लोकप्रिय डिझाईन एडिटिंग कंपनी Canva ने Affinity Creative Suite बनवणारी Serif कंपनी गेल्या वर्षी अधिग्रहीत केली होती. या अंतर्गत त्यांच्या Affinity Designer, Photo आणि Publisher या तिन्ही सॉफ्टवेअर्सची मालकी कॅन्व्हाला मिळाली. आता काही दिवसांपूर्वी त्यांनी या तिन्ही सॉफ्टवेअरला एकत्र करून एकच सॉफ्टवेअर बनवलं आणि ते आता चक्क सर्वांसाठी मोफत उपलब्ध करून देत असल्याचं सांगितलं आहे!

Download Link : https://www.affinity.studio

कॅन्व्हाने व्यावसायिक डिझाइन सूट अ‍ॅफिनिटी मधील वेक्टर, फोटो एडिटिंग आणि लेआऊट टूल्स एका अ‍ॅपमध्येच सर्वांना फ्री वापरता येतील. अडोबीच्या Photoshop, Illustrator आणि InDesign या तीन सॉफ्टवेअरला नवा आणि तो सुद्धा मोफत मिळणारा चांगला पर्याय म्हणून अफिनिटी सॉफ्टवेअर उपलब्ध असेल.

नवीन अ‍ॅफिनिटी सॉफ्टवेअर आता वेक्टर, फोटो आणि पेज लेआऊटची च्या सर्व सोयी एकाच अॅपमध्ये देणार असल्यामुळे वेगवेगळे अ‍ॅप उघडण्याची गरज कमी होणार आहे आणि डिझायनर्ससाठी कामाचा प्रवाह (workflow) सुलभ होणार आहे.

नव्या लाँचनंतर फक्त काही दिवसांतच अ‍फिनिटीवर दहा लाखांहून अधिक युजर्स जोडले गेले आहेत!

कॅन्व्हाने हे सॉफ्टवेअर फ्री केलं असलं तरी त्यामध्ये जिथे जिथे AI आधारित फीचर्स जोडली आहेत ते वापरण्यासाठी कॅन्व्हाचं प्रीमियम सबस्क्रिप्शन घ्यावं लागेल असं सांगितलं आहे. त्यामुळे मूळ सॉफ्टवेअर फ्री आणि त्यामधील AI सोयीद्वारे उत्पन्न मिळवण्याचं साधन असे दोन्ही उद्देश ते साध्य करण्याच्या प्रयत्नात आहेत.

तुमची कामे (प्रोजेक्ट्स) Locally तुमच्या डिव्हाइसवर साठवल्या जातील आणि कॅन्व्हा ती तुमच्या परवानगीशिवाय AI ट्रेनिंगसाठी वापरणार नाही, असं कंपनीने सध्यातरी सांगितलं आहे. त्यामुळे गोपनीयतेबाबत असणारा प्रश्न आणि त्याबाबतची शंका कमी करण्याचा प्रयत्न त्यांनी केला आहे. नवीन Affinity सॉफ्टवेअर वापरण्यासाठी Canva चं सबस्क्रिप्शन घेण्याचं बंधन नाही. त्याशिवायसुद्धा नेहमीप्रमाणे वापर करता येईलच.

विशेष म्हणजे अडोबीच्या फॉटोशॉपमधील .psd फाइल्स आपण अफिनिटीमध्येही import करून एडिट करू शकता. नव्या सॉफ्टवेअरसाठी त्यांना स्वतःचा नवीन .af नावाचा फॉरमॅट आणला आहे.

अडोबीने गेल्या काही वर्षात त्यांच्या क्रिएटिव क्लाऊडच्या सबस्क्रिप्शनच्या किंमतीमध्ये केलेली भरमसाठ वाढ आता विद्यार्थी आणि फ्रीलान्स पद्धतीने काम करणाऱ्या युजर्सच्या आवाक्याबाहेर गेली आहे. कॅन्व्हामधील मोफत टूल्स उपलब्ध होणे हा बदल त्या डिझायनर्ससाठी मोठी संधी आहे.

