काही दिवसांपूर्वी अँथ्रोपिक (Anthropic) या AI क्षेत्रातील आघाडीच्या कंपनीने त्यांच्या Claude AI सेवेमधील Cowork Agent साठी ११ नवीन प्लगइन्स आणले ज्याद्वारे जगभरातील कायदाविषयक, सेल्स (विक्रीविषयक), मार्केटिंग आणि डेटा अॅनॅलिसिस कामे ऑटोमेट म्हणजेच या AI Agent द्वारे स्वयंचलित करता येऊ शकतात.

• लीगल (Legal) आणि करारांची पडताळणी: वकिलांच्या किंवा लीगल टीमच्या मदतीशिवाय कायदेशीर कागदपत्रे वाचणे, समजून घेणे आणि त्यावर कार्यवाही करणे.
• कोडिंग आणि डेटा ॲनालिसिस: ज्युनिअर इंजिनिअर्स जी कामे तासनतास करत असत, ती कामे हे AI एजंट काही मिनिटांत आणि अधिक अचूकपणे करू शकते.
• स्वयंचलित वर्कफ्लो: सेल्स, मार्केटिंग आणि ॲडमिनशी संबंधित कामे (उदा. ईमेल पाठवणे, रिपोर्ट्स बनवणे) पूर्णपणे ऑटोमेट करणे.

या नव्या टूलमुळे SaaS म्हणजेच सॉफ्टवेअर अॅज ए सर्व्हिस प्रकारचा सेवा देणाऱ्या मोठ्या कंपन्यांचा व्यवसाय कमी होऊ शकतो अशी भीती दिसू लागल्याने आधी अमेरिकेतील स्टॉक मार्केट आणि आज भारतातील स्टॉक मार्केटमधील आयटी कंपन्यांचे शेयर्स मोठ्या प्रमाणात घसरले आहेत!

NIFTY IT निर्देशांक जवळपास 6.3% ने घसरला असून ही मार्च २०२० नंतरची सर्वात मोठी घसरण असेल. Infosys, TCS, Wipro, HCL Tech आणि Persistent Systems यांच्या शेअर्समध्ये सुमारे ४ ते ७% पर्यंत घसरण झाली. काही कायदा-सॉफ्टवेअर कंपन्यांचे शेअर्स १०%-२०% पर्यंत खाली आलेत.

सोप्या भाषेत सांगायचे तर, अमेरिकन आणि युरोपियन क्लायंट्ससाठी कोडिंग, टेस्टिंग आणि मेंटेनन्सची कामे करण्यासाठी भारतीय कंपन्या हजारो इंजिनिअर्सना कामावर ठेवतात. जर AI एजंट एका तासात १० माणसांचे काम करू लागले, तर IT कंपन्यांचे ‘बिलिंग’ (Billable Hours) कमी होतील. कोडिंग, टेस्टिंग आणि डेटा एंट्रीसारखी जी कामे फ्रेशर्स किंवा ज्युनिअर लेव्हलवर केली जात होती, ती आता AI स्वतः करू शकेल. त्यामुळे क्लायंट्सना मोठ्या IT टीमची गरज उरणार नाही.

‘SaaSpocalypse‘ ची भीती: जागतिक स्तरावर याला ‘SaaSpocalypse’ (सॉफ्टवेअर-ॲज्-अ-सर्व्हिसचा अंत) असे म्हटले जात आहे. जर AI स्वतः सॉफ्टवेअर डेव्हलप आणि मॅनेज करू शकत असेल, तर महागड्या सॉफ्टवेअर सबस्क्रिप्शनची गरज कमी होईल.

अँथ्रोपिकच्या नवीन प्लग्इन्समुळे “AI आता माणसांची जागा घेण्यास सज्ज झाले आहे,” हा संदेश गेला आहे. यामुळे भारतीय IT कंपन्यांच्या मनुष्यबळ-आधारित (Manpower-heavy) बिझनेस मॉडेलवर प्रश्नचिन्ह उभे राहिले आहे. आपण सध्या AI टूल्समध्ये ChatGPT किंवा Gemini चाच वापर करताना पाहत असतो मात्र सॉफ्टवेअर कोडिंग किंवा आयटीमधील सेवांमध्ये Claude AI त्यांच्यापेक्षा चांगलं मॉडेल देत आहे.

