काल रिलायन्स जिओ आणि आज लगेचच एयरटेलने सुद्धा त्यांच्या प्रिपेड प्लॅन्सच्या किंमतीमध्ये जवळपास १२ ते २५% वाढ केली आहे! कदाचित Vi सुद्धा नवीन प्लॅन्स लवकरच जाहीर करेल. जरी किंमती वाढल्या असल्या तरी या प्लॅन्समध्ये मिळणारा डेटा आणि व्हॅलिडिटी यामध्ये कोणताही बदल झालेला नाही. दोन्ही कंपन्यांचे प्लॅन्स ३ जुलै २०२४ पासून लागू होतील. प्रिपेडसोबत काही पोस्टपेड प्लॅन्सच्याही किंमती वाढवल्या आहेत.

नेटवर्क टेक्नॉलजी आणि त्यासाठी लागणारी गुंतवणूक यानुसार एक यशस्वी बिझनेस मॉडेल सुरू ठेवण्यासाठी आम्हाला हे बदल करावे लागत आहेत असं एयरटेलने सांगितलं आहे. ARPU (Avarage Revenue Per User) म्हणजेच प्रत्येक ग्राहकाकडून मिळणारं सरासरी उत्पन्न ३०० च्या वर असावं असं त्यांचं म्हणणं आहे!

जिओचे सर्व नवे प्लॅन्स तुम्ही खालील इमेजमध्ये पाहू शकता. २०९ चा 1GB/Day २८ दिवसांसाठीचा प्लॅन आता २४९ रुपये करण्यात आला आहे. २९९ चा 2GB/Day २८ दिवसांसाठीचा प्लॅन आता ३४९ रुपये करण्यात आला आहे. जिओचे रु. ३९५ आणि रु. १५५९ चा प्लॅन आता रीचार्ज करण्यास उपलब्ध नाहीत असंही दिसून येत आहे!

मोफत अनलिमिटेड 5G सुद्धा आता फक्त 2GB/Day किंवा त्यावरील प्लॅन्सवरच वापरता येणार आहे! प्रिपेडसोबत काही पोस्टपेड प्लॅन्सच्याही किंमती वाढवल्या आहेत.

तुम्ही ३ जुलै पूर्वी जिओचा रीचार्ज करून ठेवणार असाल तर खालील गोष्टी लक्षात ठेवा.

• जिओला तुम्ही तुमचा सध्याचा रीचार्ज कोणताही असेल तरीही जुन्या किंमतीचा कोणताही प्लॅन आधीच रीचार्ज करून ठेवण्यासाठी निवडू शकता.
• शक्यतो हे रीचार्ज MyJio App वरच करा.
• तुम्ही जास्तीत जास्त ५० रीचार्ज करून ठेवू शकता. (अर्थात इतके रीचार्ज करून ठेवण्याची गरज नाहीच पण किमान वर्ष भराचे रीचार्ज करून ठेवा)
• रीचार्ज आत्ताच करून ठेवले तर तुमचे वर्षाला जवळपास ६०० रु वाचू शकतील!

एयरटेलनेसुद्धा त्यांचे नवे प्लॅन्स लगेच जाहीर केले असून त्यांचा २६५ चा 1GB/Day २८ दिवसांसाठीचा प्लॅन आता २९९ रुपये करण्यात आला आहे. इतर प्लॅन्स खालील इमेजमध्ये पाहू शकता.

तुम्ही ३ जुलै पूर्वी एयरटेलचा रीचार्ज करून ठेवणार असाल तर खालील गोष्टी लक्षात ठेवा.

• तुम्ही सध्या सुरू असलेल्या प्लॅनच पुढे सुरू ठेवू शकता. सध्या सुरू असलेल्या प्लॅनचाच रीचार्ज केला तरच तो stack होईल म्हणजेच त्याची व्हॅलिडिटी पुढे वाढेल.
• पुढे सुरू ठेवण्यासाठी रीचार्जची व्हॅलिडिटी जास्तीतजास्त ७३० दिवस असेल तरच ती पुढे सुरू राहील.
• you can stack up your recharge upto 730 days with the condition of recharge should be done with same nature of the plan.
• जर तुम्ही सध्या सुरू असलेला प्लॅन सोडून दुसऱ्या किंमतीचा रीचार्ज केला तर तो पुढे सुरू राहणार नसून तो प्लॅन लगेच अॅक्टिवेट होईल (तुमच्या जुन्या प्लॅनची व्हॅलिडिटी शिल्लक असेल तरीही तो लगेच बंद होईल.)

