फूड डिलिव्हरीसाठी प्रसिद्ध असलेली झोमॅटो कंपनी आता ग्राहकांना इतर शहरांमधूनही पदार्थ मागवण्याचा पर्याय देत आहे. इतर शहरातील प्रसिद्ध हॉटेलमधील लोकप्रियपदार्थाची चव तुम्ही तुमच्या शहरात बसून घेऊ शकाल. सध्या या नव्या सोयीची गुरुग्राम आणि दिल्लीमध्ये या शहरांमध्ये चाचणी सुरू असून बेंगळुरू, लखनौ, हैदराबाद, जयपूर, कोलकाता आणि दिल्ली या शहरांमधून पदार्थ मागवण्याची सोय दिलेली आहे.

यासाठी नवा Intercity Legends नावाचा विभाग उपलब्ध करून देण्यात आला आहे. वेगवेगळ्या शहरांमधील पदार्थ विमानामार्फत पोहोचवण्यात येईल जेणेकरून एका दिवसात याची डिलिव्हरी शक्य होईल. उदा. कोलकत्त्यामधून रसगुल्ले, हैदराबादची बिर्याणी, लखनौचे कबाब, इ. उपलब्ध पदार्थांची चाचणी करण्यात आली असून त्यांची चव, सुवास सारखीच राहावी अशा प्रकारे हे पदार्थ डिलिव्हर केले जातील. यासाठी पुनर्वापर करता येईल असं पॅकेजिंग आणि खास मोबाइल रेफ्रीजरेशन तंत्रज्ञान वापरण्यात आलं आहे असं झोमॅटोचे प्रमुख दिपिंदर गोयल यांनी त्यांच्या ब्लॉग पोस्ट मध्ये सांगितलं आहे.

सध्या काही ठराविक शहरांमध्येच असलेली ही सोय मिळणाऱ्या प्रतिसादानुसार इतर शहरांमध्ये उपलब्ध केली जाईल.

तसे पाहता आपआपल्या शहरातच फूड डिलिव्हरीचे बऱ्याचदा वाईट अनुभव आपल्याला येतात. तुमच्या शहरात अशी सोय उपलब्ध झाली तर तुम्ही दुसऱ्या शहरातील पदार्थ ऑर्डर कराल का ? कमेंटमार्फत नक्की कळवा.

The post झोमॅटोवर आता इतर शहरांमधूनही जेवण मागवता येणार! appeared first on MarathiTech - मराठीटेक.

सध्या सुरू असलेला लॉकडाऊन आज जाहीर झालेल्या माहितीनुसार ३ मे पर्यंत वाढवण्यात आला आहे. अत्यावश्यक सेवांअंतर्गत आपण किराणा माल आणण्यासाठी बाहेर पडू शकतो मात्र हे करणं प्रत्येकाला शक्य होत नाही. यासाठी फुड डिलिव्हरी सेवा पुरवणाऱ्या स्विगी, झोमॅटोसारख्या अॅप्सनी किराणा मालाचीही ऑनलाइन डिलिव्हरी सुरू केली आहे. यासाठी त्यांनी स्थानिक किराणा दुकानदारांशी भागीदारी केली आहे. यापूर्वी तुम्हाला बिगबास्केट किंवा ग्रोफर्स हे दोनच पर्याय होते. मात्र आता स्विगी, झोमॅटो, डॉमिनोज, फ्लिपकार्ट, पेटीएम, अॅमेझॉन यांनीही ही सेवा देण्यास बऱ्याच शहरात सुरुवात केली आहे.
या सेवांची उपलब्धता त्या त्या शहरावर अवलंबून आहे आणि या काही शहरात ठराविक वेळेतच उपलब्ध होतील याची नोंद घ्यावी.