भारतात तरी मोठ्या प्रमाणात अडोबीचं पायरेटेड/क्रॅक केलेलंच सॉफ्टवेअर वापरलं जातं. त्यामुळे ते सोडून नैतिकता म्हणून भारतीय युजर्स अफिनिटी कडे वळण्याची शक्यता कमी असली तरी कॅन्व्हा प्रीमियमचा वापर करणारे युजर्स काही प्रमाणात अफिनिटीचा वापर सुरू करू शकतील. अर्थात अडोबीचे टूल्स अधिक प्रगत आणि अनेक वर्षे वापरात असल्यामुळे कोणत्याही कंपनीला त्यांचे युजर्स लगेच वळवणं अवघड आहे.

अडोबी सबस्क्रिप्शन मॉडेलला वैतागलेले युजर्स यामुळे पुढच्या काही वर्षांत इतर पर्याय मात्र नक्की शोधू लागतील आणि यामुळे व रोज नवनव्या रूपात येणारया AI टूल्समुळे डिझाइन व क्रिएटिव्ह कामकाजात मोठे बदल पाहायला मिळू शकतात.

The post Canva चं Affinity सॉफ्टवेअर आता सर्वांसाठी मोफत उपलब्ध! appeared first on MarathiTech - मराठीटेक.

OpenAI ने आज काही वेळापूर्वी त्यांचा स्वतःचा ब्राऊजर जाहीर केला असून याचं नाव ChatGPT Atlas (चॅटजीपीटी ॲटलस) असं असेल. हा AI आधारित ब्राऊजर असून ChatGPT अंतर्भूत आहे. आज फक्त macOS वर उपलब्ध झाला असून विंडोज, iOS आणि अँड्रॉइडवर नंतर उपलब्ध होणार आहे.

ChatGPT Atlas हा AI आधारित वेब ब्राउझर आहे ज्यामुळे आपण एखादी लिंक किंवा इमेज आधी कॉपी करून मग त्याबद्दल ChatGPT ला त्यांच्या वेबसाइट/ॲपवर जाऊन मग प्रश्न विचारतो त्याऐवजी थेट ब्राऊजरसोबत जोडलेला असल्यामुळे ब्राउझरमधूनच ChatGPT मधील सोयी वापरता येतील. तुम्ही पाहत असलेली वेबसाइट अभ्यासून ChatGPT त्यावरून मदत करू शकतो.

आपण ChatGPT ला या ब्राऊजरमध्ये अमुक एखाद्या वेबसाईटवर माझ्यासाठी काही ठरविक वस्तू Cart मध्ये ॲड करून खरेदी कर असं सांगू शकतो! त्यानुसार त्या त्या प्रॉडक्ट पेजवर जाऊन आपण संगीतल्याप्रमाणे आणि आधी दिलेल्या माहितीनुसार तो आपल्यावतीने त्या वस्तूंची खरेदी पार पाडेल! आपण पाहत असलेल्या कोणत्याही वेबसाइटवरील कंटेंटचा सारांश मागू शकतो, वस्तूंची तुलना करायला सांगू शकतो किंवा डेटा असेल तर त्याचा अभ्यास करून प्रश्न विचारू शकतो! ईमेलमधील टेक्स्ट हायलाइट क्रेन, कॅलेंडरमध्ये invite तयार करणे, डॉक्युमेंटमधील काही बदल असं बरंच काही करता येतं…

अशा प्रकारच्या ब्राऊजिंगला Agent Mode किंवा Agentic Browsing म्हणतात ज्यामध्ये आपण आपल्या शब्दांत ChatGPT ला आपल्याला करायचं असलेलं काम सांगायचं त्याबद्दल एखादा प्रश्न विचारेल आणि दिलेल्या उत्तरानुसार आपल्या वतीने ChatGPT स्वतः त्या वेबसाइटवर जाऊन ती कृती करेल. सध्या ज्या गोष्टी आपल्याला ChatGPT च्या त्यांच्या वेबसाइट/ॲपवर जाऊन कराव्या लागायच्या त्या आता थेट ब्राऊजरमधूनच एका क्लिकवर बाजूला साइडबार मध्ये होताना दिसतील!

