अनेकदा एखादी तांत्रिक समस्या आली, तर लगेच सोडवायला कुणीही धावून येत नाही. जवळपासच्या कम्प्युटर रिपेअर करणाऱ्याला ते कळत नाही किंवा छोटा प्रॉब्लेम मोठा सांगून पैसे लुटण्याचे काम तो करण्याची शक्यता असते. अशावेळी पुढे दिलेले काही ऑनलाइन तांत्रिक मदतनीस मदतीला येऊ शकतात.
टीम व्ह्यूअर
हा एक चांगला आणि घरगुती वापरासाठी मोफत उपलब्ध असलेला तांत्रिक मदतनीस आहे. यावर तुमच्या समस्यांवर चांगला पर्याय दिला जातो किंवा एकाहून अधिक तज्ज्ञ याबाबत ऑनलाइन मार्गदर्शन करू शकतात. यासाठी तुमच्या कम्प्युटरवर टीम व्ह्यूअरचे सॉफ्टवेअर आणि ब्रॉडबँड कनेक्शन असणे आवश्यक आहे. विंडोज, मॅक, लिनक्स कम्प्युटर, लॅपटॉप तसेच अँड्रॉइड आणि विंडोज मोबाइलवर पण ते चालते.
आययोगी डॉट इन
वार्षिक २,५९९ रुपये वर्गणी भरल्यावर २४ बाय ७ अमर्यादित तांत्रिक मदत यावर मिळते. तुमच्या कम्प्युटरमधील प्रॉब्लेम शोधून ते दुरुस्त तर करतीलच, पण उपकरण अधिक चांगल्या प्रकारे सुरू रहावे म्हणून मार्गदर्शनही करतील. विशेष म्हणजे, यामध्ये हार्डवेअर सेटअप आणि इन्स्टॉलेशनचा खर्च समाविष्ट आहे.
जॉइन डॉट मी
वेबसाइटवर मोफत अकाऊंट तयार केल्यावर स्टार्ट मीटिंगवर क्लिक केल्यावर एक छोटा सेटअप सुरू होईल. त्यातून तुमच्या कम्प्युटरवर जॉइन डॉट मी चा कंट्रोल पॅनल येईल. हा कंट्रोल पॅनल तुमच्या कम्प्युटरसाठी एक युनिक अॅक्सेस कोड तयार करेल. या कोडच्या सहाय्याने जॉइन डॉट मी च्या वेबसाइटवर तुमची स्क्रीन दिसेल. या कंट्रोल पॅनेलच्या मार्फत तुम्ही प्रॉब्लेम सोडविण्यासाठी तज्ज्ञांना तुमच्या कम्प्युटरचा अॅक्सेस देऊ शकता.
क्रोम रिमोट डेस्कटॉप
काही समस्येमुळे एखादे सॉफ्टवेअर जर तुमच्या कम्प्युटरवर इन्स्टॉल होत नसेल तर गुगलच्या क्रोम ब्राऊझरच्या या फ्री प्लग इनची तुम्ही मदत घेऊ शकता. याआधारे दोन कम्प्युटरमध्ये रिमोट अॅक्सेस निर्माण होतो. या आधारे अॅक्सेस कोड तयार करून तुम्ही तुमचा कम्प्युटर दूरवर बसलेल्या तज्ज्ञासोबत शेअर करू शकता. तो त्याआधारे प्रॉब्लेम शोधून सोल्युशन पुरवेल.
विकी रेफरन्स डेस्क
जर तुम्हाला प्रॉब्लेमचे उत्तर मिळवण्याची घाई नसेल तर विकीपीडिया रेफरन्स डेस्क हा एक चांगला पर्याय आहे. विकीपीडिया रेफरन्स डेस्कवर जाऊन उपलब्ध विविध कॅटेगरीमधून आवश्यक कॅटेगरीची निवड करा. त्याठिकाणी नेहमीचे प्रॉब्लेम आणि त्यांची उत्तर दिली आहेत. जर त्यात तुमचा प्रॉब्लेम नसेल तर तिथे दिलेल्या प्राथमिक माहितीच्या आधारे तुमची समस्या लिहा, १४ दिवसाच्या आत तुम्हाला पर्याय मिळेल.