नवे प्लॅन्स ३ जुलैपासून लागू होणार असल्यामुळे ३ जुलैच्या आत तुम्ही जुन्या किंमतीत रीचार्ज करून ठेऊ शकता. त्यासाठी Jio Prepaid Plans ह्या लिंकवर आणि एयरटेलचे Airtel Prepaid Plans वर जाऊन तपासून पहा आणि मग रीचार्ज करा.

बरेच महिने स्वस्तात इंटरनेट आणि मोफत कॉलिंग देऊन सवय लावली आणि आता एकाधिकारशाही प्रमाणे या मोजक्या दोन तीन कंपन्या किंमती वाढवत आहेत अशी प्रतिक्रिया सोशल मीडियावर पाहायला मिळत आहे. विशेष म्हणजे तुम्हाला जर फक्त कॉलिंगसाठी प्लॅन्स हवे असतील तर ते आता उपलब्ध नाहीतच. तुम्हाला इंटरनेट डेटा असलेलेच प्लॅन्स घ्यावे लागतात. ज्यांचा तसा काहीच वापर नाही त्यांनासुद्धा असे जास्त किंमतीचे रीचार्ज करण्याशिवाय पर्याय उरणार नाही.

The post जिओ, एयरटेल आणि Vi ने त्यांच्या प्लॅन्सच्या किंमती वाढवल्या! appeared first on MarathiTech - मराठीटेक.

भारतात आता 5G सेवा उपलब्ध होऊन बरेच दिवस झाले आहेत. टप्प्याटप्प्यात अधिकाधिक शहरांमध्ये 5G सेवा जोडण्यात येत आहे. रिलायन्स जियो आणि आता एयरटेलनेसुद्धा त्यांच्या ग्राहकांना 5G सेवेत सहभागी होण्यासाठी खास Welcome Offer आणल्या असून यामध्ये मोफत अमर्यादित 5G इंटरनेट डेटा वापरता येईल! या डेटाचा स्पीडसुद्धा 1Gbps पर्यंत असेल!

खालील ऑफर जियो आणि एयरटेलच्या प्रिपेड व पोस्टपेड दोन्ही ग्राहकांना उपलब्ध आहे.

जियो ग्राहकांसाठी : तुम्हाला तुमचा फोन 5G आहे का हे पहावं लागेल त्यानंतर फोनमध्ये MyJio हे ॲप घेऊन त्यामध्ये 5G च्या बॅनरवर जाऊन तुमच्या नंबरला Welcome Offer उपलब्ध आहे का ते पहा. यासाठी तुम्हाला ₹239 किंवा त्यापेक्षा अधिकचा कोणत्याही प्लॅनने रिचार्ज केलेला असावा. हा तुमचा नेहमीचा 4G प्लॅन असला तरी त्यामध्येच फ्री 5G डेटा मिळणार आहे!

जियोचा एक स्वतंत्र 5G Upgrade Plan सुद्धा असून 61 रुपयांचा रिचार्ज वर 6GB 4G डेटा मिळेल आणि Unlimited 5G डेटा मिळेल. हा प्लॅन वापरण्यासाठी आधी 119, 149, 179, 199, 209 यापैकी कोणतातरी एक प्लॅन ॲक्टिवेट केलेला असावा. २३९ पेक्षा कमी किंमतीच्या प्लॅन वापरणाऱ्या ग्राहकांसाठी हा ६१ रुपयांचा प्लॅन आहे.

एयरटेल ग्राहकांसाठी : तुम्हाला तुमचा फोन 5G आहे का हे पहावं लागेल त्यानंतर फोनमध्ये Airtel Thanks हे ॲप घेऊन त्यामध्ये Claim Unlimited 5G Data असा बॅनर दिसेल त्यावर जाऊन तुमच्या फोनच्या सेटिंग्स व ऑफर पहा. यासाठी तुम्हाला ₹239 किंवा त्यापेक्षा अधिकचा कोणत्याही प्लॅनने रिचार्ज केलेला असावा. हा तुमचा नेहमीचा 4G प्लॅन असला तरी त्यामध्येच फ्री 5G डेटा मिळणार आहे!