ChatGPT Atlas Download Link (Only for macOS) https://chatgpt.com/atlas

ChatGPT Atlas मधील काही खास सोयी खालीलप्रमाणे

• आपण सांगितलेल्या गोष्टीसाठी आपण उघडलेल्या सर्व टॅब्ज आणि वेबसाइट्सचा एकत्रित अभ्यास करून माहिती देऊ शकेल!
• दिलेली माहिती आणि उघडलेल्या वेबसाइट्सचा योग्य मेळ घालून गोष्टी automate करू शकेल.
• एजंट मोड (Agent Mode) ब्राउझरमध्ये तुमचं काम थेट ChatGPT ला द्यायचं झालं तर Agent Mode मदत करेल उदाहरणार्थ, तुम्हाला एखादी पार्टी आयोजित करायची असेल तर ChatGPT Atlas मध्ये अमुक अमुक वस्तू शोध, कार्टमध्ये भर आणि ऑर्डर दे किंवा एखादी फ्लाइट/हॉटेल शोधून बुक कर अशी कामं ते ऑनलाइन स्वतः करून देऊ शकतो.
• गोपनीयतेसाठी अनेक पर्याय उपलब्ध.
• ब्राउझर मेमरी अशी सुविधा आहे म्हणजे तुमचे शोध, पाहिलेले पेजेस, केलेलं काम लक्षात ठेऊन त्या माहितीचा उपयोग करून ChatGPT तुम्हाला पुढे मदत करू शकतो.
• ब्राउझर मेमरी वापरणं ही तुमची संमतीने होते. तुम्ही पाहिलेली पेजेस, सर्चचा इतिहास, हे सर्व ब्राउझरमध्ये वगळू शकता किंवा Incongnito मोडमध्ये शोधू शकता. तसेच कोणत्या साइट्सवर ChatGPT ला पाहता येईल हे तुम्ही निवडू शकता.
• AI द्वारे टॅब मॅनेजमेंट करता येईल!

Atlas ब्राऊजरसुद्धा सध्या उपलब्ध असलेल्या गूगल क्रोम, मायक्रोसॉफ्ट एज, Brave, सफारी अशा ब्राऊजर्स प्रमाणे Chromium वापरुनच तयार केलेला आहे त्यामुळे गूगल क्रोमसाठी उपलब्ध असलेल्या Extensions सारख्या सर्व सोयी यामध्येही मिळतीलच.

ChatGPT च्या Agent Mode मध्ये अजूनही काही धोके आहेत असं स्वतः OpenAI ने सांगितलं आहे. तुमच्या वतीने काम करताना साध्या चुका करण्याव्यतिरिक्त, एजंट लपलेल्या चुकीच्या सूचनांनाही बळी पडू शकतात. अशा सूचना वेबपेज किंवा ईमेलसारख्या ठिकाणी लपविल्या जाऊ शकतात, ज्यांचा उद्देश ChatGPT एजंटच्या अपेक्षित वर्तनावर नियंत्रण मिळवणे असतो. यामुळे तुम्ही लॉग इन केलेल्या साइट्समधील माहिती चोरी जाणे किंवा तुम्ही नको असलेल्या कृती केल्या जाण्याची शक्यता निर्माण होऊ शकते. ही अडचण Atlas, Comet अशा सर्वच Agentic Browsers मध्ये असणार आहे.

याची नव्या ब्राऊजरची घोषणा झाल्यावर त्यांची स्पर्धा ब्राऊजर विश्वात सध्याचा राजा असलेल्या गूगल क्रोमसोबत असल्यामुळे गूगलची मालकी असलेल्या Alphabet कंपनीचे शेयर्स ३.४ टक्क्यानी कोसळले आहेत (अर्थात काही वेळातच सावरलेसुद्धा) ! गूगलसुद्धा Gemini मार्फत अशा सोयी गूगल क्रोममध्ये आणत आहे आणि Perplexity ने काही दिवसांपूर्वीच Comet ब्राऊजर आणला आहे जो या नव्या ChatGPT Atlas प्रमाणेच काम करतो. आता या सगळ्यांच्या स्पर्धेत कोण जिंकतो हे पुढे समजेलच..

