उपयोगी अॅप्स मालिकेमध्ये हा चौथा भाग असून यामध्ये आपण UTS, स्केच बुक, वॉली, व गूगल लेन्स हे अॅप्स पाहणार आहोत. आम्ही दिलेल्या अॅप्सना तुमच्या विशिष्ट गरजेनुसार आणखी चांगले पर्याय सुद्धा उपलब्ध असू शकतात त्याचा सुद्धा आपण शोध घेऊ शकता. आपल्या प्रतिक्रियांसोबतच जर आपणास कोणते अॅप या लेखामध्ये सुचवायचे असेल तर आम्हाला अवश्य कळवा.

SketchBook – draw and paint : ऑटोडेस्कतर्फे उपलब्ध असणारे स्केच बुक अॅप कलाकारांसाठी पर्वणीच आहे. हे अॅप प्ले स्टोअर त्याचबरोबर डेस्कटॉपवर  काही दिवसांपूर्वी मोफत उपलब्ध झाले असून आपणास फक्त मोफत वापरण्यासाठी अकाउंट तयार करावे लागणार आहे. यामध्ये खूपसारे पर्याय जसे की क्विक कंट्रोल, विविध पेन/पेन्सिल ऑप्शन, कलर, टूल्स त्याचबरोबर जवळपास १९० ब्रश पर्याय यामध्ये उपलब्ध आहेत. मोबाइलद्वारे स्कॅन करून त्यामध्ये विविध कलर वापरण्याचे पर्याय सुद्धा यामध्ये आहे. विविध प्रकारात एक्स्पोर्ट करण्याची सुविधा असल्याकारणाने jpg, PDF अशा अनेक स्वरूपात फाईल सेव्ह करता येते.

डाउनलोड लिंक – Android / Windows (PC & Laptop)

UTS Mobile Ticketing : लोकल किंवा रेल्वेच्या जनरल (अनारक्षित) तिकीट ने प्रवास करावा लागला तर प्लॅटफॉर्मवरील गर्दीमध्ये उभे राहून तिकीट काढण्यापेक्षा भारतीय रेल्वेतर्फे उपलब्ध असणाऱ्या UTS अॅपची नक्कीच मदत होते. यामध्ये प्लॅटफॉर्म तिकीट काढण्याची सुद्धा सुविधा उपलब्ध आहे. या अॅपद्वारे पेपरलेस आणि प्रिंट असे दोन पद्धतीचे तिकीट बुकिंग पर्याय उपलब्ध असुन जर आपण रेल्वे ट्रॅक तसेच स्टेशन पासून दूर असाल तर याचा वापर करू शकता परंतु ठराविक म्हणजेच जवळपास ५ किमी परिसरात असणे आवश्यक आहे. तिकीट चेकरला पाहून लगेच तिकीट काढता येऊ नये या उद्देशाने स्टेशनमध्ये असताना तसेच रेल्वे रुळाजवळ असाल तर पेपरलेस तिकीट काढता येत नाही. प्रिंट तिकीट हे आपण कुठूनही काढू शकता व रेल्वे स्टेशनवर उपलब्ध असणाऱ्या मशीनमध्ये आपला मोबाइल नंबर व तिकीट कोड टाकून प्रिंट करू शकता. तिकीट प्रिंट करणे आवश्यक असून न केल्यास विना तिकीट प्रवास करत असल्याचे समजले जाईल.

डाउनलोड लिंक –  UTS Mobile Ticketing

Walli : जर आपणास चांगले वॉलपेपर हवे असतील तर वॉली अॅप एक चांगला पर्याय आहे. यामधील वॉलपेपर हे आर्टिस्टने तयार केलेले असून त्यांच्यातर्फेच अपलोड केले जातात. आपण सुद्धा आर्टिस्ट म्हणून यामध्ये सहभागी होऊन आपले फोटो अपलोड करू शकता . यामध्ये अनेक सारे पर्याय उपलब्ध असून नेहमीपेक्षा हटके वॉलपेपर पाहायला मिळतात.  मोफत डाउनलोड करण्याची सुविधा यामध्ये उपलब्ध असून आपण आपल्या अकाउंटवर आवडणारे सेव्ह सुद्धा करता येतात.