तुम्ही 5G नेटवर्क रेंजमध्ये नसल्यास तुमचा प्लॅनमधील 4G डेटा वापरला जाईल हे मात्र लक्षात ठेवा.

ही ऑफर Welcome Offer नावाने आणली असून काही महिन्यांनी नक्कीच स्वतंत्र 5G प्लॅन्स उपलब्ध होतील आणि त्यानुसार वेगळा रिचार्ज करावा लागेल. अधिक माहितीसाठी Airtel Thanks आणि MyJio या ॲप्सचा वापर करा.

The post जियो व एयरटेलतर्फे ग्राहकांना अमर्यादित मोफत 5G डेटा! appeared first on MarathiTech - मराठीटेक.

यूट्यूबने त्यांच्या अॅड फ्री यूट्यूब प्रीमियम आणि यूट्यूब म्युझिकसाठी वार्षिक प्लॅन भारतात उपलब्ध करून दिला आहे. हा प्लॅन नव्या सबस्क्रायबर्ससाठी असून हा खास ऑफर अंतर्गत स्वस्तात उपलब्ध झाला आहे. ही ऑफर २३ जानेवारी २०२२ पर्यंतच उपलब्ध असेल.

या वार्षिक प्लॅनची किंमत ११५९ रुपये आहे. हा प्लॅन फक्त Individual म्हणजे वैयक्तिक यूजर्ससाठी आणि जे पहिल्यांदाच यूट्यूब प्रीमियम वापरणार आहेत त्यांच्यासाठीच उपलब्ध आहे.
फॅमिली व स्टुडंट यूजर्ससाठी नेहमीचा महिन्याचा प्लॅन सुरू असून त्यांना वार्षिक प्लॅन उपलब्ध नाही.

एरवी जर तुम्ही वैयक्तिक प्लॅन घ्यायला गेलात तर त्याची किंमत दरमहा १२९ म्हणजे वर्षाला १५४८ इतकी होते त्याऐवजी जर तुम्ही या ऑफरमध्ये प्लॅन घेतला तर तुम्हाला तो ११५९ रुपयात मिळेल म्हणजेच तुमचे ३८९ रुपये वाचतील!

आणखी एक पर्याय म्हणजे तुम्ही ३ महिन्यांची मोफत ट्रायल घेऊन उर्वरित महिने पैसे दिले तरीही ११६१ रूपयेच जातील. त्यामुळे तोसुद्धा पर्याय या वार्षिक प्लॅन इतक्याच किंमतीत उपलब्ध आहे. पण यामध्ये तुम्हाला तीन महिन्यांनंतर दरमहा १२९ रुपये द्यावे लागतील. (Recurring Payment)

यूट्यूब प्रीमियममध्ये तुम्हाला सर्व व्हिडिओ जाहिरातीशिवाय पाहणे, डाउनलोड करून ऑफलाइन पाहणे, यूट्यूब म्युझिक सेवा (सर्व गाणी) आणि बॅकग्राउंडमध्ये व्हिडिओ प्ले करता येणे अशा सुविधा मिळतात.

YouTube Premium and YouTube Music now available with a New Annual Plan with an offer in India

The post यूट्यूब प्रीमियमचा स्वस्त वार्षिक प्लॅन उपलब्ध! appeared first on MarathiTech - मराठीटेक.

नेटफ्लिक्स या प्रसिद्ध स्ट्रीमिंग सेवेने भारतात त्यांचे नवे प्लॅन्स जाहीर केले असून आधीच्या तुलनेत त्यांची किंमत बरीच कमी झाली आहे. स्वस्त प्लॅन्समुळे अधिकाधिक लोक नेटफ्लिक्स वापरू शकतील. आता प्लॅन्स १४९ रुपयांपासून सुरू होत असून सर्व डिव्हाईसवर वापरता येईल असा बेसिक प्लॅन १९९ रुपयांपासून सुरू होत आहे!

त्यांचा सर्वात महाग प्रीमियम प्लॅन जो UHD कंटेंट उपलब्ध करून देतो तो आता ६४९ दरमहा या किंमतीत उपलब्ध होईल. यामध्ये एकावेळी चार उपकरणांवर कंटेंट पाहता येतो.