गेले काही महिने अनेक आयटी कंपन्यांमध्ये कर्मचारी कपात सुरू असून कोरोना काळात मोठ्या प्रमाणात झालेली भरती हे कारण सांगितलं जात होतं. आता मात्र स्पष्टपणे AI मुळेच पुढील नोकऱ्यांचं प्रमाण कमी होत आहे हे दिसून येत आहे. आता या नव्या टूल मुळे तर थेट कंपन्यांच्याच भविष्याबद्दल मार्केटच्या मनात शंका उत्पन्न झाली आहे त्यामुळेच ही शेयर्सची पडझड दिसून येत आहे.

The post Anthropic च्या नव्या AI प्लगइन्समुळे जगभरात आयटी शेयर्स घसरले! appeared first on MarathiTech - मराठीटेक.

रिलायन्स जियोने त्यांच्या ग्राहकांसाठी गूगलच्या Gemini AI Pro प्लॅनमधील सेवा चक्क १८ महिने मोफत देत असल्याचं सांगितलं आहे. याची किंमत ३५१०० इतकी असून आता तेच सर्व Jio 5G ग्राहकांना मोफत मिळणार आहे! यामध्ये 2TB स्टोरेज, Gmail सारख्या सेवांमध्ये Gemini AI वापरता येईल, Veo 3.1 (AI व्हिडिओ तयार करण्यासाठी) आणि Nano Banana या इमेज तयार करण्याची टूलमध्ये अधिक जास्त लिमिट्स मिळतील.

यासाठी तुम्हाला ऑफर Claim करावी लागेल आणि किमान दरमहा रु 349 किंवा त्याहून अधिक किंमतीचा Unlimited 5G प्लॅन रीचार्ज करावा लागेल. तरच ही ऑफर सुरू राहील. शिवाय हा प्लॅन वापरण्यापूर्वी काही गोष्टी नक्की लक्षात ठेवल्या पाहिजेत त्याबद्दल पुढे नक्की वाचा.

आधी Perplexity Pro + Airtel त्यानंतर गूगलनेच विद्यार्थ्यांसाठी एक वर्ष मोफत Gemini आणलं मग ChatGPT Go प्लॅन भारतीय युजर्ससाठी फ्री करण्यात आला आणि आता गूगल Gemini + Jio ऑफर आली आहे. देशातील तरुण वर्गाला या AI टूल्सची सवय लावून भविष्यात यांना आपल्याकडे ग्राहक म्हणून घेण्यासाठी ही स्पर्धा जोरात सुरू झाली आहे.

जियो 5G ग्राहकांनी गूगल Gemini Pro ऑफर कशी Claim करायची ?

1. MyJio ॲप उघडा आणि लॉगिन करा
2. ॲप उघडल्यावर वरती Google Gemini ऑफरचा बॅनर दिसेल
3. त्यावर क्लिक करा आणि Claim करा. तुम्हाला ज्या Gmail आयडीवर जोडायचं आहे त्याची माहिती द्या
4. आता तुम्ही १८ महिने गूगल Gemini Pro AI मोफत वापरू शकता!

ही ऑफर गेले काही दिवस फक्त १८ ते २५ वयोगटातील ग्राहकांना (तरुणवर्गाला) उपलब्ध करून देण्यात आली होती. आता ८ नोव्हेंबरपासून सर्व वयोगटातील जियो ग्राहकांना ही ऑफर मिळेल. तुम्हाला MyJio मध्ये गेल्यावर Register Interest असं बटन दिसू शकतं त्याचा अर्थ तुमच्या अकाऊंटला अद्याप ही ऑफर आलेली नाही काही दिवसात येईल.

जियो 5G ग्राहकांनी ऑफर Claim करताना खालील गोष्टी लक्षात ठेवा

• ही ऑफर वापरण्यासाठी तुम्हाला पूर्ण १८ महिने किमान ३४९ रु किंवा त्याहून जास्त किंमतीचा Unlimited 5G प्लॅनने रीचार्ज करत राहावं लागेल.
• जर तुम्ही रीचार्ज केला नाही तर त्या ऑफरमधील सेवा वापरता येणार नाहीत.