याआधी काही ठराविक शहरातच उपलब्ध असणारी ही किराणा/घरगुती गोष्टी डिलिव्हर करण्याची सोय आता आणखी छोट्या शहरात सुद्धा वाढवण्यात आली आहे. स्विगी जवळपास १२५ शहरात तर झोमॅटो ८० शहरात अशा प्रकारे वस्तु पोहचवत आहे. स्विगीने यासाठी HUL, P&G, गोदरेज, डाबर,सिप्ला, इ. कंपन्यासोबत भागीदारी केली आहे. झोमॅटोने टाटा, अमूल, आयटीसी, एमटीआर, एव्हरेस्ट अशा कंपन्यांशी भागीदारी केली आहे.

ही सेवा वापरण्यासाठी स्विगी किंवा झोमॅटो यापैकी अॅपवर जाऊन Grocery/Zomato Marketचा नवा पर्याय निवडा. तुम्हाला तुमच्यापासून जवळ असलेल्या किराणा दुकानाचं नाव दिसेल व तिथे उपलब्ध वस्तु दिसतील त्यापैकी हव्या आहेत त्या वस्तु निवडा. Add To Cart करा आणि ऑनलाइन पैसे द्या. दिलेल्या वेळेत वस्तु तुमच्या घरी पोहोचवल्या जातील! सध्या कोरोना प्रसाराचा धोका असल्याने तुम्ही No-contact/Contactless Delivery चा पर्याय निवडू शकता ज्यामुळे डिलिव्हरी बॉयसोबत येणारा थेट संपर्क टाळता येतो.

सध्या बऱ्याच शहरात या अॅप्सची सेवा मर्यादित स्वरूपात आल्याने यावर आयुष्य अवलंबून असणाऱ्या डिलिव्हरी बॉइजसाठी स्विगी व झोमॅटो मदत गोळा करत आहेत, शिवाय अनेकांना सध्या पोटभर जेवण मिळवणं सुद्धा मुश्किल आहे त्यांच्यासाठी मदत जमा करून त्यांना अन्न पोहोचवलं जात आहे. यामध्ये त्यांना इतर कंपन्या मदत करत आहेत.

The post स्विगी, झोमॅटोसारख्या अॅप्सवरून किराणा मालाची डिलिव्हरी सुरू! appeared first on MarathiTech - मराठीटेक.

आपण कुठेही बाहेर पडलो की , सोबत आपला स्मार्टफोन हा असतोच. या फोनमध्ये ढिगाने अॅप्स असतात. पण आपण कुठे अडचणीत सापडलो , तर हीसर्व अॅप्स आपल्याला उपयोगी पडतात का , असा प्रश्न जर विचारला तर अनेकांचे उत्तर नाही असेच येईल. आपल्या फोनमध्ये अशी काही अॅप्स जरूर असावीत , जी आपल्याला खरोखरीच उपयोगी पडतील. अशाच काही अॅप्सविषयी… 

मुंबई एसओएस 
आपल्याला अचानक अॅम्ब्युलस , पोलिस अशा कोणत्याही गोष्टीची गरज पडली की , आपण फोन नंबर शोधण्यात वेळ घालवत असतो. पण यापुढे असेकरण्याची गरज भासणार नाही. कारण जर तुम्ही तुमच्या मोबाइलमध्ये हे अॅप डाऊनलोड केलेले असेल, तर एका क्लिकवर तुम्ही असलेल्या ठिकाणच्या जवळच्या ठिकाणी फोन करता येऊ शकतो. यामध्ये तुम्हाला पोलिस स्टेशन्स , अग्निशमन दल ,अॅम्ब्युलन्स , रेल्वे , वृत्तपत्रांची कार्यलये आणि काही स्वयंसेवी संस्था यांचे नंबर्स देण्यात आले आहेत. मुंबईत राहणाऱ्या तसेच मुंबईत प्रवास करणाऱ्या मंडळींसाठी हे अॅप खूप उपयुक्त आहे. 