डाउनलोड लिंक – Walli – 4K, HD Wallpapers & Backgrounds

Google Lens : गूगल लेन्स अॅप आपणास कॅमेराच्या मदतीने समोर असणाऱ्या अनेक गोष्टींबद्दल माहिती मिळविण्यास मदत करते. जसे की आपण एखाद्या परिसराबद्दल गूगल लेन्स द्वारे माहिती मिळवू शकता त्यामध्ये नाव, रेटिंग, कामकाजाची वेळ इत्यादी, बुक पाहिल्यास त्याबद्दलची माहिती, एखादा वनस्पती/फुल/प्राणी पाहिल्यास गूगल लेन्सचा वापर करून त्यांच्याबद्दल माहिती मिळवता येते. दुसऱ्या भाषेतील शब्द ट्रान्सलेट करण्याची सोय त्याचबरोबर तुमच्या कॅलेंडरमध्ये इव्हेंट जोडणे वगैरे. हे अॅप गूगलतर्फे मोफत उपलब्ध आहे.

डाउनलोड लिंक – Google Lens

उपयोगी अॅप्स मालिकेतील तिसऱ्या भागामध्ये आपण आणखी काही उपयुक्त अॅप्स पाहणार आहोत. यामध्ये पॉडकास्ट, नोट्स, स्क्रीन शेअर, म्युझिक प्लेअर सारख्या अॅप्सचा समावेश आहे. आम्ही दिलेल्या अॅप्सना तुमच्या विशिष्ट गरजेनुसार आणखी चांगले पर्याय सुद्धा उपलब्ध असू शकतात त्याचा सुद्धा आपण शोध घेऊ शकता. आपल्या प्रतिक्रियांसोबतच जर आपणास कोणते अॅप या लेखामध्ये सुचवायचे असेल तर आम्हाला अवश्य कळवा.

Podcast Apps –  मोकळ्या वेळेमध्ये असो की काही काम करत असताना आपण म्युझिक/रेडिओ ऐकणे, पुस्तके वाचणे अशा गोष्टी करत असतोच. परंतु आपणास याव्यतिरिक्त काही नवीन हवे असल्यास पॉडकास्ट अॅप्स नक्कीच फायद्याचे ठरतात.  पॉडकास्ट अॅप्स म्हणजे विविध कार्यक्रम (ऑडिओ स्वरूपात) जसे की न्युज, मनोरंजक त्याचबरोबर माहितीपर कार्यक्रम उपलब्ध करून देणारे अॅप्स. पॉडकास्ट अॅप्सच्या मदतीने आपण फक्त मनोरंजकच नाही तर माहितीपर, शैक्षणिक प्रकारातील विविध कार्यक्रम ऐकू शकतो. यासाठी अनेक अॅप्स उपलब्ध असून आपणास आवडणारे अॅप घेऊन यूट्यूबवर ज्यापद्धतीने आपण चॅनेल शोधून सबस्क्रायबर्स करतो त्याचप्रमाणे पॉडकास्ट अॅप्स वापरता येतात.पॉडकास्ट अॅप्सवर इंग्रजी कॉन्टेट खूप मोठ्या प्रमाणावर उपलब्ध असून टेड टॉक, BBC, इकॉनॉमिस्ट पासून अनेक भारतीय चॅनल सुद्धा उपलब्ध आहेत. तर मराठीमध्ये सध्या राहुल देशपांडे, स्टोरीटेल कट्टा इत्यादींचेच चॅनेल आहेत. आपण कोणत्याही पॉडकास्ट अॅपवरुन आपल्या आवडीचे कार्यक्रम ऐकू शकता. खाली आम्ही काही चांगले फ़ी अॅप्स दिले असून पॉकेट कास्ट म्हणून पेड अॅप सुद्धा उत्तम आहे.
डाउनलोड लिंक –  Podcast Player / Google Podcast / Castbox / Pocket Cast 