• तुम्ही कोणत्या गूगल अकाऊंटला ही ऑफर लिंक करायची ते काळजीपूर्वक निवडा
• १८ महिने 2TB स्टोरेज मिळणार असलं तरी त्यासाठी १८ महिने पूर्ण झाल्यानंतर त्या प्लॅननुसार पैसे द्यावे लागतील. हे प्लॅन्स Google One वर पाहू शकता.
• 2TB च्या प्लॅनची किंमत दरमहा ₹६५० इतकी आहे आणि 2TB+Gemini ची किंमत दरमहा ₹१९५० इतकी आहे.
• तुम्ही जर तुम्हाला आधीच फ्री मिळणाऱ्या 15GB च्या वर डेटा स्टोअर केला आणि जर तुम्ही १८ महिन्यानंतर त्यांना पैसे देणार नाही असं ठरवलं तर तुम्हाला नवीन ईमेल मिळणार नाहीत किंवा पाठवतासुद्धा येणार नाहीत. तुम्हाला स्टोअर केलेला डेटा मध्ये नवीन काही अपलोड/एडिट करता येणार नाही.
• त्यामुळे तुम्ही फक्त 2TB स्टोरेजसाठी ही ऑफर घेणार असाल तर तुमच्या Primary/मुख्य वापरातील ईमेल ॲड्रेसला शक्यतो ही ऑफर जोडू नका. नवीन ईमेल आयडी बनवून त्यावर Claim करा.
• तुम्ही जर त्या 2TB डेटा स्टोरेजचा वापर करणार नसाल तर तुमच्या मुख्य ईमेल आयडीवरच ही ऑफर Claim केली तर चालेल.

• तुमच्याकडे आधीच Google One चं सबस्क्रिप्शन असेल आणि तुम्ही ही ऑफर Claim केली तर ती आधीची ऑफर बंद होऊन त्या जागी हा नवा 2TB चा प्लॅन सुरू होईल.
• १८ महिने झाल्यानंतर तुम्हाला किती GB चा प्लॅन वापरायचा आहे त्यानुसारच प्लॅन आणि अकाऊंट निवडा.

हे सर्व सांगण्याचं कारण की फ्री मिळणारी सेवा समोरून फ्री वाटत असली तरी शेवटी त्यांच्या उद्याच्या व्यावसायिक उद्देशानेच ह्या सोयी मोफत दिल्या आहेत. सुरुवातीला फ्री वापरण्यास देऊन त्याची सवय लावून मग नंतर भरमसाठ पैसे लावायचे आणि त्या सिस्टम्समध्ये अडकवून त्यांच्याच सेवा वापरण्यास भाग पाडायचं असं चित्र AI मधील किंवा एकंदर सर्वच टेक कंपन्या करताना दिसून येत आहे. म्हणून हे सबस्क्रिप्शन घेताना काळजीपूर्वक अकाऊंट निवडून त्यामागील छुप्या किंमती समजावून घेऊनच वापर सुरू करा…

The post जियोतर्फे Gemini AI Pro १८ महिने मोफत : आता सर्व 5G ग्राहकांसाठी उपलब्ध! appeared first on MarathiTech - मराठीटेक.

OpenAI ने भारतीय वापरकर्त्यांसाठी मोठी घोषणा केली आहे. ChatGPT Go हा पेड प्लॅन आता भारतात एक वर्षासाठी मोफत उपलब्ध होणार आहे. साधारणपणे या प्लॅनची किंमत ₹३९९ प्रति महिना (म्हणजे वर्षाला जवळपास ₹४७८८) असते, पण आता भारतीय युजर्सना तो पूर्णपणे फ्री मिळणार आहे.

ChatGPT Go मध्ये काय काय मिळणार?