The post आता ChatGPT चा Atlas नावाचा स्वतःचा ब्राऊजर : गूगल क्रोमचा नवा स्पर्धक? appeared first on MarathiTech - मराठीटेक.

अडोबी (Adobe) ने त्यांच्या लोकप्रिय फॉटोशॉप सॉफ्टवेअरमध्ये नवी Generative Fill ची सोय आणली आहे. याद्वारे काही शब्द लिहून क्लिक केल्यास कोणत्याही फोटोमध्ये हवे तसे बदल करता येतील! ही सोय सध्या चाचणी आवृत्तीत असून लवकरच सर्वांसाठी उपलब्ध होणार आहे!

Adobe Firefly हे या कंपनीचं generative AI engine असून याच्या मदतीनेच फॉटोशॉप आता हे Generative टूल वापरू शकेल. कोणत्याही इमेजचा आपल्याला हवा तेव्हढा आकार वाढवणे, कल्पना होईल ती वस्तू जोडणे, काही मोजक्या शब्दांच्या इनपुटवर एका क्लिकने इमेजमध्ये बदल करणे शक्य होणार आहे.

अर्थात यामुळे AI आधारित टूल्सबद्दल व्यक्त होत असलेली भीती आणखी वाढतच जाईल. असं तंत्रज्ञान कोणत्याही व्यक्तीच्या हातात सहज उपलब्ध होत असल्यामुळे गैरप्रकरांमध्ये नक्कीच वाढ होईल आणि येत्या काही दिवसात हे दिसून येईलच…

The post अडोबीची फोटोशॉपमध्ये नवी सोय : Generative Fill appeared first on MarathiTech - मराठीटेक.

जवळपास प्रत्येक विंडोज लॅपटॉप/पीसीवर इंस्टॉल केल्या जाणाऱ्या VLC Media Player वर भारत सरकारतर्फे दोन-तीन महिन्यांपासून बंदी घालण्यात आली आहे. त्यांच्या वेबसाइटवर गेल्यास ती वेबसाइट {videolan.org) इलेक्ट्रॉनिक्स आणि आयटी मंत्रालयाच्या आयटी अॅक्ट अंतर्गत ब्लॉक करण्यात आली आहे अशी नोटिस दिसते!

Videolan या VLC च्या डेव्हलपर्सच्या म्हणण्यानुसार १३ फेब्रुवारीपासून त्यांची वेबसाइट ब्लॉक करण्यात आली आहे. त्यामुळे या मीडिया प्लेयरची विंडोज आवृत्ती डाउनलोड करता येत नाही. सरकारमधील संबंधित लोकांच्या म्हणण्यानुसार या VLC मधील काही त्रुटींमुळे Cicada नावाचा चीनी हॅकर्स ग्रुप याचा वापर करून वेगवेगळ्या देशांमधील युजर्सची माहिती चोरत आहे.

प्रत्यक्षात VLC मध्ये तशा कोणत्याही त्रुटी नसल्याचं Videolan डेव्हलपर्सनी सांगितलं आहे. शिवाय सरकारनेही अद्याप नेमकी का बंदी घालण्यात आली आहे याचं स्पष्टीकरण दिलेलं नाही. VLC सारखा Open Source सॉफ्टवेअर केवळ त्याचा वापर अशा गोष्टीसाठी केला जातो म्हणून आलेल्या बातम्यांच्या आधारे थेट सॉफ्टवेअरवरच बंदी घालण्यात आली आहे. अनेकांचं याबाबत असंही म्हणणं आहे की या तर्कानुसार तर विंडोज ऑपरेटिंग सिस्टमवर पण बंदी घालायला हवी!

आमचंही वैयक्तिक मत असं आहे का ओपन सोर्स सॉफ्टवेअर मध्ये खरंच काही त्रुटी असेल तर त्यांनी तसं निदर्शनास आणून द्यावं अन्यथा त्यांच्यावर विनाकारण बंदी घालण्यात काहीच अर्थ नाही. आपण सर्वजण हे सॉफ्टवेअर वर्षानुवर्षं वापरत आलेलो आहोतच.

