आपण अनेकदा गुगल मॅपवरून आपले घर किंवा आपले गाव शोधतो. या सेवेत आकाशातून आपण आपल्या घराकडे पाहत असतो. पण हाच अनुभव आपण आपल्या गल्लीमधून फिरतो आहे, असा वाटला तर…? गुगल स्ट्रीट सर्व्हिसने ही सेवा जगात अनेक ठिकाणी उपलब्ध करून दिली. पण भारतात गुगलला ही परवानगी मिळाली नाही. पण गुगलला जे शक्य झाले नाही ते भारतातील एका कंपनीने करून दाखवले आहे. सोल आणि साजिद मलिक या दोन सख्ख्या भावांनी १९९५ साली स्थापन केलेल्या जेनेसिस इंटरनॅशनल या कंपनीने गुगलला उत्तर देण्यासाठी वोनोबो हा नवीन सर्च तयार केला आहे. यात भारतातील ५४ शहरांचे ३६० अंशामध्ये फोटो काढून त्यापासून इंटरनेटवर सारे शहर उभे केले आहे. नुकतेच मलिक बंधूनी आपल्या या अनोख्या प्रोजेक्टचे वोनोबो या नावाने औपचारिक घोषणा करून wonobo.com या नावाने साइट सुरू केली आहे. सध्यातरी साइटवरील नकाशे लोड होण्यास वेळ लागत असला, तरी एक दोन दिवसांत साइटचा वेग सामान्य होईल, असा त्यांचा दावा आहे.
जेनेसिस कंपनी पूर्वीपासूनच सरकारला नकाशे बनवण्यात मदत करीत होती. त्याचा फायदा कंपनीला झाला. या प्रकल्पात स्ट्रीट व्ह्यू फोटोग्राफीची मर्यादा, संरक्षण खाते, भारतीय अहवाल खात्यांसारख्या कार्यालयांनी अनेक नियम आखून दिले होते. त्याचा या प्रकल्पात अडथळा आला, तरी सर्व नियम पाळत कटाक्षाने काही ठिकाणांचे फोटो काढले नसल्याचे त्यांनी स्पष्ट केले आहे. जेनेसिसने यापूर्वी नॅव्हस्टेक, नोकिया, बिंगसारख्या मोठ्या ब्रॅण्डबरोबरच दुबई, मक्का आणि मदीनाचे नकाशे तयार करण्याचे काम केले आहे.
कशी असेल ही सेवा
पहिल्या पातळीवर एकूण १२ शहरांचे नकाशे उपलब्ध करून देण्यात येणार आहेत. यात मुंबई, पुणे, दिल्ली, बेंगळुरु, चेन्नई, हैदराबाद, अहमदाबाद, सुरत, जयपूर, कोस्टल गोवा, कोलकाता आणि आग्रा या शहरांच्या नकाशांचा समावेश आहे. तसेच पुढील काही आठवड्यात इतर ४२ शहरांचा नकाशा साइटवर पाहता येणार आहे.
या साइटवर डाव्या बाजूला शहराचा नकाशा असेल, तर उजव्या बाजूला शहराचा स्ट्रीट व्ह्यू असेल. तुम्ही नकाशावरील कोणत्याही ठिकाणी क्लिक केल्यास तुम्हाला उजव्या बाजूला त्या परिसराचा स्ट्रीट व्ह्यू दिसू शकणार आहे. तुम्ही माऊसच्या सहाय्याने या रस्त्यांवर व्हर्च्युअल व्हिजनच्या माध्यमातून फिरू शकता. सर्च बॉक्सचा ऑप्शनही या साइटवर राहणार असला, तरी या नकाशांमध्ये एक कोटी प्रसिद्ध ठिकाणे बाय डिफॉल्ट टॅग करण्यात आली आहेत. यात चार कोटी बिझनेसशी संबंधित ठिकाणे आहेत.
नकाशातील सर्व फोटो हे सहा महिन्यापेक्षा जास्त जुने नसतील याची काळजी कंपनीमार्फत घेतली जाणार आहे. तुम्ही या साइटवर एखाद्याची संपूर्ण स्टोरीलाइन गाइड तयार करू शकता. उदा. तुम्ही सचिन तेंडूलकर गाइड तयार करत असाल, तर तुम्ही अगदी सचिनचा जन्म झाला त्या नर्सिंग होमपासून ते त्याच्या सध्याच्या घरापर्यंत सर्व काही त्या गाइडमध्ये टॅग करू शकता. वोनोबोने हाय रिझोल्यूशन फोटोंचा वापर करून नकाशे तयार केले असले, तरी भारतातील इंटरनेटचा स्पीड पाहता त्यांनी लो रेझोल्यूशन फोटो साइटवर उपलब्ध करू दिले आहेत. कंपनी लवकरच मोबाइल अॅपही लाँच करणार आहे. भारतीय पर्यटन विभागाबरोबर वोनोबो काम करीत असून, भारतातील प्रेक्षणीय स्थळे, पर्यटकांसाठी कोणती ठिकाणे पाहण्यासारखी आहेत, यावर काम करीत आहे. लवकर त्या शहरांचाही या नकाशात समावेश करण्यात येणार आहेत.
incoming search terms : Google street view alternative for India wonobo.com