ChatGPT Go हा OpenAI चा त्यांचा सर्वात स्वस्त सबस्क्रिप्शन प्लॅन आहे. हा प्लॅन फ्री व्हर्जनपेक्षा खूप जास्त सुविधा देतो

• जास्त मेसेज लिमिट मिळते(फ्री व्हर्जनपेक्षा दहा पट जास्त मेसेजेस)
• अधिक लवकर उत्तरे मिळतील
• अधिक इमेज जनरेशन (AI इमेजेस तयार करण्याची सुविधा)
• अधिक फाईल अपलोड करून त्यावर काम करण्याची सोय
• GPT-5 या लेटेस्ट मॉडेलचा वापर करता येणार

OpenAI ने नुकताच डेव्हलपर्ससाठी DevDay Exchange Bengaluru हा त्यांचा भारतातील पहिला मोठा कार्यक्रम आयोजित केला. त्याच निमित्ताने भारतीय युजर्ससाठी ही ऑफर जाहीर करण्यात आली आहे. भारत हा OpenAI साठी सर्वात वेगाने वाढणारा बाजार आहे. भारतीय युजर्सचा उत्साह लक्षात घेऊन ही ऑफर देण्यात आली आहे.

ऑफर कशी मिळवायची?

• ४ नोव्हेंबर २०२५ पासून ही ऑफर सुरू झाली आहे
• नवीन आणि आधीचे दोन्ही युजर्स ही ऑफर ॲक्टिव्हेट करू शकतात
• ChatGPT ॲप किंवा वेबसाईटवर लॉगिन केल्यावर वरील प्रमाणे बॅनर आलेला दिसेल किंवा वर Upgrade for free बटन दिसेल त्यावर क्लिक करा
• आता Go प्लॅन निवडला की तो आपोआप फ्री दिसेल.
• त्यानंतर तुम्हाला तुमचे Credit/Debit कार्ड डिटेल्स किंवा UPI (PhonePe, GPay, etc) मार्फत AutoPay सेटप करावं लागेल.
• हे करताना पैसे जाणार नाहीत मात्र १२ महिने पूर्ण होण्याच्या काही दिवस आधी AutoPay बंद करायला विसरू नका.

Login to chatgpt.com > Click Upgrade for Free > Add Payment Details > ChatGPT Go Activated

भारतामध्ये AI चा वापर झपाट्याने वाढतोय. अशा वेळी OpenAI ने ChatGPT Go मोफत करून भारतीय युजर्सना एक मोठी संधी दिली आहे. ज्यांना AI च्या प्रीमियम फीचर्सचा अनुभव घ्यायचा आहे, गेले काही दिवस AI कंपन्या भारतीय ग्राहकांना त्यांच्याकडे वळवण्यासाठी बरेच प्रयत्न करत आहेत. अर्थात यासाठीचा सर्वोत्तम मार्ग म्हणजे भारतीयांना ती गोष्ट मोफत उपलब्ध करून देणे.

आधी Perplexity Pro + Airtel ऑफर त्यानंतर Google Gemini ने विद्यार्थ्याना एक वर्ष मोफत सेवा जाहीर केली आणि आता ChatGPT GO. यानंतर Jio ने सुद्धा गूगलसोबत भागीदारी करत १८ महिने Google Gemini Pro मोफत देणार असल्याचं सांगितलं आहे!

The post ChatGPT Go प्रीमियम प्लॅन आता भारतात एक वर्ष मोफत उपलब्ध! appeared first on MarathiTech - मराठीटेक.

मायक्रोसॉफ्टने Copilot चा नवीन Fall Release जाहीर केला आहे, ज्यात AI सहाय्यकाला जास्त मानवी, जास्त कामात येणारा व आपल्याशी नीट संवाद साधणारा बनवण्याचा प्रयत्न केला गेला आहे.
याचसोबत Windows 11 वर AI अनुभवांकडे लक्ष देऊन प्रत्येक Windows 11 PC ला एक AI PC बनवणे या दृष्टिकोनातून नवीन Agentic फीचर्स जाहीर झाले आहेत. याचाच भाग म्हणून पूर्ण ओएसमधील गोष्टी करण्यासाठी आपण आता Copilot ची मदत घेऊ शकतो!

