यूट्यूबवरील व्हिडिओ शोधणे म्हणजे नाही म्हटले तरी दिव्यच असते. पण यावर आता यूट्यूबने यावर उपाय शोधला आहे. यूट्यूब नेशन नावाची नवीन सेवा नुकतीच सुरू झाली असून त्यावर दररोजचे नवीन हायलाइट्स, ट्रेंडिंग आणि अजून न शोधलेले व्हिडिओचे हायलाइट रील उपलब्ध असणार आहे. यासाठी यूट्यूबने ड्रीमवर्क्स अॅनिमेशनसोबत टायअप केले आहे. त्यासाठी www.youtube.com/user/youtubenation ही लिंक अॅक्टिव्ह ही करण्यात आली आहे.
ड्रीमवर्क्सची टीम या डेटातून मोस्ट पॉप्युलर व्हिडिओ तर शोधेलच शिवाय यूट्यूबच्या युजर्ससाठी कोणता व्हिडिओ ‘व्हायरल’ ठरणार हे सुद्धा शोधणार आहे.अथांग सम्रुद्रात दिपस्तंभासारखा याचा उपयोग होईल, अशी टिप्पणी ड्रीमवर्क्स अॅनिमेशनचे सीईओ जेफरी कॅटझेनबर्ग यांनी केली आहे. जेफरी यांची ही टिप्पणी अतिशयोक्तीपूर्ण वाटत असली तर यात तथ्य आहे. कारण एका मिनिटात १०० तासाच्या लांबीचे व्हिडोओ यूट्यूबवर अपलोड होत असतात. इतक्या डेटातून व्हिडीओ सर्च करणे म्हणजे सोपे काम नाही.
फक्त विश्लेषण आणि गणितांच्या आधारावर आमचे काम अवलंबून असणार नाही. सर्वात जास्त काय पाहिले जात आहे, हे दाखवले जाईलच पण काय सर्वात जास्त पाहिले जावू शकेले हे शोधणे देखील आवश्यक असल्याचे त्यांनी सांगितले. जवळपास पाच मिनिटांचा एक शो असेल, त्यात एक तासापेक्षा जास्त लांबीच्या व्हिडिओच्या लिंक असतील. १८ ते ३० वयोगटातील युजर्ससाठी याचा अधिकाधिक उपयोग होवू शकेल. कधीतरी युट्युबचा वापर करणारे नियमितपणे युट्युबचे दर्शक व्हावे, हे लक्षात ठेवून यूट्यूब नेशनची रचना करण्यात आली आहे.
यू ट्यूबरील कंटेंट प्रमोट करण्यासाठी यूटयूब नेशनची निर्मिती करण्यात आली आहे. दोन्ही कंपन्यांचा हा एकत्रित प्रोजेक्ट असून जवळपास एक वर्ष यावर काम सुरू असल्याचे यू ट्यूबचे कंटेट आणि बिझनेस ऑपरेशन्सचे प्रमुख रॉबर्ट किंकल यांनी सांगितले आहे. ही फक्त सुरुवात असून यानंतर स्पोर्टस, न्यूज आणि म्युझिक अशा किमान एक डझन कॅटेगरी बनवण्यात येणार असल्याचे ड्रीमवर्क अॅनिमेशनच्यावतीने सांगण्यात आले आहे.