Videolan नेही त्यांच्या ट्विटर अकाऊंटवरून तुम्ही भारतीय युजर्स असाल तर आम्हाला मदत करा आणि तुमच्या सरकारला ही चूक निदर्शनास आणून द्या असं आवाहन केलं आहे. सध्या सरसकट सर्वच ISP वर हा ब्लॉक केलेला दिसत नाही. काही ठराविक ISP वर ब्लॉक केल्याची नोटिस दिसत आहे. उदा. Airtel, Vi, Jio

VLC चे अँड्रॉइड व iOS ॲप्स अजूनही डाउनलोड करण्यासाठी उपलब्ध आहेत. Windows आवृत्ती व वेबसाइट वरील बंदी संबंधित व्यक्तींची चूक लक्षात आल्यावर कदाचित उठवली जाईल.

यावरील बंदी उठेपर्यंत तुम्ही इतर काही पर्याय वापरू शकता त्यांची यादी खाली दिली आहे.

• K-Lite Codec Pack
• 5KPlayer
• KMPlayer
• GOM Player
• Windows Movies & TV (Inbuilt)

The post VLC मीडिया प्लेयरवर भारतात बंदी : वेबसाइट, डाउनलोड ब्लॉक! appeared first on MarathiTech - मराठीटेक.

क्रिएटर्स आणि फोटो एडिटिंग साठी वापरलं जाणारं सर्वात लोकप्रिय सॉफ्टवेअर म्हणजे अडोबी कंपनीचं फॉटोशॉप. काल झालेल्या Adobe Max कार्यक्रमात त्यांनी अनेक नव्या गोष्टी जाहीर केल्या असून यामध्ये विशेष ठरेल अशी घोषणा होती ती म्हणजे फॉटोशॉप आता त्यांच्या वेबसाइटवर वापरता येणार आहे याचा अर्थ तुमच्याकडे फॉटोशॉप इंस्टॉल केलेलं नसेल तरीही तुम्ही बेसिक एडिटिंगसाठी ऑनलाइन पर्याय वापरू शकता.

नवा पर्याय ऑफिस ३६५, गूगल डॉक्स प्रमाणे ऑनलाइन काम करेल. Photoshop and Illustrator दोन्हीची वेब आवृत्ती जाहीर करण्यात आली आहे. गूगल क्रोम आणि मायक्रोसॉफ्ट एज ब्राऊजरमध्येच हा पर्याय वापरता येईल. या पर्यायाची सध्या चाचणी सुरू करण्यात आली आहे.

ही वेबसाइट सेवा जर तुमच्याकडे अडोबी क्रिएटिव क्लाऊडचं सभासदत्व असेल तरच वापरता येईल याची नोंद घ्या. मात्र तुम्ही तुमच्या क्लायंटना केलेलं काम दाखवण्यासाठी याचा वापर करणार असाल तर त्यासाठी क्लायंटना सभासदत्व घेण्याची गरज नाही ते तुमची फाइल उघडून जे काही बदल आहेत ते कॉमेंटद्वारे सांगू शकतील. त्यानंतर तुम्ही बेसिक एडिट्स करून लगेच ऑनलाइन सेव्ह करू शकाल!

या सोबतच अडोबीने फॉटोशॉप, आफ्टर इफेक्टस, प्रीमियर प्रोच्या नव्या आवृत्त्या आणि त्यामधील नव्या सोयीबद्दल माहिती जाहीर केली आहे. blog.adobe.com वर अधिक वाचू शकता.

जर तुम्हाला याच गोष्टी करण्यासाठी मोफत ऑनलाइन पर्याय हवा असेल तर PhotoPea (www.photopea.com) आधीपासून उपलब्ध आहे. हे अधिकृत फॉटोशॉप नसलं तरी त्यासारखं डिझाईन दिलेलं आहे. याद्वारे तुम्ही कधीही ब्राऊजर उघडून बेसिक एडिटिंग करून फाइल्स सेव्ह करू शकता.

The post अडोबी फॉटोशॉप आता वेबसाइटद्वारे ब्राऊजरमध्येच वापरा! appeared first on MarathiTech - मराठीटेक.