आता विंडोज आणि Copilot द्वारे एक नवा Mico नावाचा Companion मिळणार असून हा एक blob आकाराचा असिस्टंट जो आपण ज्याप्रकारे बोलत आहोत त्याचा अभ्यास करून उत्तरे देतानासुद्धा वेगवेगळे हावभाव आणि आवाजात चढउतार करून उत्तरे देईल ! विशेष म्हणजे यामध्ये गंमत म्हणून त्यांनी जुन्या विंडोजमध्ये एकेकाळी उपलब्ध असलेल्या Clippy ला सुद्धा आणलं आहे. Mico च्या डिझाईनसाठी मिळणारे वेगवेगळे पर्यायांमध्ये Clippy सुद्धा मिळेल.

Copilot Vision सारख्या सोयीमुळे आपण शब्दशः आपल्या स्क्रीनवर दिसत असलेल्या गोष्टीबद्दल प्रश्न विचारून ती अडचण Copilot कडून दूर करून घेऊ शकतो!

Copilot Fall Release मधील मुख्य वैशिष्ट्ये या अपडेटमध्ये एकूण १२ मोठ्या वैशिष्ट्यांचा समावेश आहे. त्यातील काही महत्वाच्या गोष्टी खालीलप्रमाणे:

• ग्रुप्स (Copilot Groups): ३२ लोकांसोबत एकत्र ब्रेनस्टॉर्मिंग करा. कॉपायलट चर्चा सारांश तयार करतो, त्यानुसार मते तपासतो आणि टास्क वाटप करतो. टीम वर्कसाठी परफेक्ट!
• इमॅजिन (Imagine): एकमेकांच्या AI Generated Conntent आयडियाज एकत्र करा आणि रिमिक्स करा. कलाकुसर किंवा मार्केटिंग आयडियाजसाठी उत्तम.
• रिअल टॉक (Conversation Styles): कोपायलट आता तुमच्या स्टाइलनुसार बोलतो. तो तुम्हाला उपयुक्त होईल अशा मार्गाने चर्चा करेल.
• मेमरी अँड पर्सनलायझेशन (Memory & Personalization): कॉपायलट आता तुमची जुनी बोलणी आठवते – जसं ट्रेनिंग प्लॅन किंवा वार्षिकोत्सव. तुम्ही ते संपादित किंवा डिलीटही करू शकता. हे तुमचा ‘सेकंड ब्रेन’ सारखे आहे.
• कनेक्टर्स (Connectors): वनड्राइव्ह, आउटलुक, जीमेल, गुगल ड्राइव्ह सारख्या अॅप्सशी जोडा. “माझी डेंटिस्ट अपॉइंटमेंट कधी?” असं बोलून विचारा आणि लगेच त्या App मध्ये माहिती अभ्यासून उत्तर मिळेल.
• Proactive Actions : कोपायलट आता स्वतः सुचवतो की पुढे काय करायचं, जसं रिसर्चमध्ये नेक्स्ट स्टेप्स.
• कॉपायलट फॉर हेल्थ (Copilot for Health): आरोग्य विषयक प्रश्नांसाठी विश्वसनीय माहिती (हार्वर्ड हेल्थवरून) आणि डॉक्टर शोधण्यात मदत. सध्या अमेरिकेत उपलब्ध.
• लर्न लाइव्ह (Learn Live): अभ्यासासाठी व्हॉइस-बेस्ड ट्यूटर. स्वतःचा वैयक्तिक शिक्षक असल्याप्रमाणे आपल्याला प्रश्न विचारून शिकवतो, थेट उत्तर देण्याऐवजी तो विषय समजावून सांगतो.
• Copilot Mode in Edge : ब्राउजरमध्ये AI द्वारे टॅब्स सारांश मिळवा, हॉटेल बुक करा किंवा फॉर्म भरायला लावा. आपल्या बोलण्याप्रमाणेनेही कृती करेल.
• Copilot Pages and Copilot Search : एकाचवेळी अनेक फाइल्स अपलोड करा आणि त्या सर्वांचं एकत्र विश्लेषण AI मार्फत करून घ्या.