Microsoft OneNote – मायक्रोसॉफ्टतर्फे उपलब्ध असणारे वन नोट हे अॅप फक्त नोट्स ठेवण्यासाठीच नाही तर आपण विविध प्रोजेक्टवर याद्वारे काम करू शकतो. वन नोट हे मायक्रोसॉफ्ट ऑफिसचा भाग असून मोबाइल अॅपद्वारे आपण सहजपणे अनेक गोष्टींवर काम करू शकता. लॅपटॉप/डेस्कटॉपवर मायक्रोसॉफ्टतर्फे मोफत उपलब्ध असल्याकारणाने दोन्हीच्या माध्यमातून प्रोडूक्टिव्हिटी वाढण्यास चांगलीच मदत होते. वन नोटद्वारे नवीन नोटबुक/प्रोजेक्ट करणे त्यामध्ये विविध उपप्रकार आणण्यापासून फोटो, ग्राफ, आकृत्या सुद्धा जोडता येतात. आपण सेव्ह केलेल्या डेटामधील माहिती शोधण्याचा पर्यायसुद्धा यामध्ये उपलब्ध आहेच.
डाउनलोड लिंक – Microsoft OneNote Mobile App & Laptop/Desktop

TeamViewer for Remote Control – आपल्या मोबाइलवरून कोणताही लॅपटॉप/डेस्कटॉपवर त्याचबरोबर मोबाइल कंट्रोल करण्यासाठी हे एक उत्तम अॅप आहे. या अॅपच्या मदतीने सहजरित्या कोणत्याही गोष्टीबद्दल आपण सपोर्ट देऊ शकतो. त्याचबरोबर यामध्ये फाईल ट्रान्सफर, चॅट सारखे फीचर्स उपलब्ध आहेत. डेस्कटॉपसाठी हे अॅप खूपच प्रसिद्ध असून मोबाइल अॅपच्या माध्यमातूनही अनेक सुविधा आपणासाठी उपलब्ध आहेत. अॅप वापरण्यासाठी आपल्या लॅपटॉप/डेस्कटॉपवर किंवा मोबाइल कंट्रोल करायचा असल्यास तिथे सुद्धा हे अॅप असणे आवश्यक असून एकदा लॉगिन ID व पासवर्ड टाकल्यानंतर आपण सहजपणे इतर डीव्हाइस कंट्रोल करू शकतो.
डाउनलोड लिंक – TeamViewer for Remote Control  / Laptop/Desktop

Retro Music – अनेकांच्या मोबाईलमध्ये ऑफलाईन म्युझिक फाइल्स उपलब्ध असतात त्यासाठीच रेट्रो म्युझिक अॅप  उत्तम पर्याय आहे. हे अॅप मटेरियल डिझाईन मध्ये असून याचा इंटरफेस सुद्धा अतिशय उत्तम आहे. Gapless playback, Sleep Timer, Lockscreen Playback Controls सारख्या विविध सोयी यामध्ये उपलब्ध असून ऑफलाईन मीडिया फाइल्स ऐकण्यासाठी हे अॅप एक उत्तम पर्याय देते.
डाउनलोड लिंक – Retro Music

उपयोगी अॅप्स मालिकेतील दुसऱ्या भागामध्ये आपण आणखी काही चांगले अॅप्स पाहणार आहोत. या मालिकेद्वारे आमचा प्रयत्न आहे की काही चांगले अॅप्स ज्यामध्ये काही नावाजलेले असतील तर काही भन्नाट अॅप्सची वाचकांना ओळख व्हावी. आम्ही दिलेल्या अॅप्सना तुमच्या विशिष्ट गरजेनुसार आणखी चांगले पर्याय सुद्धा उपलब्ध असू शकतात त्याचा सुद्धा आपण शोध घेऊ शकता. आपल्या प्रतिक्रियांसोबतच जर आपणास कोणते अॅप या लेखामध्ये सुचवायचे असेल तर आम्हाला अवश्य कळवा.