झोमाटो 
एखाद्या संध्याकाळी आपल्याला बाहेर जेवायला जायची हुक्की आली आणि नेहमीच्या हॉटेल्सपेक्षा काहीतरी वेगळे ट्राय करायची आपली इच्छा असेल तर आपल्याला हे अॅप आपल्याला चांगलेच मदत करू शकते. यात आपल्याला आपल्या परिसरातील हॉटेल्स , त्यांची मेन्यू कार्ड त्या हॉटेलचा रीव्ह्यू ,तेथे मिळणारे फेमस पदार्थ या सर्व गोष्टींची माहिती मिळते. या हॉटेलमध्ये येऊन गेलेल्याल्यांच्या प्रतिक्रियाही यामध्ये आपल्याला वाचावयास मिळू शकतात. 

स्मार्ट शेअर मुंबई ट्रेन्स 
हे अॅप्लिकेशन तुम्ही ज्या ठिकाणी असाल त्या ठिकाणापासून जवळचे रेल्वे स्टेशन दाखवते. त्या स्टेशनवरून अप आणि डाऊन दोन्ही दिशेच्या लोकल ट्रेन्सविषयी माहिती मिळते. त्या लोकलचे सुरुवातीचे तसेच शेवटचे स्टेशन आदी सर्व माहिती आपल्याला या अॅपच्या माध्यमातून मिळू शकते. हे अॅप सातत्याने अपडेट होत असते. नुकत्याच नव्याने सुरू झालेल्या डहाणू लोकल्सचे सविस्तर वेळापत्रकही या अॅपमध्ये उपलब्ध करून देण्यात आले आहे. 

स्मार्ट मुंबई पब्लिक ट्रान्सपोर्ट 
मुंबई म्हंटले की , बेस्ट बसचा वापर हा आलाच. या अॅपमध्ये लोकल ट्रेन्ससोबतच बेस्टच्या बसेसचीही माहिती मिळते. कोणत्या क्रमांकाच्या बसने कुठपर्यंत जाता येते , वाटेत किती स्टॉप्स येतात , या सर्वांची माहिती या अॅपमध्ये आपल्याला मिळते. याशिवाय या अॅपमध्ये रिक्षा , टॅक्स ,एसी टॅक्सी यांचे दरपत्रकही उपलब्ध करून देण्यात आले आहे. 

एअरलाइन फ्लाइट स्टेटस ट्रॅकिंग 
तुम्ही देशात वा परदेशात विमानाने प्रवास करणार असाल , तर तुम्हाला हे अॅप नक्कीच कामी येईल. या अॅपमध्ये विमानाचा नंबर टाकला की , ते विमान कुठे आहे , त्याचे स्टेट्स काय आहे या सर्वाची माहिती मिळते. यामुळे विमान लेट असेल , तर विमानतळावर जाऊन त्याची वाट पाहण्याची गरज भासणार नाही. 

एम-इंडिकेटर 
सर्वात लोकप्रिय आणि अगदी साध्यातल्या सध्या मोबाइलपासून ते अत्याधुनिक स्मार्टफोनपर्यंत प्रत्येक फोनमध्ये वापरता येणारे हे अॅप आहे. बहुतेक जण ट्रेन्सचे टाइमटेबल पाहण्यासाठी या अॅपचा वापर करतात. मात्र यामध्ये रिक्षा टॅक्सी यांचे दरपत्रकही आहे. याचबरोबर कोणत्या नाट्यगृहात/ सिनेमागृहात कोणते नाटक / सिनेमा आहे , अशी सर्व माहितीही यात उपलब्ध आहे. 