या फीचर्समुळे कोपायलट तुम्हाला मदत करेल पण हे करताना गरजेचा असलेला डेटा आणि इतर कंट्रोल तुमच्याकडे राहतो. हे अपडेट सुरुवातीला अमेरिका, यूके, कॅनडा येथे उपलब्ध होणार असून नंतर हळूहळू इतर ठिकाणी येईल.

विंडोज ११ वर एआय आणखी सोपे: नवे कोपायलट आणि Agentic Features : या रिलीजने प्रत्येक विंडोज ११ पीसीला एआय पीसी बनवलं आहे. तुम्ही “Hey Copilot” म्हणून बोलू शकता आणि तो तुमचं बोलण ऐकायला तयार होईल.

• Copilot Vision आता जगभर उपलब्ध – आपली स्क्रीन पाहून टिप्स देणे, जसं रेझ्युमे मध्ये योग्य बदल करणे किंवा गेम खेळण्यात मदत.
• टास्कबारवर असलेल्या नव्या Ask Copilot बटणाने एका क्लिकमध्ये एआय सुरू करा. लोकल फाइल्सवर अॅक्शन्स घ्या, जसं फोटोज सॉर्ट करा किंवा पीडीएफ वाचा.
• Agentic फीचर्स मध्येही एआय तुमच्या परवानगीने काम करतो, जसं वेबसाइट तयार करणे, कोडचा अभ्यास करून bugs काढून टाकणे किंवा व्हिडिओ एडिट करणे. गेमिंगसाठीही कोपायलट बीटा उपलब्ध होतो आहे.

मायक्रोसॉफ्ट गेल्या काही दिवसात AI च्या शर्यतीत थोडंसं मागे पडत असल्याची जाणीव होताच भसाभस AI फीचर्स आणत आहे पण या सोयी उपयुक्त असल्या तरी एकाचवेळी अनेक नव्या गोष्टी आणि त्यात व्यवस्थित माहिती देणारं UI डिझाईन नसल्याने वापरकर्त्यांना अडचणीच्याच ठरणार आहेत. Copilot एज ब्राऊजरमध्येही उघडल्यावर बऱ्याच गोष्टी स्क्रीनवर दिसू लागतात ज्यांची त्यावेळी आपल्याला गरज नसते.

हल्ली ट्रेंडनुसार सगळ्याच गोष्टी AI AI AI म्हणत प्रत्यक्ष वापर आणि युजर्सना एकंदरीत AI फीचर्सची गरज याकडेही लक्ष द्यायला हवं. AI फीचर्सच्या नादात मूळ सॉफ्टवेअर/वेबसाइटचा वापर कोणत्या गोष्टीसाठी होतो तेच बाजूला गेल्यासारखं होईल…

The post विंडोज ११ मध्येही AI Copilot : नवा Mico आणि सोबत Clippy देईल उत्तरे! appeared first on MarathiTech - मराठीटेक.

प्रत्येक विंडोज लॅपटॉप/पीसीमध्ये उपलब्ध असलेल्या मायक्रोसॉफ्ट एज ब्राऊजरमध्ये आता Copilot Mode उपलब्ध झाला असून यामुळे हा ब्राऊजरसुद्धा आता Agentic Browser म्हणून ओळखला जाईल. ब्राऊजरमध्ये उजव्या कोपऱ्यात address bar च्या बाजूला Copilot बटन आलेलं दिसेल त्यावर क्लिक करून आपण यामधील सोयी वापरू शकता. हा ब्राऊजर विंडोज, macOS, iOS व अँड्रॉइडवर उपलब्ध आहे.

 Download Link aka.ms/copilot-mode

Copilot Mode म्हणजे काय?

Microsoft Edge मध्ये आलेला Copilot Mode हा तुमच्या कामात मदत करणारा AI असिस्टंट आहे.