Settle Up – Group Expenses : अनेकदा ग्रुपमध्ये फिरायला जाताना असो की होस्टेलवर एकत्र राहताना, आपणास कोणी केव्हा आणि किती पैसे दिले वगैरेचे हिशोब ठेवावेच लागतात. यासाठीच Settle Up हे अॅप नक्कीच उपयोगी पडते. यामध्ये एकट्याने नोंदी ठेवता येतात किंवा सर्वांनी मिळून सुद्धा. जमा केलेल्या रकमेसोबतच तिथे कशासाठी खर्च केला आहे याची माहिती सुद्धा लिहिता येते. यामध्ये एक चांगली सुविधा असून जेव्हा शेवटचा हिशोब करण्याची वेळ येते त्यावेळेस आपणास डायरेक्ट कोणत्या मेंबरने किती रक्कम कोणाला द्यायची आहे याबद्दल समजते. या अॅपचे वेब व्हर्जन सुद्धा उपलब्ध असून सर्व डेटा ई-मेल करण्याची सुविधा तसेच CSV एक्स्पोर्ट (मायक्रोसॉफ्ट एक्सेलमध्ये पाहता येईल) ची सुविधा उपलब्ध आहे.

डाउनलोड लिंक – Settle Up – Group Expenses

Your Phone Companion : मोबाईलमध्ये फोटो काढल्यानंतर मोबाइलमधून डेस्कटॉपवर पाठवताना डेटा केबल जोडण्याच्या त्रासापासून सुटका करण्यासाठी हे अॅप नक्कीच उपयोगी पडते. सोबतच मोबाइलवर आलेले मेसेज सुद्धा यामधून वाचता येतात.  मायक्रोसॉफ्ट तर्फे हे उपलब्ध करून देण्यात आले असून येत्या काळात यामध्ये अनेक नवीन सुविधांची भर पडण्याची शक्यता आहे. सध्या लेटेस्ट २५ फोटोच यामधून इंटरनेटद्वारे शेअर करता येतात. यासाठी आपल्या डेस्कटॉपवर Your Phone अॅप असणे आवश्यक आहे. जर आपणाकडे विंडोज १० लेटेस्ट व्हर्जन असेल तर यामध्ये आधीपासूनच हे अॅप उपलब्ध आहे.

डाउनलोड लिंक –  मोबाईल / डेस्कटॉप

LastPass Password Manager : आपले खूप सारे अकाउंट व त्यांचे पासवर्ड लक्षात ठेवणे खूपच अवघड होऊन जाते अशामुळे एकसारखे पासवर्ड वापरले जातात व यामुळे एखादा पासवर्ड किंवा त्याबद्दलची कोणतीही माहिती वाईट व्यक्तींच्या हाती लागल्यास आपल्या ऑनलाईन सुरक्षिततेमध्ये धोके उद्भवू शकतात. यासाठीच लास्टपास हे अॅप उपयोगी पडते.  तुम्ही फक्त ‘पासवर्ड मॅनेजर’ चा मास्टर पासवर्ड हा  एकच पासवर्ड लक्षात ठेवायचा आणि बाकी सर्व पासवर्ड पासवर्ड मॅनेजर लक्षात ठेवेल. इथे तुम्ही फक्त पासवर्डच नाही तर आणखी ही माहिती साठवू शकता जसे नोट्स, डॉक्युमेंट, फॉर्म फिल्स आणि बरेच काही…ही Encrypted (सांकेतिक भाषेत) साठवलेली असल्याकारणाने  (Lastpass स्वतः सुद्धा तुमचा Encrypted पासवर्ड/डाटा पाहू शकत नाही) जरी Lastpass चा डाटा लीक झाला तरी त्याचा उपयोग करता येत नाही.

याबद्दल आमचा लेख पहा – पासवर्ड मॅनेजर्स…

डाउनलोड लिंक –  LastPass Password Manager

Firefox Rocket – Fast and Lightweight Web Browser : काही दिवसांपूर्वी फायरफॉक्सतर्फे हे अॅप सादर करण्यात आले असून UC Browser सारख्या अॅपद्वारे होणाऱ्या डेटा लीक तसेच येणाऱ्या नोटिफिकेशन्स, अॅपमधील नको असलेल्या न्युजपासून  सुटका मिळविण्यासाठी हे अॅप नक्कीच उपयोगी पडते. हे हलके असे अॅप असून वापरण्यास सुद्धा सोपे आहे. त्याचबरोबर डेटा सेव्ह, अॅड ट्रॅकिंग, ट्रॅकिंग प्रोटेक्शन, पेज ऑफलाईन सेव्ह करण्याची सोय, यांसारख्या सुविधांचा समावेश आहे.

डाउनलोड लिंक –  Firefox Rocket