मोबाइल ट्रॅकर 
मोबाइलसारखी हरकामी वस्तू हरवली की , हळहळ वाटते. पण जर तुमच्या मोबाइलमध्ये ‘ मोबाइल ट्रॅकर ‘ असेल तर मोबाइल परत मिळणे अधिक सोपे जाईल. हे अॅप वापरताना आपल्याला आपल्या ओळखीच्या किंवा कुटुंबातील एखाद्या व्यक्तीचा नंबर सेव्ह करून ठेवावा लागतो. समजा आपला मोबाइल चोरीला गेला , तर चोरट्याने त्या मोबाइलमध्ये सिम कार्ड घातले की , लगेचच आपल्याला त्या मोबाइलवरून एसएमएस येतो. ज्या आधारे आपण त्या मोबाइलचे लोकेशन शोधू शकतो. तोएसएमएस तुमच्याच मोबाइलवरून आला आहे हे ओळखण्यासाठी त्यात तुमचा ‘ आयएमइआय ‘ नंबर येतो. चोरी करणाऱ्या व्यक्तीला हे अॅप डिलीट करणे शक्यच नसते. कारण डिलीड करण्यासाठी त्याला पासवर्डची गरज भासते. 

पीआरएफ 
रिक्षा किंवा टॅक्सीमधून उतरल्यावर अनेकदा भाड्यावरून वादावादी होते. त्याचे मीटर फास्ट असल्याचे आपण म्हणतो , तर तो ‘ इतनाही होता है ‘ असे म्हणत आपले म्हणणे झुगारून लावतो. या वादावादीतून मार्ग काढण्यासाठी किरण आंबर्डेकर यांनी त्यांचे मित्र मयांक शाह आणि रवी यांच्या मदतीने एक ‘ पे राइट फेअर ‘ ( पीआरएफ) नावाचे अॅप विकसित केले आहे. हे अॅप इतर अॅप्सपेक्षा थोडे वेगळे आणि अत्याधुनिक आहे. हे अॅप वापरताना आपल्या फोनमधील जीपीएस सुरू होते. ते सुरू होण्यासाठी आवश्यक त्या तीन उपग्रहांशी आपल्या मोबाइल कनेक्ट झाला की , आपले अॅप काम करण्यास सुरुवात करते. 
आपण रिक्षात अथवा टॅक्सीमध्ये बसण्यापूर्वी हे अॅप सुरू करून ठेवायचे आणि रिक्षा किंवा टॅक्सी सुरू झाली की , स्टार्ट क्लिक करायचे. मग रिक्षाच्या मीटरप्रमाणे आपल्या मोबाइलमधील 
हे मीटरही काम करण्यास सुरुवात करते. आपल्याला यामध्ये रिक्षाचा स्पीड, पार केलेले अंतर तसेच वेटिंग टाइम इत्यादी माहितीही समजते. हे अॅप जीपीएसशी जोडले गेल्याने ते अधिक प्रभावीपणे काम करते. हे अॅप तयार करण्यासाठी दोन वर्षांचा कालावधी लागला.सुरुवातीला रिक्षामीटरच्या कार्यप्रणालीचा अभ्यास करून मीटर कशाप्रकारे चालते , रिक्षा थांबते तेव्हा किती वेळांनी मीटर पडते , 
या सर्व गोष्टी लक्षात घेण्यात आल्या. 
त्याचप्रमाणे टॅक्सीचाही अभ्यास करण्यात आला. यानंतर तयार झालेल्या या अॅपच्या विविध चाचण्या करण्यात आल्या आणि मग ते अप अँड्रॉइड मार्केटमध्ये उपलब्ध करून देण्यात आले , असे अॅपचे निर्माते किरण सांगतात. यामध्ये केवळ मुंबईच नाही 
तर नवी मुंबई , कोलकाता , दिल्ली , अहमदाबाद , गुरगाव , पुणे , ठाणे या शहरांमधील रिक्षा , टॅक्सी , कुल कॅब यांचे दरही कळू शकतात. केवळ दरपत्रक देण्यापेक्षा जीपीएसच्या मदतीने आशा प्रकारचे लाइव्ह अॅप देणे आम्ही पसंत केले , असे किरण सांगतात. हे अॅप लवकरच इतर मोबाइल ओएसवर वापरता येऊ शकेल , असेही ते म्हणाले. 

The post सोबत अॅप्सची appeared first on MarathiTech - मराठीटेक.