• तुम्ही एकाच वेळी अनेक टॅब उघडले असतील तर Copilot त्यांचा सारांश करून देतो.
• फॉर्म्स आपोआप भरून देणे, हॉटेल बुकिंगसारखी कामे पूर्ण करणे किंवा तुमच्या मागील ब्राउझिंगवरून पुढील सूचना देणे हेही तो करू शकतो.
• माइकद्वारे बोलून ब्राउझिंग करणे, टॅब्समधील माहिती जोडून समजावून सांगणे आणि तुमच्या प्रोजेक्ट्सची “Journeys” नावाने आठवण ठेवणे ही त्याची खास वैशिष्ट्ये आहेत.
• एजंट मोड (Copilot Mode) ब्राउझरमध्ये तुमचं काम थेट Copilot ला द्यायचं झालं तर Copilot मदत करेल उदाहरणार्थ, तुम्हाला एखादी पार्टी आयोजित करायची असेल तर Copilot मध्ये अमुक अमुक वस्तू शोध, कार्टमध्ये भर आणि ऑर्डर दे किंवा एखादी फ्लाइट/हॉटेल शोधून बुक कर अशी कामं ते ऑनलाइन स्वतः करून देऊ शकतो.

वापरकर्त्यांसाठी फायदे

• वेळ वाचतो: लांबलचक लेख किंवा रिपोर्ट्स वाचण्याऐवजी Copilot त्याचा थोडक्यात सारांश देतो.
• काम सोपे होते: फॉर्म्स, पासवर्ड मॅनेजमेंट, बुकिंग किंवा शॉपिंगसारखी कामे थेट ब्राउझरमधून आपोआप पूर्ण होतात.
• वैयक्तिक अनुभव: तुमच्या ब्राउझिंग पद्धतीनुसार Copilot सूचना देतो.

सुरक्षितता आणि नियंत्रण

Copilot Mode मध्ये प्रायव्हसी कंट्रोल्स दिले आहेत. म्हणजेच तुमच्या परवानगीशिवाय तो तुमची browsing history वापरत नाही. तसेच, AI आधारित सुरक्षा फीचर्समुळे फसवणूक करणाऱ्या साइट्सपासून संरक्षण मिळते.

इतर Agentic Browsersशी तुलना

आज AI ब्राउझरची स्पर्धा जोरात आहे. Microsoft Edge Copilot Mode व्यतिरिक्त काही नवे ब्राउझर चर्चेत आहेत:

• Perplexity Comet: हा ब्राउझर Perplexity कंपनीतर्फे आणला असून सध्याचा लोकप्रिय Agentic ब्राऊजर आहे.
• ChatGPT Atlas : हा OpenAI ने बनवलेला ब्राऊजर असून यामध्ये ChatGPT अंतर्भूत आहे.
• Microsoft Edge : पूर्वीच्याच Edge ब्राऊजरमध्ये आता Copilot ची जोड देऊन त्याला Agentic Browser बनवलं आहे.
• Dia Browser: हा आणखी एक उपलब्ध असलेला Agentic ब्राउझर आहे. सध्या फक्त macOS वर उपलब्ध

मायक्रोसॉफ्टने OpenAI मध्ये मोठी गुंतवणूक केलेली असून त्यांनी Atlas जाहीर केल्यावर काहीच दिवसात मायक्रोसॉफ्टने Copilot Mode जाहीर केला आहे. यामध्ये ChatGPT चंच तंत्रज्ञान आणि मॉडेल्स (आत्ता GPT 5) वापरले आहेत.

थोडक्यात सांगायचं तर, Edge Copilot Mode हा मायक्रोसॉफ्टचा चांगला प्रयत्न आहे. पुढील काही वर्षांत ब्राउझर म्हणजे फक्त इंटरनेट उघडण्याचं साधन न राहता, तुमच्यासोबत काम करणारा खरा डिजिटल साथीदार ठरणार आहे. लवकरच क्रोममध्येही अशा सोयी मिळतील आणि Brave ने सुद्धा तसे प्रयत्न सुरू असल्याचं सांगितलं आहे. आता फक्त Apple Safari आणि Firefox यांनी अद्याप अशा सोयीबाबत माहिती दिलेली नाही.

Copilot Mode कशाप्रकारे काम करतं हे पाहण्यासाठी खालील व्हिडिओ पहा…

The post आता मायक्रोसॉफ्ट Edge ब्राऊजरमध्ये Copilot Mode appeared first on MarathiTech - मराठीटेक.