तुम्ही सध्या नेटफ्लिक्सचे सभासद असाल तर तुम्हाला आपोआप पुढील प्लॅन्सवर अपग्रेड केलं जाईल. उदा. तुम्ही जर सध्या ४९९ च्या प्लॅन्सवर असाल तर तुम्हाला त्याच किंमतीत पण अधिक पर्याय असलेल्या प्लॅनवर नेण्यात येईल. तुम्हाला जर खालच्या प्लॅनवर जायचं असेल तर तसा पर्याय निवडावा लागेल आणि मग पुढील बिलिंग सायकलमध्ये तो लागू होईल.

नेटफ्लिक्सने २०१६ मध्ये भारतात प्रवेश केला असून अजूनही त्यांना फारसा ग्राहकवर्ग मिळवता आलेला नाही. याचं मुख्य कारण हेच की इतर स्ट्रीमिंग सेवांच्या तुलनेत ह्यांची जास्त किंमत. नेटफ्लिक्सच्या एका महिन्याच्या किंमतीत इतर स्ट्रीमिंग सेवा जवळपास वर्षभर सेवा देत आहेत. कालच आलेल्या माहितीनुसार नेटफ्लिक्सकडे भारतातील OTT प्लॅटफॉर्ममध्ये फक्त ५% हिस्सा आहे. लगेचच आज ही दर कमी करत असल्याची बातमी आली आहे.

नेटफ्लिक्सने यावर्षी ४१ नवे टायटल्स (चित्रपट, मालिका, डॉक्युमेंटरी, इ.) आणत असल्याचं जाहीर केलं होतं.

नेटफ्लिक्सने नवे प्लॅन्स जाहीर करण्यासाठी स्वतंत्र व्हिडिओसुद्धा त्यांच्या सोशल मीडियाद्वारे प्रसारित केला आहे!

The post नेटफ्लिक्सचे भारतात नवे स्वस्त प्लॅन्स जाहीर! appeared first on MarathiTech - मराठीटेक.

गेल्या आठवड्यात एयरटेल आणि Vi ने त्यांची दरवाढ जाहीर केल्यावर आता रिलायन्स जिओने सुद्धा त्यांचे प्रिपेड प्लॅन्सचे दर वाढवत असल्याचं जाहीर केलं आहे. नवे दर १ डिसेंबर २०२१ पासून लागू होतील.

अजूनही तुलेनेने जिओच्या प्लॅन्स इतरांपेक्षा स्वस्त दिसत आहेत. शिवाय जिओ प्लॅन्स सोबत येणाऱ्या लाईव्ह टीव्ही, न्यूज, मासिके अशा इतर सोयीसुद्धा जास्त आहेत. मात्र त्यांची 4G सेवेची गुणवत्ता बऱ्याच ठिकाणी घसरली आहे असं आमच्या बऱ्याच वाचकांनी मत नोंदवलं आहे. बाकी हे त्या त्या ठिकाणावर व इतर बऱ्याच गोष्टींवर अवलंबून असलं तरीही कंपन्यांनी नुसते दर न वाढवता सेवेची गुणवत्तासुद्धा सुधारायला हवी.

इतके दिवस हे स्वस्त प्लॅन्सचे आता लवकरच संपण्याच्या वाटेवर आहेत. कमी पैशात इंटरनेटची सवय लावून आता सर्वच टेलिकॉम कंपन्या एकदम प्लॅन्सच्या किंमती वाढवत नेत असल्याच दिसत आहे. या सर्वांमध्ये फक्त कॉलिंग आणि अमर्याद व्हॅलिडिटी असलेले प्लॅन्स बंद झाले. आता प्रत्येकाला दर महिना रीचार्ज करावाच लागतो. एकंदर पुढे येणाऱ्या काळात या प्लॅन्समध्ये काय बदल पाहायला मिळतील आणि 5G आल्यावर यांची अवस्था काय असेल यावरसुद्धा लक्ष ठेवावं लागेल.

खाली एयरटेल, Vi आणि जिओच्या नव्या प्रिपेड प्लॅन्सची माहिती दिली आहे.

The post एयरटेल, Vi नंतर जिओनेही प्लॅन्सच्या किंमती वाढवल्या! appeared first on MarathiTech - मराठीटेक.