व्हॉट्सअॅपवरील पर्सनल चॅटवर हॅकर्सची नजर

जर तुमच्याकडे अँड्रॉइड (Android) फोन आहे आणि त्यावर तुम्ही व्हॉट्सअॅप (WhatsApp) या इन्स्टंट मेसेजिंग अॅपचा वापर करीत असाल तर वेळीच सावध व्हा. कारण काही स्क्रिप्टिंग आणि टेक्निकल जेनेटिक कोड्सचा वापर करुन कोणीही तुमचे खासगी संभाषण (चॅट) पाहू शकते. एका डच सुरक्षा सल्लागार कंपनीने हा धक्कादायक खुलासा केला आहे.

बॅश बॉशचर्ट (Bas Bosschert) या डच कंपनीने केलेल्या दाव्यानुसार अँड्रॉइड फोनच्या एसडी कार्डमध्ये व्हॉट्सअॅप इन्स्टॉल केले असल्यास डेटा शेअरिंगच्या नावाखाली व्हॉट्सअॅपमधील खासगी मेसेजे वाचता येणे शक्य आहे.

जर व्हॉट्सअॅपचा सर्व डेटाबेस तुमच्या मेमरी कार्डमध्ये सेव्ह केला असेल आणि अॅप्लिकेशन शेअर करताना तुम्ही दुस-या डिव्हासइला तुमचा मेमरी कार्ड अॅक्सेस दिला तर तुमचा व्हॉट्सअॅपवरील डेटा चोरीला जाऊ शकतो. अनेकदा अँड्रॉइड युझर पुढचा मागचा विचार न करता सर्व गोष्टींना सरसकट परवानगी देत असल्याने ही एक मोठी समस्या ठरु शकते अशी शक्यता बॅश बॉशचर्टने आपल्या ब्लॉगवर व्यक्त केली आहे.

कशी होते ही डेटा चोरी?

एखाद्या हॅकरला तुमचा व्हॉट्सअॅपवरील डेटा चोरण्यासाठी फक्त दोन गोष्टींची गरज असते. पहिली म्हणजे डेटा स्टोरेजसाठी लागणारी जागा आणि दुसरी म्हणजे एक अँड्रॉइड अॅप्लिकेशन ज्याच्या मदतीने व्हॉट्सअॅपवरील डेटा साईटवर अपलोड करता येतो. गुगल प्ले किंवा एपीके फाइलवरुन जेव्हा हे अॅप्लिकेशन इन्स्टॉल होत असते तेव्हा हे अॅप्लिकेशन नेटवर्क आणि मेमरी कार्डच्या अॅक्सेसची परवानगी मागते. युझरने अॅक्सेसला परवानगी देताच फोनमधील व्हॉट्सअॅपवरील सर्व संभाषणे अॅपच्या साईटवर अपलोड होतात. हा डेटा हॅकर्सकडून गुन्हेगारी कामांसाठी तसेच तुमच्या खासगी आयुष्यावर नजर ठेवण्यासाठी वापरला जाऊ शकतो.

आयफोन आणि विंडोज फोनला धोका नाही

आयफोन आणि विंडोज फोनला सुरक्षेचा हा धोका नाही. कारण या फोनमध्ये एखादे अॅप्लिकेशन इन्स्टॉल होताना इतर डेटा स्टोरेज आणि फोन हार्डवेअरच्या अॅक्सेसची मागणी होत नाही. आयफोन आणि विंडोजमधील हार्डवेअर तसेच सॉफ्टवेअरचे अॅक्सेस मिळवणे खूपच कठीण असल्याने या फोनवरील व्हॉट्सअॅप डेटा सुरक्षित आहे.

गुगल काय म्हणते?

गुगल प्लेमधील सर्व अॅप्लिकेशनकडे आमचे खास लक्ष आहे. कोणत्याही अॅप्लिकेशनमध्ये संशयास्पद बाब आढळल्यास आम्ही ते अॅप गुगल प्लेवरुन काढून टाकतो, अशी माहिती गुगलने दिली. मात्र या उपायानंतरही ओपन सोर्स सिस्टीम असणा-या अँड्रॉइडवर हॅकरच्या हल्ल्याची शक्यता नाकारता येत नाही. सुरक्षेच्या दृष्टीकोनातून सर्वच अॅन्ड्रॉइड फोनवर बायडीफॉल्ट सेटिंगमुळे गुगल प्ले बाहेरचे अॅप्लिकेशन इन्स्टॉल होत नाहीत. खबरदारीचा उपाय म्हणून गुगलने गुगल प्लेवरील अॅप्स व्यतिरिक्त इतर कोणतेही अॅप्स मोबाईलवर इन्स्टॉल न करण्याचे आवाहन अँड्रॉइड युझरना केले आहे.