सर्वांत मोठा वायफाय झोन बिहारमध्ये

बिमारू राज्य अशी बिहारची ओळख पुसून टाकण्यात दिवसेंदिवस यश येत असल्याचे चित्र आहे. मुख्यमंत्री नितीशकुमार यांनी सूत्रे हाती घेतल्यापासून बिहारने विकासाच्या बाबतीत कात टाकली आहे. सर्वच क्षेत्रात बिहार आघाडी घेत असताना तंत्रज्ञानाच्या बाबतही या राज्याने गुजरातपासून थेट बीजिंगपर्यंत आपले आव्हान निर्माण केले आहे. जगातील सर्वांत मोठा ‘वायफाय झोन’ निर्माण करण्याचा मान चीनने मिळवला होता. बीजिंग शहरात उभारण्यात आलेला ‘वायफाय झोन’ साडेतीन किलोमीटरचा आहे. मात्र, नितीश सरकारने चीनची या क्षेत्रातील मक्तेदारी मोडण्याचा निर्णय घेतला आहे. राजधानी पाटणानजीक जगातील सर्वांत मोठा ‘वायफाय झोन’ निर्माण करण्याचे शिवधनुष्य बिहार सरकारने उचलले आहे. पाटणा ते धनपूर या मार्गावर एनआयटी पाटणा ते अशोक राजपथ ते धनपूर या दरम्यान जगातील सर्वांत मोठा म्हणजे २० किमी अंतराचा वायफाय झोन निर्मिला जाणार आहे. सध्या देशात सर्वत्र ‘वायफाय झोन’ निर्मितीची लाट पसरली आहे.


देशातील पहिले वायफाय झोन असणाऱ्या शहराचा मान नुकताच बेंगळुरूने मिळविला. ‘नम्म वायफाय’ या नावाने ही अगदी चकटफू सेवा एम. जी. रोड, ब्रिगेड रोड, सीएमएच रोड या व्यतिरिक्त यशवंतपूर, कोरमंगला आणि शांतीनगर बसस्टँडच्या परिसरात उपलब्ध करून देण्यात आली आहे. नरेंद्र मोदी यांनीही अहमदाबाद शहरामध्ये मोफत वायफाय सेवा उपलब्ध करून देण्याचे आश्वासन दिले आहे. दिल्ली सरकारचीही अशीच योजना प्रस्तावित आहे.


नुकत्याच बिहारमध्ये पार पडलेल्या ‘ई-बिहार’ परिषदेत मुख्यमंत्री नितीशकुमार यांनी ‘डायल १००’ आणि ‘सिटी सर्व्हेलन्स’ या महत्त्वाकांक्षी योजना सादर केल्या. ‘सिटी सर्व्हेलन्स’ अंतर्गत रस्त्यांवर हजारो सीसीटीव्ही कॅमेरे बसविण्यात येणार आहेत. त्या माध्यमातून प्रवाशांची विशेषतः महिलांच्या सुरक्षिततेकडे लक्ष पुरविण्यात येणार आहे. कॅमेऱ्यांच्या माध्यमातून मिळणारा डेटा साठवून ठेवण्यासाठी अत्याधुनिक डेटा सेंटरही उभारण्यात येणार आहे. या दोन्ही योजनांद्वारे राजधानी पाटणा गुन्हेमुक्त करण्याचा प्रयत्न आहे. हे सीसीटीव्ही कॅमेरे वाहनांच्या नंबरप्लेट आणि प्रत्येक व्यक्तीचा चेहरा तपासू शकतील, या दर्जाचे आहेत. या योजनेतून संपूर्ण पाटणा शहरावर २४ तास सीसीटीव्हीची करडी नजर ठेवण्यात येणार आहे.