्जने मोठी झेप घेतली होती. २०१५ मध्ये Snapdeal ने ही कंपनी सुमारे 400 दशलक्ष डॉलर्समध्ये विकत घेतली. त्यानंतर काही वर्षे नवीन कल्पनांवर काम केल्यानंतर २०१८ मध्ये त्यांनी स्वतःच्या भांडवलातून CRED ची स्थापना केली. वेळेवर क्रेडिट कार्ड बिल भरणाऱ्या ग्राहकांना रिवॉर्ड देण्याची संकल्पना CRED मुळे लोकप्रिय झाली.

CRED मध्ये 900 दशलक्ष डॉलरची गुंतवणूक

या कराराचा आणखी एक महत्त्वाचा भाग म्हणजे Meta कडून CRED मध्ये 900 दशलक्ष डॉलरची गुंतवणूक. या गुंतवणुकीनंतर Meta कंपनीत Minority Investor म्हणून सहभागी होणार आहे. मात्र, CRED च्या ग्राहकांच्या डेटावर Meta ला कोणताही प्रवेश मिळणार नसल्याचे स्पष्ट करण्यात आले आहे.

WhatsApp साठी पुढील टप्पा

व्हॉट्सॲप हे जगातील सर्वाधिक वापरले जाणारे मेसेजिंग प्लॅटफॉर्म असून भारत हा त्याचा सर्वात मोठा बाजार आहे. कुणाल शाह यांच्या नेतृत्वाखाली व्हॉट्सॲपमध्ये डिजिटल पेमेंट्स, व्यावसायिक सेवा आणि ई-कॉमर्सशी संबंधित सुविधा अधिक वेगाने विकसित होण्याची शक्यता व्यक्त केली जात आहे. Meta भारतासह ब्राझील आणि इंडोनेशिया यांसारख्या बाजारपेठांमध्ये WhatsApp ला अधिक सक्षम “सुपर ॲप” बनवण्याच्या दिशेने काम करत आहे.

The post CRED चे संस्थापक कुणाल शहा आता WhatsApp चे सीईओ! appeared first on MarathiTech - मराठीटेक.

जर तुम्ही गेल्या काही दिवसांत तुमचे मोबाईल अ‍ॅप्स किंवा वेब ब्राऊझर बार बारकाईने पाहिले असतील, तर तुम्हाला गुगलच्या अ‍ॅप्समध्ये काहीतरी वेगळेपण जाणवले असेल. गूगलने अधिकृतपणे त्यांच्या लोकप्रिय गूगल वर्कस्पेस (Google Workspace) अ‍ॅप्सचे आयकॉन्स पूर्णपणे बदलले आहेत.

२६ मे २०२६ रोजी गूगलने या मोठ्या डिझाईन बदलाची घोषणा केली. गुगलच्या मते, हा बदल त्यांच्या ‘जेमिनी एरा’ (Gemini Era) म्हणजेच एआय युगातील एका नव्या प्रवासाची सुरुवात आहे.

२०२० मध्ये गुगलने आपल्या सर्व अ‍ॅप्ससाठी चार रंगांची (निळा, लाल, पिवळा आणि हिरवा) एकसारखी आऊटलाईन असलेली डिझाईन आणली होती. पण, युजर्सची नेहमी एकच तक्रार असायची की, मोबाईल स्क्रीनवर सगळे अ‍ॅप्स एकाच सारखे दिसतात, त्यामुळे नेमके कोणते अ‍ॅप उघडायचे ते समजत नाही! आता गुगलने लोकांची ही अडचण दूर केली आहे. आता सपाट (Flat) टाइपच्या डिझाईनमधील आयकॉन्स ऐवजी ग्लॉसी आणि थ्रीडी लुक (Glossy Gradients) असलेल्या नवीन आयकॉन्स आल्या आहेत. अँड्रॉइड १७ (Android 17) मध्ये येणाऱ्या नव्या थ्रीडी इमोजी स्टाईलसारखाच हा काहीसा लुक आहे.

कोणत्या १४ अ‍ॅप्सचे आयकॉन्स बदलले?
Gmail, Calendar, Chat, Meet, Drive, Docs, Slides, Sheets, Keep, Forms, Sites, Tasks, Vids, Voice.

तुम्हाला हे नवीन आयकॉन्स कधी दिसणार?
या नव्या आयकॉन्सचा रोलआऊट १९ मे २०२६ पासून टप्प्याटप्प्याने सुरू झाला आहे. गुगलने स्पष्ट केले आहे की, हा एक ‘एक्सटेंडेड रोलआऊट’ आहे. याचा अर्थ असा की, सर्व युजर्सच्या मोबाईलवर आणि कॉम्प्युटरवर हे बदल पूर्णपणे दिसण्यासाठी जून २०२६ च्या मध्यापर्यंतचा वेळ लागू शकतो. त्यामुळे, जर तुमच्या सहकाऱ्याच्या फोनवर नवीन Gmail चा आयकॉन दिसत असेल आणि तुमच्या फोनवर अजूनही जुनाच असेल, तर काळजी करू नका; येत्या काही दिवसांत तुमच्याही फोनवर अ‍ॅप अपडेट उपलब्ध होईल!

तुम्हाला गुगलचा हा नवीन लुक कसा वाटला? जुनी डिझाईन बरी होती की ही नवीन डिझाईन जास्त आवडली?

The post गूगलच्या वर्कस्पेस अ‍ॅप्समध्ये नवीन आयकॉन्स appeared first on MarathiTech - मराठीटेक.